“Lider qadınlarının şəbəkəsi”nin yaradılması

29 may 2019–cu il tarixində Binəqədi rayonu Biləcəri qəsəbəsində yerləşən 6 №-li İncəsənət Məktəbində Avropa İttifaqının maliyyələşdirdiyi, BMT-nin İnkişaf Proqramının qismən maliyyələşdirdiyi və icra etdiyi “Genderə həssas Dayanıqlı İnkişaf Məqsədlərinin Həyata Keçirilməsində Vətəndaş Cəmiyyətinin Rolunun Artırılması” proqramı üzrə “Qadınlar Bələdiyyələrin İnkişafı Uğrunda” İctimai Birliyi tərəfindən həyata keçirilən “Dayanıqlı İnkişaf Məqsədlərinin Tətbiqi Vasitəsilə Gender Əsaslı Bələdiyyələrin Təşviqi” layihəsi çərçivəsində “Azərbaycanda 2019-cu ildə keçiriləcək bələdiyyə seçkilərində iştirak edəcək “Lider qadınlarının şəbəkəsi”nin yaradılması” adlı tədbir keçirildi. Layihənin əsas tərəfdaşı Azərbaycan Respublikası Ailə, Qadın və Uşaq Problemləri üzrə Dövlət Komitəsidir.

Görüş tədbiri 6 №-li İncəsənət Məktəbinin müəllim kollektivi və ən istedadlı şagirdlərin hazırladığı musiqili-bədii kompozisiya ilə başladı.

 Tədbirdə giriş sözü ilə Binəqədi rayon İcra Hakimiyyəti başçısının müavini Aygün Əliyeva çıxış edərək, tədbirin mahiyyəti və layihənin vacibliyi haqqında danışdı. O bildirdi ki, bu ilin sonunda ölkədə keçiriləcək bələdiyyə seçkilərində Binəqədi rayonunun sakinləri, xüsusiylə də qadınlar və gənclər bu prosesdə daha aktiv vətəndaş mövqeyini nümayiş etdirməlidirlər.

Daha sonra Azərbaycan Respublikası Ailə, Qadın və Uşaq Problemləri üzrə Dövlət Komitəsinin sədr müavini xanım Sədaqət Qəhrəmanova çıxış edərək 2019-cu il bələdiyyə seçkiləri öncəsi qadınların aktivliyi və bu strukturun idarəçiliyində təmsilçiliyinin vacibliyi haqqında danışdı. Sədaqət Qəhrəmanova qadınların cəmiyyətimizdəki mövqeyini daha da möhkəmlətmək istiqamətində atılan müvafiq addımlar, görülən işlər çərçivəsində təşkil olunan belə tədbirlərdə onları fəallıq göstərməyə çağırıb, həmçinin onların qərarvermə prosesi və yerli özünü idarəetmədə iştirakının artırılması məqsədiylə icra olunan layihələrdə aktiv iştirakın və əməkdaşlığın əhəmiyyətini qeyd etdi. Sonda isə “17 məqsəddən ibarət olan “Dayanıqlı İnkişaf Məqsədləri” anlayışının 5-cisi – “Gender Bərabərliyi” mövzusu yerinə yetirilməzsə, digərlərinin əhəmiyyəti olmayacaq” deyərək, bir daha qadınların qərar qəbuletmə və idarəetmə proseslərində aktiv iştirakının vacibliyinə toxunan Sədaqət xanım çıxışını “Vəzifəyə varlanmaq üçün yox, cəmiyyətdə olan problemləri həll etmək üçün gəlirlər” cümləsi ilə tamamladı.

