İNFORMASİYA MÜHARİBƏSİ ŞƏRAİTİNDƏ MİLLİ MƏTBUATIN QARŞISINDA BÖYÜK VƏZİFƏLƏR DURUR 

12 iyul 2019-u il tarixdə Beynəlxalq Mətbuat Mərkəzində Azərbaycan Respublikasının Pezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə Tətbiqi Tədqiqatlar Fondunun “Ermənistanın Azərbaycana qarşı işğalçılıq siyasətinin  fəsadlarının işıqlandırılması və onların qarşısının alınması yolunda Azərbaycanın mövqeyinin təbliği”  layihəsi çərçivəsində Beynəlxalq Mətbuat Mərkəzində "Ermənistan-Azərbaycan Dağlıq Qarabağ münaqişəsində Azərbaycan həqiqətlərinin dünyaya çatdırılmasında mətbuatın rolu "  mövzusunda seminar keçirilmişdir. Tədbirdə respublikanın KİV-lərinin nümayəndələri, QHT təmsilçiləri, digər ziyalılar iştirak etmişdir.

Seminarda Azərbaycan Respublikasının müasir dövrdə ən ağır problemi olan Qarabağ münaqişəsində milli mətbuatın qarşısında duran vacib problemlər müzakirə edilmişdir. Tədbirdə məruzə ilə çıxış edən İbrahim Əliyev qeyd etdi ki, müasir dövrdə müstəqil Azərbaycan Respublikasının ən ağrılı problemi onun müstəqilliyi yolunda yaradılmış Qarabağ problemidir. Məlum olduğu kimi bu münaqişənin əsası müstəqillik elan olunmamışdan bir qədər əvvəl – 1988-ci ildə qoyulmuşdur. Bu münaqişənin səbəbləri, gedişi, məqsədləri, maraqlı tərəfləri yarandığı gündən dolaşığa salınmış, dünya ictimaiyyətinə onlar barədə yanlış informasiya verilmiş, Azərbaycanın maraqları, onun haqqı tapdalanmış, böyük dünya güclərinin bu münaqişədə oynadığı rol, güddüyü məqsədlər pərdələnmiş, onların cinayətləri ört-basdır edilmişdir.

Münaqişə başlanan gündən Azərbaycan bir neçə istiqamətdə təcavüzə məruz qalmış, bir neçə istiqamətdə mübarizə aparmalı olmuş, öz haqqının müxtəlif istiqamətlərdə sübut etmək məcburiyyətində qalmışdır. Bu istiqamətlərdən biri informasiya cəbhəsi olmuşdur. Münaqişənin başlandığı gündən Azərbaycan informasiya blokadasına salınmış, müxtəlif böhtanların, fitnələrin qurbanına çevrilmişdir. Bu həm də ona görə baş verirdi ki, bu münaqişəni planlaşdıran və həyata keçirən qüvvələr uzun müddət buna hazırlaşmış, onu incə detallarına qədər işləyib hazırlamışdılar. Belə bir pravokasiya qarşısında qalan Azərbaycan cəmiyyəti həmin hadisələrə hazır deyildi. Buna görə də ilk vaxtlar bu təcavüzə, iftiralara cavab vermək, özünün haqlı olduğunu sübüt etmək çox çətin idi.

Seminarda ölkənin tanınmış jurnalistləri Vüqar Rəhimzadə, Umud Rəhimoğlu müasir mürəkkəb şəraitdə Azərbaycan mətbuatının qarşısında duran başlıca vəzifələr, onun problemləri və uğurları barədə danışmış, gələcək fəaliyyət istiqamətlərini qeyd etmişlər.  

Tədbirdə iştirak edən Litvalı jurnalist Riçard Lapaytis Qarabağ münaqişəssi və onun dünyada işıqlandırılması məsələsində mövcud problemlərdən danışdı. Kənardan bir jurnalist kimi onun fikirləri mətbuatın həmin sahədə işlərinə fərqli baxışı görməyə imkan verir.

Məruzələr ətrafında geniş müzakirə aparılmış, dəyərli təkliflər irəli sürülmüşdür. Qeyd olunmuşdur ki, Azərbaycanın mövqeyinin fasiləsiz olaraq dünya ictimaiyyətinə çatdırılması bu müharibədə Azərbaycanın can atdığı uğurun vacib şərtlərindən biridir. Buna görə də həmin fəaliyyətin dərinləşdirilməsinə, daha intensiv şəkildə aparılmasına ehtiyac vardır. Bu sahədə mətbuatın vəzifələri aktualdır və daim təkmilləşdirilməlidir. Hazırkı tədbirdə bu məsələlərin müzakirəsi, bu sahədə yeni imkanların araşdırılması Azərbaycanın informasiya sahəsində ehtiyaclarının təmin edilməsinə öz töhfəsini verir.

Layihənin işçi qrupu