Bərdə stadionuna sığınan iki qız uşağı və tənha ana - FOTO

Kəlbəcər rayon sakini, məcburi köçkün Təranə Cəfərova 3 ildir ki, iki qız uşağı ilə Bərdə şəhər stadionunun müşahidə otağına sığınıb.Ona görə yox ki, futbol həvəskarıdı. Buradan futbola tamaşa eləsin. Onun burada məskunlaşması sadəcə bir məcburiyyətdir.Uğursuz tale onun  bura sığınmasına səbəb olub.

Təranə Kəlbəcərin işğalı zamanı ata,anası, qardaş, bacıları ilə İstisu kəndindən Gəncəyə pənah gətirib. O zaman onun doqquz yaşı varmış.Qaçqınlığın ömrü uzandıqca Təranənin də uşaqlığı qayğılı illərin içində geridə qalıb. Gəncliyinə dolan qız Bərdəyə gəlin köçüb.Ancaq bu ailə həyatı uğursuz olub. Uşaqların atası Taleh Xıdırov övladları Nurtacı, Mədinəni atıb,başqa bir qadını götürüb, Rusiyaya gedib.” Yoldaşım düzgün, normal adam deyildi. Orda,burda günün keçirirdi. Ev-eşiyə baxmırdı. Bir qadını götürüb Rusiyaya apardı.Mən də evdən çıxdım. İki uşaqla burada məskunlaşmışam. Ailə qurduğum adamla nikahımız olmadığına görə əvəllər hökumətdən köçkün müavinəti alırdıq. Ancaq sonradan aldığımız  çörək pulunu dayandırıblar. Hal-hazırda mən məcburi köçkün  statusu  daşıyıram.Uşaqlar da mənim himayəmdədir. Məcburi köçkün müavinətinin dayandırılmasına görə Kəlbəcər rayon İcra Hakimiyyətinin Çıraq kənd nümayəndəsi dedi ki, sən yerli sakinlə ailə qurmusan.Ondan ayrılmağa baxmayaraq yeni qanun sizə çörəkpulu ayrılmasına imkan vermir. Hansı ki, övladlarıma doğum şəhadətnaməsi Kəlbəcər rayon VVAQ şöbəsindən verilib. Onların qayğısına ancaq mən qalıram. Ata nə hüquqi nə də faktiki olaraq ailə başçısı deyil.”  

Təranə Cəfərovaya Kəlbəcər rayon İcra Hakimiyyətinin Çıraq kənd nümayəndəliyindən Bərdə Məşğulluq İdarəsinə iş üçün müraciət etmək tövsiyyə olunub. Bunun üçün məşğulluq mərkəzinə məktub da ünvanlanıb.Məşğulluq mərkəzinə gedən Təranə xanıma “işləmək üçün gərək qeydiyyata durasan, bir il keçə ki, iş tapaq”-deyə cavab verilib. Bu cavabdan məyus olan Təranə Cəfərova  kor peşiman evinə dönməli olub.

Məsələ ilə bağlı Kəlbəcər RİH-nin Çıraq kənd  İnzibati Ərazi Dairəsi üzrə nümayəndəsi İbrahim Mamedov bildirib ki, Təranə Cəfərova həqiqətən də Çıraq kənd sakinidir.Onların ailə vəziyyətindən xəbəri olduğunu deyib.” Təranə Cəfərova Bərdədə stadionda yaşayır. Ailə qurduğu şəxslə nikah bağlanmadığı üçün  Atalığın müəyyən edilməsi qaydasında uşaqlara şəhadətnamə verilib. Atanın yerli sakin olmasına görə 2017-ci il yanvarın birindən onlara verilən köçkün müavinəti Qaçqın və Məcburi Köçkünlərin işi üzrə Dövlət Komitəsinin yeni təlimatına əsasən  dayandırılıb.”

İcra nümayəndəsinin cavabından aydın oldu ki, Təranə Cəfərova və onun iki qız övladına müavinətin dayandılması qanunun tələbi ilə həyata keçirilib.Məşğulluğdan iş almağın da asan olmadığını bildirən İbrahim müəllim bu dəfə də  ünvanlı sosial yardım üçün müraciət etməyi məsləhət bilib.

Ancaq ki, Təranə Cəfərova sosial yardım üçün müraciət etməyin elə də asan olmadığını bildirib. “ Bunun üçün iş yerin olsun gərək. Ya da VÖEN açıb, bir il ayda 3 manat aybaay pul keçirəsən , deyir.”

Məhkəmə yolu ilə atadan uşaqlara aliment təyin olunmasına da ürək eləmədiyini bildirir , Təranə xanım. O keçmiş həyat yoldaşından qorxduğuna görə  bu addımdan çəkindiyini deyir.

Uşaqlarına görə nigaran olan ana övladlarını evdə tək qoyub,işləməyə gedə bilmədiyini deyir.” Uşaqlarımı tək qoyub , bir yana gedə bilmirəm. Yaxında etibar edəcəyim adam yoxdur.Buna görə onları qorumağa, tərbiyyələri ilə məşğul olmağa çalışıram”.

Təranə Cəfərovanın iki qızından birinin adı Nurtac, digərinin adı isə Mədinədir. Nurtac 6-cı sinifdə, Mədinə isə 3-cü sinifdə oxuyurlar.Vaxtlı-vaxtında məktəbə gedir, yaxşı oxumağa çalışırlar.Hiss olunur ki, Təranə Cəfərova onların təhsilinə və tərbiyyəsinə həssas yanaşır.

Təranə Cəfərova qohumlarının yardımı ilə bu balaca darısqal otağı odun sobası ilə qızdırdığını bildirir . İşığa , qaza qalsa öhdəsindən gələ bilmərəm deyir.

Musa Muradlı