Qəbul imtahanlarında nəzarətçi kimi iştirak etmiş müəllimləri ...

14:50 / 24.01.2014

Strategiya.az TQDK-nın rəsmi saytına istinadən xəbər verir ki, Komissiya 2013-cü ildə ali və orta ixtisas təhsili müəssisələrinə keçirilmiş qəbul imtahanlarında vəzifələrinin öhdəsindən layiqincə gələn nəzarətçi-müəllimlərin təltif olunması ilə əlaqədar yanvarın 24-də tədbir keçirib. Tədbirdə TQDK tərəfindən nümunəvi fəaliyyəti ilə seçilən nəzarətçilər mükafatlandırılıblar.

Hər il ali və orta ixtisas təhsili müəssisələrinə keçirilən qəbul imtahanlarına orta ümumtəhsil müəssisələrindən nəzarətçi qismində cəlb edilmiş müəllimlərin fəaliyyəti qəbul kampaniyası başa çatdıqdan sonra araşdırılır, təhlil edilir və qiymətləndirilir. Bu zaman aşağıda göstərilən parametrlər əsasında araşdırma aparılır: imtahan sənədləri ilə işləmə bacarığı, imtahan texnologiyasını mənimsəmə səviyyəsi, abituriyent auditoriyasını idarəetmə qabiliyyəti, köçürmə hallarına şərait yaratmaması, imtahan rəhbərinin nəzarətçinin fəaliyyətinə dair qiymətləndirməsi və 600-dən yuxarı bal toplamış abituriyentlərin sorğu anketlərində imtahan verdiyi zalın nəzarətçisi haqqında qiymət və rəyləri və.s.

Bu araşdırmanın nəticələri nəzarətçi-müəllimlərin fəaliyyətlərinin stimullaşdırılması, onlarla təşkil ediləcək seminar-məşğələlərin məzmununun və metodunun yenidən işlənməsi, nəzarətçilər bazasının zənginləşdirilməsi və formalaşdırılmasının təkmilləşdirilməsi, növbəti imtahanlar üçün nəzarətçi seçiminin hansı meyarlar əsasında aparılması, orta ümumtəhsil müəssisələrinin imtahanların təşkilində aktiv iştirakının təmin edilməsi baxımından mühüm əhəmiyyət kəsb edir.

TQDK-nın Nəzarətçilər bazasına ümumilikdə 15000-ə yaxın nəzarətçi-müəllim daxildir. 2013-cü ildə keçirilmiş 9 illik ümumi və 11 illik tam orta təhsil səviyyəsi üzrə buraxılış imtahanlarında müvafiq olaraq 10126 nəfər və 7726 nəfər nəzarətçi-müəllim cəlb olunub. Ötən il keçirilmiş qəbul imtahanlarına isə 6105 müəllim cəlb edilib. