Şərur MTK-ya qarşı məhkəmə qərarı, vətəndaşlar Birinci-Vitse Prezidentə təşəkkür etdilər

Saytımıza verilən məlumata görə, Prezident İlham Əliyevin göstərişi ilə “Şərur MTK-dan” mənzil verilməsi nəzərdə tutulan şəxslərlə adı çəkilən şirkətin rəhbəri İsfəndiyar Axundovun qanunsuz hərəkətləri ilə bağlı uzun  müddətdir davam edən məhkəmə prosesi başa çatmışıdr. Məhkəmə prosesində Birinci Vitse- Prezidentə müraciətdən sonra Apellyasiya məhkəməsi tərəfindən ədalətli qərar qəbul edilmişdir. Zərəçəkmiş şəxslər ədalətli qərarın qəbul edilməsi ilə bağlı I Vitse-Prezident Mehriban Xanım Əliyevaya təşəkkür məktubu ilə müraciət ediblər. Strategiya.az-a daxil olan müraciətdə deyilir.

Azərbaycan Respublikasının Birinci Vitse-Prezidenti xanım Mehriban Əliyevaya

Bakı şəhərində fəaliyyət göstərən “Mur-Ay” MMC,  “Şərur” MTK və  Bakı  şəhəri İcra Hakimiyyəti  tərəfindən aldadılaraq maddi və mənəvi  zərərçəkmişlər tərəfindən                                                                                                                                                                                                                                                                           

                                      TƏŞƏKKÜR ƏRİZƏSİ

 Çoxhörmətli Birinci Xanımımız və Birinci Vitse-Prezidentimiz! Biz müxtəlif tarixlərdə rəsmi müqavilələrlə  “Mur-Ay” MMC-dən mənzillər və qeyri yaşayış sahələri aldıq. 2011-ci ildə “Mur-Ay” MMC-nin vəzifəli şəxsləri dələduzluq edərək 317 mənzil və qeyri-yaşayış sahələrini 1000-dən çox vətəndaşa sataraq bizə küllü miqdarda ziyan vurduqları üçün cinayət işi başlanmış və onlar həbs edilmişlər. “Mur-Ay” MMC-nin vətəndaşlara yaratdığı ciddi problem və bu problemdən doğan gərginlik hörmətli  Prezidentimiz İlham Əliyev cənablarının diqqətini cəlb etmiş və problemin həll edilməsi üçün aidiyyatı dövlət qurumlarına, o cümlədən Bakı şəhər İcra Hakimiyyətinə müvafiq göstəriş vermişdir. Cənab Prezidentin göstərişi əsasında Bakı şəhər İcra Hakimiyyəti başda olmaqla 17 dövlət qurum və təşkilatları problemin həllinə cəlb olunaraq birgə müqavilə imzalamış və problemin həlli Bakı şəhər İcra Hakimiyyətinin sərəncamı ilə “Şərur” MTK-ya həvalə edilmişdir. Bundan sonra “Mur-Ay” MMC-nin bütün əmlakları “Şərur” MTK-nın balansına keçirilmiş, əlavə olaraq “Şərur” MTK-ya 4 hektardan artıq torpaq sahəsı və 10 milyon manat maliyə yardımı ayırmışdır. Aidiyyatı dövlət orqanları da müqaviləyə uyğun olaraq Şərur” MTK-ya üzərlərinə düşən bütün digər yardımları etmişlər. Lakin “Şərur” MTK-nın rəbəri İsfəndiyar Axundov həmin müqavilə üzrə üzərinə götürdüyü öhdəliyinin bir qismini icra etsə də, biz zərərçəkmişlərə müxtəlif  bəhanələrlə mənzil verməkdən imtina etmişdir. Neçə illərdi müraciət etdiyimiz ilgili dövlət təşkilat və qurumları eləcə də dəfələrlə müraciət etdiyimiz məhkəmələr bizim əmlak hüquqlarımızın bərpa etməməsinə heç bir kömək etməmişlər. Əksinə hər dəfə  sanki vəzifə borclarıymış kimi “məğlubedilməz” İsfəndiyar Axundovun xidmətində durmuşlar. Son olaraq 2017-ci il boyu davam edən məhkəmənin də sonunda  hakim Ayaz Məmmədov (Yasamal rayon məhkəməsi)  bütün imkanlarını  “Şərur” MTK-nın sahibi İsfəndiyar Axundovun müdafiəsi üçün sərf etmiş və qanunlarla daban-dabana zidd tamamilə edalətsiz qətnamə qəbul etmişdir.

