“Bəşəriyyət üçün incilər yaradanlar”

Bu gün, fevral ayının 13-də Bakı şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) təşkilatçılığı ilə Yasamal rayon Heydər Əliyev Mərkəzində tanınmış publisist-politoloq Reyhan Mirzəzadənin böyük rus klassiklərinin, pedaqoqlarının yaradıcılığından və bəşəriyyət qarşısındakı xidmətlərindən bəhs edən “Rus ədəbiyyatı qəlbimin işığında” və “Bəşəri zəkanın rus dahiləri” kitablarının təqdimatı keçirildi.

Tədbiri giriş sözü ilə Yasamal rayon MKS-inin direktoru Lətifə Məmmədova açaraq, Azərbaycanın Rusiya ilə mədəni və ədəbi əlaqələrindən məlumat verdi. Bu istiqamətdə ulu öndər Heydər Əliyevin apardığı siyasətdən və Azərbaycan Respublikasının Prezidenti İlham Əliyev tərəfindən tarixi ənənənin davam etdirilməsindən danışdı. Azərbaycanın Birinci vitse prezidenti Mehriban xanım Əliyevanı mədəniyyətin hamisi adlandıraraq, onun rus dilinin inkişafında rolunu qeyd etdi.

Rusiyanın Azərbaycandakı Fövqaladə və Səlahiyyətli Səfiri Mixail Boçarnikov iki dövlət və xalq arasında tarixən dost ənənələrinin olduğunu qeyd etdi. Azərbaycanda rus dilinə, rus ədəbiyyatına olan marağı yüksək dəyərləndirdi. Azərbaycan ədəbiyyatının zənginliyi haqqında danışaraq, çoxsaylı əsərlərin rus oxucusu tərəfindən maraqla qarşılandığını bildirdi.

Yasamal rayon İcra Hakimiyyəti başçısının müavini Təravət Muradova çıxışında qonaqları salamladı və Azərbaycan – Rusiya mədəni əlaqələrinin tarixi aspektinə geniş yer ayırdı. Azərbaycan Respublikası Prezidentinin “Latın qrafikalı Azərbaycan əlifbası ilə kütləvi nəşrlərin həyata keçirilməsi haqqında” sərəncamları ilə çoxlu sayda nəşr olunmuş rus klassiklərinin əsərlərindən söhbət açdı.

Millət vəkili Aydın Mirzəzadə çoxəsrlik inkişaf tarixinə malik olan zəngin Azərbaycan ədəbiyyatının başqa xalqların

mədəniyyəti və yaradıcılığına qarşı xoşməramlı olduğunu vurğuladı. O, qeyd etdi ki, Azərbaycan dövlət müstəqilliyini bərpa etdikdən sonra da rus xalqı ilə dostluq münasibətlərini qoruyub saxlayan xalqımız mütərəqqi rus ədəbiyyatı ənənələrinə və onun görkəmli nümayəndələrinin əsərlərinə müraciət edib.

BDU-nun professoru Əsədulla Qurbanov müəllifin yaradıcılığından geniş söhbət açdı, hər iki kitabı böyük tədqiqat əsəri kimi qiymətləndirdi. O, qeyd etdi ki, bu cür əsərlər ali məktəb tələbələrinin dərs vəsaiti olmalıdır.

Türk Xalqları Ümumdünya Konqresinin prezidenti, hüquq elmləri doktoru Yəhya Əliyev Azərbaycan xalqının dünya söz xəzinəsinə verdiyi töhfələrdən danışdı və qeyd etdi ki, xalqımız başqa xalqların ədəbi nailiyyətlərindən də faydalanıb. Məlumat verərək, o bildirdi ki, Kutuzov, Kolçak, Naximovun və s. soyköklərində türkçülük var.

Şair Zakir Ağdamlı tədbirin yüksək səviyyədə təşkil olunduğunu bildirdi və qeyd etdi ki, rus ədəbiyyatı möhtəşəm nümunələr yaradıb, rus klassiklərinin Azərbaycanla bağlılığını qeyd etdi.

Sonda kitabların müəllifi Reyhan Mirzəzadə tədbir iştirakçılarına və bütün qonaqlara dərin minnətdarlığını bildirdi. Naxçıvan MR-da onun üç kitabının nəşr olunması və onların mütaliəsi mütləq olan ədəbiyyat siyahısına daxil olunduğu üçün MR-nın Ali Məclisinin sədri Vasif Talıbova təşəkkür etdi. R.Mirzəzadə qeyd etdi ki, rus klassikləri, şair, yazıçı və pedaqoqlarının yaradıcılığı, onların Azərbaycanla əlaqələri, mədəniyyətlərimizin qarşılıqlı inteqrasiyası bu gün də tarixin səhifələrində öz şərəfli yerini tutur və bunların əsaslı, dərin tədqiqatlarla, habelə gənc nəslə çatdırılması zəruridir.

Tədbir iştirakçıları və qonaqlar tanınmış yazıçı-publisist, politoloq Reyhan Mirzəzadənin ərsəyə gətirdiyi çoxsaylı kitab və məqalələri yüksək qiymətləndirdilər.

Tədbir böyük təmsil ustası, yazıçı, şair, dramaturq, İ.A.Krılovun 250 illik yubileyinə təsadüf etdiyindən, bu mövzu da tədbirdə öz yerini tutdu.

Tədbirdə “Bəşəriyyət üçün incilər yaradanlar” («Немеркнущие классики») virtual fotoalbom nümayiş olundu https://www.youtube.com/watch?v=BPOxnBYJcWI&t=3s

Yasamal rayon 53 №-li tam orta məktəbin şagirdlərinin ifasında “Kalinka” rəqsi, “Million alıx roz” valsı, “Katyuşa” və “Sinyaya veçnost” mahnıları, A.S.Puşkinin, M.Y.Lermontovun, N.A.Nekrasovun şeirləri rus və Azərbaycan dillərində səsləndi, İ.A.Krılovun təmsillərindən səhnəciklər göstərildi.

Təqdimat mərasimində çoxsaylı ziyalılar, şair və yazıçılar, kitabxananın oxucuları iştirak etdi.

Sonda tədbir iştirakçıları ulu öndər Heydər Əliyevin xatirəsini yad edərək, abidəsi qarşısında fotoşəkil çəkdirdilər.