Abşeron Rayon Prokurorunun müavini Nail Əliyev mənzil dələduzlarını müdafiə edir?

Hörmətli oxucular, redaksiyamıza şikayət məktubu daxil olub. Şikayət məktubunu heç bir duzəliş etmədən diqqətinizə çatdırırıq.

       Məktubda bildirilir ki, özgə əmlakını mənimsəməkdə məşhurlaşmış Ələkbər və Fəxrəddin Hüseynov qardaşları Xırdalan şəhərində inşa etdikləri yaşayış binasında yeni bir dələduzluq əməli törətmişlər. Bu dəfə  onlar Eks - Prezident Elçibəyin qardaşı oğlu Ayturan Əliyevin ailəsinə aid 3 otaqlı mənzili dələduzluq yolu ilə başqa şəxsə satmışlar. Abşeron Rayon Polis İdarəsi tərəfindən (müstəntiq Yaşar İsgəndərov) araşdırılan (“AFŞARAN”  və  “AFŞARAN-A” MMC-lərin təsisçiləri Ələkbər və Fəxrəddin Hüseynovların əməli barədə) bu işlə bağlı zərərçəkmiş qismində izahatı alınmış Müzəffər Məmmədli bildirir ki, Abşeron Rayon Prokuroru vəzifəsini icra edən Nail Əliyev baş vermiş qanunsuzluqlara açıq aşkar şərait yaradaraq onların pul və əmlaklarının dələduz qardaşlar tərəfindən mənimsənilməsinə səbəb olmuşdur.                                       

         Belə ki, araşdırma nəticəsində toplanmış materiallar cinayət işi başlanması üçün Abşeron Rayon Prokurorluğuna təqdim edilmişdir. Prokuror  vəzifəsini müvəqqəti  icra etməsindən fürsət kimi yararlanan  prokuror müavini Nail Əliyev açıq-aşkar sənədlərin saxtalaşdırılması və dələduzluq cinayətinin tərkibi olmasına baxmayaraq dələduzluqda ad çixarmış Fəxrəddin və Ələkbər Huseynovlarla iş birliyinə girərək onları cinayət məsuliyyətindən yayındırmağa çalışır. Və bununla, bilərəkdən 5 ay uzadılan bu işi xüsusi nəzarəti altında saxlayan və dələduz qardaşları himayə etməklə cinayət işi başlanmasının qarşısını alır.                        

     Eks Prezident Əbülfəz Elçibəyin qardaşı oğlu Ayturan Əliyevin razılığı olmadan sənədləri saxtalaşdıraraq onun  mənzilini başqa adama satmışdır. Bir neçə aydan sonra isə Ayturan Əliyevin adından saxta razılıq ərizəsi müqaviləyə əlavə edilmişdir.  Bir neçə dəfə Nail Əliyevlə görüşərək, Ələkbər və Fəxrəddin Hüseynov qardaşlarının təkzibolunmaz cinayət əməli törətdiklərini sübutlarla onun nəzərinə çatdırsaq da   o, açıq-aşkar dələduzluq və sənəd saxtalaşdırması cinayətlərini törətmiş qardaşları israrla müdafiə etmişdir. Nail Əliyevin bu işə dair qanunlarla heç cür uzlaşmayan anlaşılmaz münasibəti bizi Abşeron Rayon Prokuroru çox hörmətli Rahib Seyidova muraciət etmək məcburiyyətində qoydu. Məzuniyyətdən döndükdən sonra hörmətli Rahib müəllim müavini Nail Əliyevi,  müstəntiq Yaşar İsgəndərovu və məni dəvət edərək  hər birimizi dinlədi və sonda (Nail Əliyevin yanlış məruzəsinə baxmayaraq) əks tərəfə şikayətçi ilə razılaşmaq üçün müəyyən vaxt verilməsi, razilaşma  olmazsa cinayət işi başlanması barədə göstəriş verdi.

