DİQQƏT: İsti hava insan sağlamlığı üçün təhlükəlidir– VİDEO

Qızmar isti hava insanın sağlamlığı və hətta həyatı üçün ciddi risk faktoru sayılır.

Bəzi qrup insanlar üçün isti hava daha təhlükəlidir.

Sumqayıt sakini Sevinc Novruzova da belələrindəndir.

Sevinc Novruzova – Sakin: “Son zamanlar havaların isti keçməsi insan orqanizmində fəsadlar törədir. Hamı kimi mənə də təsirini göstərir. Misal üçün baş ağrısı, sinir sisteminin pozulması, halsızlıq və əsas ürək ağrısı”.

Ürək-damar xəstəliyi olan insanlar anomal istilərdə çox ehtiyatlı olmalıdırlar. Çünki yay aylarında ürək tutmaları, infarkt, ürək xəstəliklərinin ağırlaşması hallarına daha tez-tez rast gəlinir. Buna görə də, isti havalarda belə xəstələr özlərini qorumalıdırlar.

Nüşabə Abdullayeva – Terpevt: “Bu xüsusilə xroniki xəstəlikləri olan insanlarda özünü büruzə verir. Günvurmalarla insanların tibb müəssisələrinə müraciəti artır. İsti havalar xroniki ürək çatışmazlığı olan xəstələrdə, yaşlı xəstələrdə, arterial hipertenziyası olan xəstələrdə, böyrək çatışmazlığı olan xəstələrdə daha çox özünü göstərir”.

Bu insanlar isti havanın orqanizmə olan mənfi təsirini mümkün qədər azaltmaq üçün günorta saatlarında çölə çıxmamalı, sərin yerdə qalmalı, düzgün qidalanmalı və kifayət qədər maye qəbul etməlidirlər. Bundan başqa, təyin olunmuş dərman preparatlarını vaxtında qəbul etmək, sağlamlığında cüzi də olsa dəyişiklik hiss etdikdə dərhal həkimə müraciət etmək lazımdır.

Mövsüm dəyişikliyi insanın psixoloji vəziyyətinə də təsirsiz ötüşmür. İnsanların bir qismi yay aylarında özlərini daha yaxşı hiss edir. Bir qismi isə əksinə, enerji azlığı, yorğunluq, diqqət pozuntusu, sıxıntı, yuxusuzluq və iştah dəyişiklikləri hiss edir.

Arzu Qurbanlı – Psixoloq: “İnsanlar gərək məşqlərə, dincəlməyə önəm versinlər, ki, bu enerji öz tarazlığını orqanizmdə qoruyub saxlaya bilsin. Çünki, bu enerji qış aylarında az olur. Buna görə də lazımi enerjini ala bilməyən insanlarda depressiya, yuxusuzluq baş qaldırır”.

Gün altında qalan şəxs istər-istəməz ilk növbədə, pis hallar haqqında düşünür. Bu da birbaşa əsəb sisteminə mənfi təsir göstərir. Mütəxəssislər bildirirlər ki, xəstəliklərin böyük əksəriyyətinin, o cümlədən damar xəstəliklərinin əmələ gəlməsində əsəb sisteminin rolu böyükdür. Beyində iki əsas proses-ləngimə və oyanma gedir. Oyanmanın ləngimədən üstün olması əsəb sistemində gərginlik yaradır. Simpatik sinir sisteminin aktivliyi artır. Aktivliyin artması qanda həyəcan hormonlarının çoxalmasına gətirib çıxarır. El arasında deyilən "qanı yaman qaraldı" ifadəsi özünü doğruldur. Xüsusilə də ilboyu işləyən və istirahət etməyən adamlarda bu, özünü daha çox biruzə verir.

Rəhman Rəsulov – Sakin: “İstirahət etməyəndə, dincəlməyəndə, yorğunluğu çıxarmayanda istənilən halda ailədə də, işdə də insana öz təsirini göstərir”.

Mütəxəssislər deyirlər ki, ötən əsrin əvvəllərində insanlar daha sağlam idilər və informasiyaları az idi. İndi qidamız o dövrün qidası ilə müqayisəyə gəlmir, həm də hər şeyi bilmək istəyirik. Müasir dövrdə kompüter məişətimizə elə daxil olub ki, bir gün internetsiz, informasiyasız qala bilmirik. Əsəb sistemimiz də əvvəlki insanların sağlıq durumu ilə müqayisədə xeyli dəyişib. Əsəb sistemi qaydasında olmayan insan “maqnit burulğanı olacaq” kəlməsini eşidən kimi ürək döyüntüləri artır, qan təzyiqi qalxır. Belə insanların istirahətə vaxt ayırması vacibdir.

Arzu Qurbanlı – Psixoloq: “İnsan istirahətsiz olarsa, daima əsəbi olur. Nevroza kimi gətirib çıxarır. Öz dostları ilə, yaxınlarla vaxt keçirmək lazımdır. Ən azından insanın beynindəki mənfi enerjidən azad ola bilər”.

İsti hava şəraiti insanda olan çatışmazlıqları üzə çıxaran səbəbdir. Xəstəliyin kökü deyil. Bəzən 40 dərəcə hərarətlə yanına gələn xəstəyə "havadandır, bu istiyə kim dözər" deyən həkimlərə də rast gəlirik. Az qala, hər 10 xəstədən 5-nə belə deyilir. Düzdür, əsəb, həyəcan, təşviş ümumi orqanizmə mənfi təsir edir, amma bu təsiri də aradan qaldırmaq lazımdır. Əgər müayinələrdə digər orqanik səbəb tapılmayıbsa, xəstə əsəbdən özünü yeyirsə, o zaman onu psixoterapevtə, psixoloqa yönəltmək lazımdır. Hər şey əsəbdəndir deyib, əlavə müayinə və müalicəyə gərək görməyən həkimdən də qaçın. Hər cür havada öz sağlamlığınızın qayğısına qalın!