ATƏT-in İnsan Ölçüsü üzrə görüşündə Azərbaycanda insan hüquqlarının səmərəli müdafiəsi ilə bağlı görülən işlərdən danışılıb

Varşava şəhərində keçirilən ATƏT-in İnsan Ölçüsü üzrə illik görüşündə Azərbaycan Respublikasının İnsan Hüquqları üzrə Müvəkkili (Ombudsman) Aparatının rəhbəri Aydın Səfixanlı da iştirak edib.

Ombudsman Aparatının mətbuat xidmətindən  bildiriblər ki, A.Səfixanlı tədbir çərçivəsində üç işçi iclasda məruzə ilə çıxış edib. O, çıxışlarında Azərbaycanda insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramının icrası istiqamətində məsul dövlət orqanları tərəfindən kompleks tədbirlər həyata keçirildiyini, insan hüquqlarının daha səmərəli müdafiəsi üzrə işlərin görüldüyünü, bu prosesə vətəndaş cəmiyyəti institutlarının cəlb edilərək birgə tədbirlərin həyata keçirildiyini diqqətə çatdırıb.

Həmçinin bildirilib ki, ölkəmizdə bu il keçirilmiş Prezident seçkiləri ərəfəsində Mərkəzi Seçki Komissiyası, Daxili İşlər Nazirliyi və ombudsmanın iştirakı ilə paytaxda və regionlarda dairə seçki komissiyaları sədrlərinin, şəhər və rayonların polis idarə və şöbələri əməkdaşlarının cəlb olunması ilə geniş maarifləndirmə tədbirləri həyata keçirilib. Həmin tədbirlərə beynəlxalq müşahidəçilər və QHT nümayəndələri də qatılıb. Eyni zamanda, seçki günü Ombudsman Aparatının 38 əməkdaşının müstəqil olaraq özlərinin təşəbbüsü ilə qeydiyyatdan keçərək müşahidəçi qismində paytaxt Bakı və ölkənin 53 şəhər və rayonunda 103 seçki dairəsi üzrə 371 seçki məntəqəsində, o cümlədən qaçqın və məcburi köçkünlərin məskunlaşdığı qəsəbələrdə, hərbi hissələrdə, cəzaçəkmə müəssisəsində səsvermə prosesini müşahidə etdiyi, müşahidələrin nəticəsi olaraq seçkinin seçki qanunvericiliyi və beynəlxalq standartlarla müəyyən edilmiş qaydada keçirildiyi, vətəndaşların seçki hüquqlarının təmin olunduğu tədbir iştirakçılarının diqqətinə çatdırılıb.

A.Səfixanlı qeyd edib ki, Azərbaycan Respublikasını Prezidenti bu il mayın 24-də Azərbaycan Xalq Cümhuriyyətinin 100 illiyi münasibətilə məhkum edilmiş bir sıra şəxslərin əfv olunması haqqında Sərəncam imzalayıb. Bu, indiyə qədər imzalanan əfv sərəncamları içərisində daha çox məhkumu əhatə edib, ümumilikdə 634 nəfərə şamil edilib, onlardan 39 nəfəri xarici vətəndaş olub. Sərəncam bir daha Azərbaycan dövlətinin mərhəmət, humanizm, humanitar yanaşma prinsiplərinə sadiqliyini nümayiş etdirir.

Çıxışda, həmçinin UNESCO üzrə Azərbaycan Respublikasının Milli Komissiyasının dəstəyi ilə ombudsman tərəfindən 2018-ci il iyunun 20-21-də “Hüquq bərabərliyinin təmin olunmasında və təşviqində milli insan hüquqları təsisatlarının rolu” mövzusunda Ombudsmanların XV Bakı Beynəlxalq Konfransının keçirildiyi, tədbirdə əhalinin müxtəlif sosial qruplarının hüquq bərabərliyinin təmini, ayrı-seçkiliklə mübarizə üzrə sahəsində görülən işlər, müsbət təcrübələr haqqında müzakirələrin aparıldığı qeyd olunub.

Aparatın rəhbəri, həmçinin ombudsmanın insan hüquqlarının müdafiəsi sahəsində əldə etdiyi bəzi müsbət təcrübələri tədbir iştirakçıları ilə bölüşüb. O, tədbirin media azadlığı mövzusuna həsr olunmuş sessiyasında çıxış edərək “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nda nəzərdə tutulmuş informasiya əldə etmək hüququnun, media azadlığının daha səmərəli təmini və informasiya əldə etmək haqqında Azərbaycan Respublikası qanunvericiliyinin izahı ilə bağlı maarifləndirmə tədbirlərinin həyata keçirilməsi üzrə müvafiq dövlət orqanları tərəfindən kompleks tədbirlər həyata keçirildiyini və bu istiqamətdə vətəndaş cəmiyyəti təşkilatları, media qurumları ilə sıx əməkdaşlıq edildiyini diqqətə çatdırıb.

A.Səfixanlı, həmçinin 2017-ci il fevralın 10-da Azərbaycan Respublikasının Prezidenti tərəfindən imzalanmış “Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin genişləndirilməsi barədə" Sərəncam haqqında məlumat verib. Bildirilib ki, Azərbaycanda ədalət mühakiməsinin səmərəsinin artırılmasına xüsusi diqqət yetirilir, ölkəmizin məhkəmə-hüquq sisteminin müasirləşdirilməsi üzrə ardıcıl tədbirlər görülür, cəzaların icrası ilə bağlı fəaliyyətin müasir dövrün tələblərinə uyğun qurulması sahəsində dövlət siyasətinin təzahürü olaraq həbs yerlərində saxlanılan şəxslərin hüquq və azadlıqlarının təmin edilməsi haqqında ayrıca qanun qəbul edilib, onların imtiyazları genişləndirilib, saxlanma şəraiti, tibbi və digər təminatlarının yaxşılaşdırılmasına xüsusi əhəmiyyət verilib.

Həmin Sərəncamın məqsədinin ölkəmizin inkişafı və əldə edilən hərtərəfli uğurlar fonunda cəza siyasətinə, cinayət qanunvericiliyinə, məhkumların hüquqlarının təminatı məsələlərinə baxışın yenilənməsi, penitensiar sistemin fəaliyyətinin təkmilləşdirilməsi, bu sahədə dünyada mövcud olan mütərəqqi təcrübələrin tətbiqi olduğu nəzərə çatdırılıb.

A.Səfixanlı, habelə işgəncələrə qarşı milli preventiv mexanizm qismində ombudsmanın həyata keçirdiyi fəaliyyət haqqında tədbir iştirakçılarını məlumatlandırıb. Onun hər üç sessiyadakı çıxışı tədbirin rəsmi sənədləri sırasına daxil edilib və ATƏT-in rəsmi saytında yerləşdirilib.