Hörmətli Mehriban xanım!                                                                                 

Hər yerdən rədd cavabı alaraq tam çarəsiz qaldıqdan sonra, 2018-ci ilin fevral ayında son ümid yeri olaraq Sizə imdad ərizəsi göndərərək xahiş etdik ki, bizim işimizi nəzarətinizə götürərək məhkəmənin ədalətli və obyektiv qərar çıxarmasına köməklik göstərəsiniz.         

Biz hamımız inanırıq ki, Siz bizim müraciətimiz əsasında bu işi nəzarətinizə götürmüş və işə yalnız və yalnız qanun əsasında baxılması və sonda ədalətli qərar çıxarılması barədə tövsiyyələrinizi vermisiz. Əminliklə bildiririk Bakı Apellyasiya Məhkəməsində 28 dekabr 2018-ci ildə qəbul edilən qanunauyğun və ədalətli qətnamə Sizin müdaxiləniz nəticəsində baş vermişdir! Və buna görə də Sizə dərin və sonsuz Minnətdarlığımızı bildirmək üçün bu məktubu yazdıq. 2018-ci ilin mart-dekabr ayları müddətində bizim apellyasiya şikayətimiz Bakı Apellyasiya Məhkəməsinin hakimləri Sənan Hacıyev və  Məmməd Məmmədov tərəfindən araşdırıldı və sonda qanuni və ədalətli qətnamə çıxarılaraq iddiamız təmin edildi. İşimizin qanunauyğun, obyektiv və ədalətli araşdırılması üçün hakim Sənan Hacıyev və Məmməd Məmmədov Azərbaycan Respublikası Auditorlar Palatasının mütəxəssislərini araşdırmaya cəlb edərək “Şərur” MTK-dan məcburi qaydada (məhkəmənin qərarı ilə) götürülmüş 3000-dən çox müqavilə və ödəniş orderlərinin hesablanmasını təmin etdilər. Bu araşdırmanı vicdanla və ədalətlə apardıqları üçün Auditorlər Palatasının üzvləri Misir  Əhmədova və Əli Tarverdiyevə, illərdi böyük məhrumiyyətlər içərisində buraxılmış zərərçəkmişlər olaraq biz öz minnətdarlığımızı bildiririk.

Mərhəmətli Mehriban xanım!     

Bilirdik ki, Prezidentimizdən və Sizdən başqa heç kim bizim dərdimizə əlac etməyəcək. Ona görə də birbaşa Sizə müraciət etmişdik. Sizdən çox xahiş edirik, təvəqqə edirik ki, mərhəmətinizi bizim üstümüzdən əskik etməyin, bizim sözügedən mülki tələbimzə dair Ali Məhkəmədə də qanuni və ədalətli qərar çıxarılmasına köməklik edin.  Biz yalnız Sizə güvənirik. İnanırıq ki, öz mərhəmətiniz və ədalətiniz sayəsində bizə görə Cənab Prezidentimizin verdiyi göstərişin tam həlli üçün köməyinizi əsirgəməyəcəksiniz.

Qadir Allahdan Prezidentimizə, Sizə və dəyərli ailə üzvlərinizə möhkəm can sağlığı, qüdrət və xoşbəxtlik arzulayırıq. 

Qadir Allahdan Ulu Öndərimiz Heydər Əliyevə rəhmət diləyirik!

Hörmətlə, zərərçəkənlər:

 Əhmədov Sübhan Süleyman oğlu_________________

 Cəfərov Mafisəd İltizam oğlu____________________

 Abbasov İlqar Vəlican oğlu______________________

 Əliyev Zəfər Əlisahib oğlu_______________________

 Məmmədli Müzəffər Əli oğlu_____________________

 Şirinbəyova Maral Muxtarpaşa qızı_________________

Abasova Seyranə Şərəfxan qızı_____________________

 İsgəndərov Vidadi Təhlət oğlu_____________________

 Aslanova Nailə Vasif qızı_________________________

Abasov Mahir Ruşan oğlu_________________________

Talıbova Zibeydə Dadaş qızı_______________________

Əliyev Qulamhüseyn Əlihüseyn oğlu_________________

 Abıyev Anar İsrəfil oğlu __________________________

 Səfərov Alim Ərəstun oğlu_________________________

15   yanvar 2019-cu il

Redaksiyanın qeydi: Müraciət ərizəsi vətəndaşların imzaları ilə təsdiqlənib.