Keçmiş baş redaktorun quldurluğu

Bakı Ağır Cinayətlər Məhkəməsində quldurluqda ittiham olunan Xaçmaz rayon sakinləri - 1984-cü il təvəllüdlü Şərifov Azər Əliyar oğlu, 1989-cu il təvəllüdlü Quliyev İlqar Qulam oğlu, 1991-ci il təvəllüdlü Xaliqov Aydın Əlimərdan oğlu və 1983-cü il təvəllüdlü Cəfərov Mikayıl Siyavuş oğlunun məhkəmə istintaqı yekunlaşıb.

Virtualaz.org saytının əldə etdiyi xəbərə görə, hakim Rasim Sadiqovun sədrlik etdiyi prosesdə məhkəmə yolu ilə müəyyən edilib ki, ötən il noyabr ayının 13-də gecə saatlarında A.Şərifov, A.Xaliqov, İ.Quliyev və M.Cəfərov özgənin əmlakını ələ keçirmək məqsədilə Xaçmaz şəhəri, A.Mustafayev küçəsində 77a saylı evin qarşısına gəliblər.

İ.Qulıyev pusquda dayanıb, digər üç nəfər üzlərinə maska keçirərək mənzilə soxulublar. A.Şərifov cibindən bıçaq çıxararq mənzildə olan qadınları - Şahnaz Hacıyeva və Məhəbbət Salmanovanı hədələyib. Hər iki qadına basqın edərək onların pullarını, mobil telefonlarını və qızıl-zinət əşyalarını ələ keçiriblər. Ş.Hacıyevaya 742 manat, M.Salmanovaya isə 1580 manat maddi ziyan vurublar.

Təqsirləndirilən şəxs qismində dindirilən A.Şərifov ona elan olunmuş ittihamla özünü təqsirli bilib. O, əvvəllər “Qanun sədası” qəzetində baş redaktor işlədiyini göstərib: “Son vaxtlar rəsmi olaraq heç yerdə işləmirdim. Taksi kimi istifadə etdiyim maşını kreditə götürmüşdüm. Amma qəza törətmişdim deyə satmaq məcburiyyətində qaldım. Maşını satsam da krediti ödəyə bilmirdim. Maddi sıxıntı içində idim”.

A.Şərifov hadisədən bir neçə gün öncə əvvəllər Bakıda onunla eyniadlı qəzetdə çalışan Yusif adlı şəxslə görüşdüyünü, ondan borc istədiyini açıqlayıb: “Yusiflə təsadüfən “Xəzər” kafesində rastlaşdıq. Ona vəziyyətim kritik həddə çatdığını bildirdim, borc istədim. O, pulu olmadığını, amma mənə köməklik edə biləcəyini dedi. Söhbət əsnasında Yusif mənə bir neçə nəfər tanışının oğurluqla məşğul olduqlarını, məni onlarla tanış etmək niyyətində olduğunu dedi. Əvvəlcə razılaşmasam da sonra razılaşmalı oldum. Yusif telefonla kiməsə zəng vurub kafeyə çağırdı. 10-15 dəqiqə sonra bir nəfər gəlib bizim yanımızda əyləşdi. Yusif həmin şəxsi Aydın kimi təqdim etdi. Ona “Azər etibarlı oğlandır, sizinlə işləmək istəyir” dedi. Aydın heç bir problem olmadığını, iş olanda xəbər verəcəyini deyib getdi.

Bir neçə gün sonra Aydın mənə zəng vuraraq kafeyə çağırdı. Məni Mikayıl adlı şəxlə tanış etdikdən sonra “Mikayıl bir qadın tanıyır, adı Şahnazdır, faizə pul verir, qızıl alveri ilə məşğul olur, onun evinə girmək istəyirik” dedi. Mən də onların təklifini qəbul etdim. Küçədə pusquda dayanmaq üçün isə tanışı İlqara zəng vurub onunla razılığa gəldi.

Bu məqsədlə mağazadan yun papaqlar aldıq ki, hadisə zamanı bizi görüb tanıyan olmasın. Mən öz papağımda göz yerləri üçün deşiklər açdım. Bundan sonra Şahnazın yaşadığı ünvana yollandıq. Amma əvvəlcə kimin nə edəcəyi barədə öz aramızda plan qurduq. Evin yanına çatanda  həyət qapısının açıq olduğunu gördük. İlqar çöldə pusquda dayandı, biz içəri keçdik. Mikayıl özündə olan bıçağı mənə verib “bıçağı çıxart, qoy qorxsunlar, içəridə ancaq sən danışarsan, bizi tanıyarlar” dedi. Bıçağı alıb cibimə qoydum”. 

Təqsirləndirilən şəxs ifadəsini davam etdirərək göstərib ki, hər iki qadını bıçaqla hədələyərək onların qızıl-zinət əşyalarını, pullarını və telefonlarını ələ keçiriblər. Sonra isə qızılları sataraq öz aralarında bölüşüblər.

Təqsirləndirilən şəxslərdən Mikayıl Cəfərov və Aydın Xaliqov onlara elan olunmuş ittihamla özlərini təqsirli bilsələr də İlqar Quliyev bu cinayətdə əli olmadığını deyib.

Zərərçəkmiş şəxs qismində dindirilən Şahnaz Hacıyeva ifadəsində kirayə yaşadığını bildirib: “Həmin evdə 2006-cı ildən yaşayıram. Hadisə baş verən gün ev sahibəsi Məhəbbət Salmanova ilə birlikdə oturub televizora baxırdıq. Həyətyanı giriş qapısı açıq idi. Birdən qəflətən otağa üç nəfər maskalı şəxs daxil oldu. Onlardan biri əyləşdiyim stola təpik vurub məni yerə yıxdı. Cibindən bıçaq çıxarıb dedi ki, səsini çıxarsan, səni öldürəcəm, tez ol qızılların, pulların yerini de.  Ona “nəyim varsa üstümdədir, götürə bilərsən” dedim. O, əl atıb boynumda, qulağımda, barmağımda olan qızıl əşyaları, stolun üstündən isə telefonları götürdü. Digər maskalı isə Məhəbbətin boynundakı qızıl boyunbağını, brilyant üzüyünü, mobil telefonunu və pul qabısındakı 100 manatı götürüb cibinə qoydu. Məni vuran şəxs “bəs sənin pulların hardadır” deyə soruşduqda ona “xalçanın altında 100 manatım var, başqa heç nəyim yoxdur, nəyim varsa, hamısını götürmüsünüz” dedim. Mənə inanmayıb mənzilin altını üstünə çevirdi, yataq dəstlərini, paltarları yerə tökdülər. Bu vaxt Məhəbbət “indi həyat yoldaşım gələcək” dedikdə maskalılardan biri hirslənib onun sifətinə zərbə vurdu. Sonra məni vuran şəxs digərlərinə “skoç gətir, bunların əl-qollarını bağlayaq” dedi. Onlar da deyilənləri elədilər, əl-qolumuzu bağladılar. Bizə “əgər biz çıxana kimi səs-küy salsanız, qayıdıb sizi öldürəcəyik” dedilər.

Onlar evi tərk edəndən sonra əvvəl özümün, sonra da Məhəbbətin əllərini açdım. Daha sonra isə ev telefonu ilə DİN-in 102 xidmətinə zəng vurub hadisə barədə məlumat verdim”.

Məhkəmənin hökmü ilə Azər Şərifov 9 il, İlqar Quliyev 8 il, Aydın Xaliqov və Mikayıl Cəfərov isə 8 il 6 ay müddətinə azadlıqdan məhrum ediliblər.