Azərbaycan Əmək və Sosial Münasibətlər Akademiyasında məzun günü keçirilib

Məzun günü! 

         Azərbaycan Əmək və Sosial Münasibətlər Akademiyasının (AƏSMA) akt zalı yenidən bayramsayagı bəzənmişdi. 2014- cü ilin məzunlarını yola salmaq üçün Akademiyanın müəllim və tələbə heyəti, tələbə-məzunlar və valideynlər bir araya gəlmişdi. Təntənəli bayram tədbirini Akademiyanın rektoru, professor Hüseyn Qaraşov açaraq, son illərdə Azərbaycanda təhsil sahəsində aparılan islahatlardan danışdı və bu istiqamətdə AƏSMA-da  həyata keçirilən ugurlu tədbirlərin mənzərəsini içtirakcılara çatdırdı.

O, məzunlara AHİK-in sədri, millət vəkili, Rusiya Federasiyası Sosial Elmlər Akademiyasının akademiki, professor Səttar Mehbalıyevin təbrikini çatdırdı. Daha sonra dedi: “Əziz məzunlar! Xatırlayırsınızsa, 2010-cu ildə sizinlə ilk görüşümüzdə mən bildirdim ki, Səttar müəllimin bizim pedaqoji kollektivdən başlıca tələbi tələbələrin biliyinin qiymətləndirilməsində obyektivliyin və şəffaflığın təmin edilməsidir.

Əziz məzunlar! Siz Akademiyaya qəbul olarkən 143 nəfər idiniz. Ancaq bu gun 119 nəfər məzun olur. Çox təəssüf ki, sizinlə burada olmayan yoldaşlarınızdan 24 tələbə Akademiyanı bitirə bilməyib. Yəqin ki bu gənclərimizin valideynləri Akademiyamızın kollektivindən narazı qalmazlar və övladlarının daha yaxşı təhsil almaları üçün bizim göstərdiyimiz səyi xoş qarşılayarlar.

Əziz məzunlar və valideynlər! Sizin də bildiyiniz kimi, Azərbaycan xalqının ümummilli lideri Heydər Əliyev respublikaya rəhbərlik etdiyi dövrdə gənclərin tərbiyə və təhsilinə həmişə xüsusi diqqət və qayğı ilə yanaşmış, bu sahədəki zərərli vərdişlərə qarşı mübarizə aparmışdır. Respublikamızda gənclər siyasətinin tam hüquqi bazasını yaratmış və çox böyük işlər görmüşdür. Bu işlər bu gün də respublikamızın möhtərəm prezidenti cənab İlham Əliyev tərəfindən uğurla davam etdirilir.

Bu diqqət və qayğıdan bəhrələnən Azərbaycan gəncləri dunyada bütün sahələr üzrə respublikamızı layiqincə təmsil edirlər.

 Əziz məzunlar! Mən inanıram ki, Akademiyanı bitirdikdən sonra da, gələcək həyatınızda həmişə xoş sədalarınızı eşidəcəyik. Bunun üçün birinci növbədə vaxtdan, zamandan  səmərəli istifadə etməlisiniz. Elə edin ki, vaxtınız hədər getməsin, davamlı və planlı çalışın və məqsədinizə doğru inamla irəliləyin.

Ən böyük arzumuz odur ki, harada olursunuzsa olun, akademiyada gördüyünüz ən ali insani həyat prinsipləri olan hallalıq prinsipinə sadiq olun”.

Daha sonra məzun valideynlərinin adından “İqtisadiyyat və inzibati idarəetmə” fakültəsində təhsil alan Əlizadə Kəmalənin valideyni Əlizadə Zemfiraya söz verildi. O, öz çıxışında qeyd etdi ki, “Mən qürur hissi keçirirəm ki, qızım obyektivlik hökm sürən belə bir ali məktəbdə təhsil alır. Bu akademiya doğrudan da rektor Hüseyn müəllimin simasında Azərbaycanımız üçün layiqli gənclər yetiştirən təhsil müəssisəsidir. Akademiyanın bütün pedaqoji kollektivinə çox sağ olun deyirəm və qarşınızda baş əyirəm. Burada fəaliyyət göstərəm professor-müəllim heyəti, savadlı olmaqla yanaşı, həm də insani dəyərlər baxımından müsbət mənada fərqlənirlər. Gənclərin formalaşma mərhələsində Akademiya kollektivinin valideynlərlə sıx əməkdaşlıq yaratmasına da şahid olmuşduq. Bir valideyin olaraq, bir daha hamınıza çox ağolun deyirəm”.

Tədbirdə daha bir neçə valideyinin çıxışı dinlənildikdən sonra, çıxış üçün söz, Azərbaycan Əmək və Sosial Münasibətlər Akademiyasının keçmiş məzunlarından olan Cəbiyev Nicata verildi. O, məzunu olduğu Akademiynın professor-müəllim heyəti qarşısında çıxış edərək bildirdi ki, “Bu tədbirdə iştirakımdan şərəf duyuram və doğma müəllimlərimi salamlayıram. Əziz məzunlar! Bu gün Azərbaycanın ən şəffaf təhsil müəssisələrindən birini bitirməyiniz münasibətilə sizi təbrik edirəm. Mən düşünürəm ki, Akademiya rəhbərliyi indiyəcən məzun olmuş gənclərin işlədikləri müəssisələrdən hər zaman xoş xəbərlər eşidib. Arzu edirəm ki, builki məzunlarımız da bu ənənəni davam etdirsinlər, ölkəmizə və valideyinlərinə faydalı övladlar olsunlar.

Çıxışlardan sonra tədbir maraqlı konsert proqramı ilə davam edib. Şən musiqi sədaları altında məzun uniforması geyinərək səhnəni bölüşən bu ilin məzunları da maraqlı cıxışlar etdilər, xatirələrini danışdılar, ürək sözlərini çatdırdılar. Daha sonra Azərbaycanın tanınmış müğənnilərindən Zaur Əmiraslanov, Eldəniz, Coşqun Viləş, Zarina, Dana, Ramilə, Meyxanaçı Samirə, Aşıq Natiq, və “Dostlar” qrupu öz məlahətli səsi ilə qəlbləri oxşadı.

Beləliklə, ali təhsil ocağında son dəqiqələrini yaşayan AƏSMA-nın tələbələri “Məzun” gününü təntənəli şəkildə qeyd etdi. Bəziləri kədərlənir, bəziləri isə öz sevincini yoldaşları ilə bölüşür və bu xoşbəxt günlərini qeyd edirdi. Onlar qayğısız illəri arxada qoyub yeni həyata qədəm qoyurdular.

Ən sonunda, təntənəli mərasim münasibətilə Akademiyanın tədris korpusunun qarşısındakı ərazidə  ənənəvi papaq atma mərasimi keçirildi və burada da gözəl musiqi sədaları altında rəqs edən gənclər istədikləri kimi əylənib, həyatlarının ən xoş günlərini kədər və sevinc hissi ilə qeyd etdilər.

Azərbaycan Əmək və Sosial

Münasibətlər Akademiyasının

müəllimi                                            Xaqani Hüseyn oğlu Məmmədov