Görüşdə Binəqədi rayon İcra hakimiyyətinin Ərazi və Yerli özünüidarə orqanları ilə İş şöbəsinin müdiri Ramiz Göyüşov da çıxış edərək, ilk öncə belə bir layihənin ərsəyə gəlməsi və Binəqədi rayonunu da əhatə etdiyi üçün öz təşəkkürünü bildirdi. Şöbə müdiri daha sonra sözlərinə belə davam etdi: “Bələdiyyələr öz iqtisadi və sosial fəaliyyətlərini artırır. Hal-hazırkı dövrdə bələdiyyə strukturlarınında müəyyən qüsurlar olsa da, bunların aradan qaldırılması, eyni zamanda cəmiyyətdə bələdiyyələr haqqında formalaşan mənfi rəyin müsbətə çevrilməsi üçün çalışmalı və səylərimizi artırmalıyıq. Bu mənada o qadınların səlahiyyətləndirilməsi və qərar qəbuletmə prosesində təmsilçiliyinin vacibliyini vurğuladı.

Daha sonra “Qadınlar Bələdiyyələrin İnkişafı Uğrunda” İctimai Birliyinin sədri və “Dayanıqlı İnkişaf Məqsədlərinin Tətbiqi Vasitəsilə Gender Əsaslı Bələdiyyələrin Təşviqi” layihəsinin rəhbəri xanım Lyudmila Xəlilova layihə haqqında ətraflı və dolğun məlumatı özündə əks etdirən təqdimatla çıxış etdi. Layihənin əsas məqsədi “Effektiv və gender yönümlü yerli özünü idarəetmənin təşkili və bələdiyyə idarəçiliyində qadınların rolunun gücləndirilməsidir” deyən Lyudmila xanım məqsədlərə çatmaq üçün qarşıya qoyulan vəzifələr, fəaliyyətlər və əldə olunacaq nəticələr haqqında ətraflı məlumatı auditoriyanın diqqətinə çatdırdı. Layihə koordinatoru eyni zamanda Qadınların seçkilərdə iştirakı və bələdiyyələrdə təmsilçiliyini zəiflədən problemlərə də toxunub.

Həmçinin tədbirdə iştirak edən Azərbaycan Milli Elmlər Akademiyasının şöbə müdiri xanım Rəna Mirzəzadə “Dayanıqlı İnkişaf və yerli idarəetmədə iştirakçılıqda gender amili: müasir çağırışlar” mövzusunda tədbir iştirakçıları qarşısında çıxış edib. İlk öncə belə bir layihənin icra olunmasını çox yüksək qiymətləndirən professor çıxışına bu cür davam etdi: “Bu layihədə görülən işlər və təşkil edilən tədbirlər ona görə əhəmiyyətlidir ki, mövzunun kökündə “Gender”, “Dayanıqlı İnkişaf Məqsədləri” və “Azərbaycan” sözləri var. Məlumdur ki, seçkilər yaxınlaşır və burada iştirak üçün hər bir addım məsuliyyətli olmalı, hər bir qadın həm ailəsinin münasibətini, həm öz öhdəliklərini, həm də ki üzərinə götürəcəyi məsuliyyət haqqında düşünməlidir. 18 yaşı tamam olmuş gənc qızların seçkilərdə iştirak etmək hüququnun olduğunu xatırladan ekspert “Seçkilərdə fəal seçici olub, mütləq səsvermə hüququndan istifadə etməlisiniz” deyərək sözünə yekun vurdu.

Son məruzəçi kimi çıxış edən Bakı şəhər Binəqədi qəsəbə bələdiyyəsinin sədri Aytac Əliyeva  bələdiyyədə təmsilçiliyinin məqsədini və burada görülən işlər, əldə etdiyi nailiyyətlər haqqında bölüşdü -  “Mən qarşıma hədəf qoydum və bu yolda uğur qazandım!” Sonda o auditoriyaya səsləndi: “Əziz xanımlar! Siz də özünüzə inanın və məqsədli olun!”

Tədbirin sonunda iştirakçılarla interaktiv sual-cavab sessiyası aparıldı, eyni zamanda bələdiyyə seçkiləri və idarəçiliyində qadın iştirakçılığını gücləndirən tədbirləri, təklifləri müəyyənləşdirmək məqsədiylə sorğu keçirildi.