Qalib xalqın yenilməz ordusu

10 noyabr 2020-ci il tarixində imzalanmış üçtərəfli bəyanat Azərbaycanın siyasi tarixində dönüş nöqtəsi oldu. Ali Baş Komandan İlham Əliyevin rəhbərliyi ilə Azərbaycan ordusu qısa müddət ərzində ən çətin döyüş tapşırıqlarını yerinə yetirərək Vətənimizin müdafiəsinə qalxdı. Ordumuz 44 günlük əks-hücum əməliyyatlarını müvəffəqiyyətlə başa vurdu. Beləliklə, Azərbaycan son iki əsrlik tarixində ilk dəfədir ki, müharibədən ərazi itkisi ilə yox, ərazi bütövlüyünü bərpa edərək çıxdı. Şanlı Ordumuzun əldə etdiyi tarixi zəfər dövlət və xalqımızın mənafeyi baxımından xüsusi əhəmiyyət kəsb edir.  Uzun illərdən bəri düşmən tapdağı altında qalmış torpaqlarımızın işğaldan azad edilməsi ilk növbədə Azərbaycan xalqının özünə inamını qaytardı, xalqın öz liderinə, onun gücünə etibarını daha da möhkəmləndirdi.

Azərbay­can dövlətinin Ermənistan – Azərbaycan, Dağlıq Qarabağ münaqişəsini sülh yolu ilə həll etmək istəyi Ermənistanın imitasiyalarla danışıqlardan yayınması, status-kvonu saxlama cəhdləri səbəbindən mümkün olmurdu. Dünyanın aparıcı dövlətləri də, ATƏT-in Minsk qru­pu­nun həmsədri olan dövlətlər də bu münaqişənin ancaq sülh yolu ilə həll edil­mə­si­ni vacib sayırdı...

Azərbaycan sülh qapılarını hər zaman açıq saxladı. Lakin münaqişə 28 ildə həll edilmədi...

Ermənistanın 2020-ci ilin sentyabrın 27-də törətdiyi növbəti hərbi təxribat Azərbaycanın öz torpaqlarının azad edilməsi uğrunda əks hərbi-əməliyyatlara başlamasına səbəb oldu. Əməliyyatların ilk günü Füzuli və Cəbrayıl rayonlarının bir neçə kəndi işğaldan azad edildi. Tezliklə Ermənistanla dövlət sərhədinə qədər torpaqlarımızın işğaldan azad olunması ilə bütün dünya Azərbaycanın gücünü, işğalçı Ermənistanı ən qısa müddətdə məğlub etmək əzmini gördü. Cəbrayılın, Füzulinin, Qubadlının, Zəngilanın, Xocavənd, Xocalı, Laçın, Tərtər rayonlarının kəndlərinin azad olunması, Xudafərində Azərbaycan bayrağının ucaldılması, İranla dövlət sərhədinə nəzarətin tam təmin edilməsi Azərbaycan Ordusunun möhtəşəm zəfərləri kimi tarixə düşdü. Cəbhənin elə bir sahəsi olmadı ki, əsgərlərimiz hücum əməliyyatında ləngisinlər. Elə bir istiqamət olmadı ki, düşmənin müdafiə mövqeləri yarılmasın. Bununla yanaşı, əsas olan odur ki, bu şanlı qələbəni Azərbaycan Ordusunun şəxsi heyəti, əsgərlərimiz, zabitlərimiz, gizirlərimiz qazandılar.

Şuşanın azad olunması isə döyüşlərin kulminasiya nöqtəsi idi. Bütün Azərbaycan xalqı ordumuzdan Qarabağın tacı və incisi olan Şuşanın azad edilməsini gözləyirdi. Ali Baş Komandan İlham Əliyevin noyabrın 8-də Şuşanın azad edilməsini bəyan etməsi Vətən müharibəsində Azərbaycan Ordusunun müzəffər yürüşünün pik nöqtəsi oldu. Şuşanın azad edilməsi ilə Ermənistan, dövlət başçımız cənab İlham Əliyevin diktə etdiyi şərtlərinə uyğun olaraq kapitulyasiya, məğlubiyyət aktına imza atdı.

Dekabrın 10-da keçirilən Azərbaycan Ordusunun Zəfər paradında Prezident, Ali Baş Komandan bununla bağlı deyirdi: "Bu zəfər tarixi zəfərdir. Azərbaycan xalqı bu günü 30 ilə yaxın müddət ərzində gözləyirdi, 30 ilə yaxın müddət ərzində Ali Baş Komandanın əmrini gözləyirdi. Mən dəfələrlə Azərbaycan xalqına müraciət edərkən deyirdim ki, biz daha güclü olmalıyıq və nəyi nə vaxt, necə etmək lazımdır, biz bilirik. Həyat göstərdi ki, vaxtında addımlar atdıq, bütün gücümüzü səfərbər edərək bir dəmir yumruq yaradıb düşmənin başını əzdik. Müharibə dövründə mən deyirdim ki, bizim dəmir yumruğumuz həm birliyimizi, həm də gücümüzü təcəssüm etdirir. Bu dəmir yumruq düşmənin belini qırdı, düşmənin başını əzdi. Bu gün biz qəhrəman xalq kimi bu bayramı qeyd edirik. Azərbaycanın müzəffər Ordusu öz tarixi missiyasını yerinə yetirdi, Ermənistanı məğlub etdi”.

Prezident İlham Əliyevin sərəncamı ilə təsis edilmiş 8 noyabr Zəfər Günü çoxəsrlik Azərbaycan tarixinə qızıl hərflərlə yazılmış parlaq hadisəyə çevrildi. Bu, Ali Baş Komandan İlham Əliyevin, xalqımızın və rəşadətli Ordumuzun qazandığı böyük tarixi zəfərdir.Bu qələbənin nəticəsində Azərbaycan dövləti:

Ermənistanın işğal etdiyi qədim torpaqlarımızı azad edərək işğalçılardan təmizlədi. Ərazi bütövlüyümüzü təmin etdi.

            Qəhrəman Ordumuz hərbi bacarıqlarını və döyüş qabiliyyətini bütün dünyaya sərgilədi.

Ölkədə Xalq-Ordu-İqtidar birliyi daha da gücləndi.

BMT-nin Dağlıq Qarabağla əlaqədar qətnamələrinin həyata keçirilməsi Müzəffər Ali Baş Komandan və Azərabaycan Ordusu tərəfindən təmin edildi.

Hüseyn Hüseynli

Tarix üzrə fəlsəfə doktoru,

BDU-nun Tarix fakültəsinin müəllimi