         Bu göstərişdən bir müddət sonra müstəntiq Yaşar İsgəndərovdan  aldığımız məlumata görə Nail Əliyev qardaşları çağırıb prokurorun göstərişi barədə onları xəbərdar etmişdir. 1 aya yaxın vaxt keçdikdən və heç bir nəticə olmadıqdan sonra isə Rahib müəllim 2-ci dəfə  Nail Əliyevə bu işlə bağlı ciddi tədbirlər görülməsi üçün təkrar tapşırıq verdi.          Bütün bunlara heç bir əhəmiyyət verməyən Nail Əliyev təkidlə dələduz qardaşları himayə etməyə  davam etmişdir. Bioqrafiyaları dələduzluqlarla dolu olan bu qardaşlar nə müqabilində belə müdafiə olunurlar başa düşmək mümkün deyil.                                                                 

   Fəxrəddin Hüseynov Balaxan oğlu özgə malını mənimsədiyi üçün CM-nin179 maddəsi ilə 10 il məhkumluq həyatı yaşayaraq yaxın vaxtlarda azadlığa buraxılmış və yeni dələduz əməlləri törətməkdədir. Digəri qardaşı Elxan Hüseynov Balaxan oğlu (keçmiş“MUR-AY” MMC-nin təsiscisi) Respublika səviyyəsində anoloqu olmayan elə bir dələduzluq cinayəti törətmişdir ki, (317 mənil və qeyri yaşayış sahəsini 1000-dən çox vətəndaşa satmışlar) Respublikanın bütün rəhbərliyi, hətta mötərəm Prezident İlham Əliyev Cənabları bu işi nəzarətə götürərək 1000-dən çox vətəndaşa (Elxan Hüseynov və 6 nəfər işçisi tərəfindən)  vurulmuş ziyanın bərpa olunması üçün göstəriş vermiş və nəticədə problem öz həllinı tapmış dələduzlara başçılıq edən Elxan Hüseynov isə 15 il azadlıqdan məhrum edimişdir. Üçüncüsü Ələkbər Hüseynov Balaxan oğlu da törətdiyi mənzil dələduzluğu əməlinə görə 2014-ci ildə AR CM-nin 178 3.2 maddəsi ilə barəsində 140206054  saylı  07 iyul 2014-cü il tarixli cinayət işi başlanmışdır. Qaçıb gizləndiyi üçün məcburi gətirilmə qərarı ilə Yasamal Rayon Polis idarəsi tərəfindən tutularaq 2 sutka həbsdə saxlanmış və Kürdəxanı təcridxanasına göndərilmə ərəfəsində mənimsədiyi əmlakları qismən pul, qalan borcunu əmlakla ödədiyi üçün azad olunmuşdur.                                                                          Qardaşların bioqrafialarındakı təkcə bu əməlləri bəs edir ki, onların cinayətkarca qanunları nə qədər heçə saydıqları, insanların mal- mülklərini haqsız və qanunsuz olaraq necə mənimsədikləri barədə fikir formalaşsın.                     İnanırıq ki, aidiyytı orqanlar bütün bunları və sənədlərlə sübut olunmuş cinayət tərkibli faktları görməzdən gələn Abşeron Rayon Prokurorunun  müavini Nail Əliyevin qanunlarla daban-dabana zidd hərəkətinə son verəcəklər. Əks təqdirdə dövlət rəhbərliyinə müraciət etmək məcburiyyətində qalacağıq.

   Gülnarə Fərəcova _______________                                                       

     Ayturan Əliyev     __________________

    Müzəffər Məmmədli    ___________________

Redaksiyadan: Məsələyə münasibətini öyrənmək üçün Abşeron Rayon Prokurorunun müavini Nail Əliyevlə əlaqə saxlamaq üçün prokurorluğa zəng etdik. Prokurorluqdan  zəngimizlə bağlı Nail müəllimə məlumat veriləcəyini bildirdilər.

Ancaq Prokuror müavini məsələyə münasibətini bildirmədiyi üçün onun mövqeyini işıqlandıra bilmədik. Qarşı tərəfin də mövqeyini  dərc etməyə hazırıq.