Virtualaz.org saytı xəbər verir ki, bu barədə Fransanın “Slate” nəşri yazır.
Məqalədə deyilir ki, əgər ordu indiki kimi acınacaqlı vəziyyətdə olmasaydı, Almaniyanın indiki qadın müdafiə naziri Ursula fon der Layen kansler Merkelin yerinə namizəd hesab oluna bilərdi...
Ursula fon der Layen
Hazırda müdafiə naziri ordusunun acınacaqlı vəziyyətdə olmasına görə kəskin tənqid olunur. Baxmayaraq ki, o, müdafiə naziri postuna 2013-cü ildə təyin olunub və alman ordusu hələ ondan əvvəl bu duruma düşmüşdü.
Məqalədə bildirilir ki, alman ordusunun nə dərəcədə bərbad vəziyyətdə olduğunu sonuncu insident bir daha göstərib. Müdafiə naziri İŞİD-ə qarşı İraq kürdlərinə dəstək üçün hərbi-nəqliyyat təyyarəsi ilə Ərbil şəhərinə gedib. Lakin Almaniyanın kürdlərə vəd etdiyi hərbi texnika və təlimatçılar ora gedib çıxa bilməyib. Çünki hərbçilər Ərbilə getmək üçün üç dəfə təyyarəni dəyişməli olublar. Texnikanı aparan “Transall” hərbi-nəqliyyat təyyarəsi isə yanacaq çatışmadığına görə yolda enməli olub.
Bundestaqın müdafiə komitəsinə təqdim olunmuş hesabata görə, alman ordusunda tankların, vertolyotların və təyyarələrin üçdə biri işlək vəziyyətdədir. Məsələn, Almaniya Hərbi-Hava Qüvvələrinin sərəncamında olan 109 “Eurofighter” qırıcısından cəmi 42-i havaya qalxa bilir, qalanları nasazdır və nə vaxt təmir olunacağı məlum deyil. Çünki vəsait yoxdur.
NATO-nun planına görə, əgər Baltik ölkələrinə hərbi təcavüz olsa, bundesver alyansın sərəncamına 60 təyyarə verməlidir. Ancaq alman ordusu buna qadir deyil və müttəfiqlər qarşısında öhdəliklərini yerinə yetirə bilməyəcək.
Bu vəziyyət “soyuq müharibə” dövrü ilə kəskin ziddiyyət təşkil edir. O vaxtlar alman ordusu Qərbi Avropada ən güclü ordu hesab olunurdu.
Hesabata görə, alman ordusunun sərəncamında hazırda cəmi 2-3 işlək vertolyot var, qalanları xarabdır və təmir olunacağı günü gözləyir. Türkiyədə yerləşdirilən “Petriot” sistemlərinə qulluq edən alman əsgərləri isə istirahətsiz xidmət etməyə məcburdur, çünki onları əvəz etməyə heyət yoxdur. Belə misallar yüzlərlədir. Almaniya hazırda hərbi xərclərə ÜDM-in cəmi 1,3 faizini ayırır, hərbi xərclər 2010-cu ildən etibarən hər il azaldılıb, silahlı qüvvələrdə ixtisarlar olub.
Virtualaz.org
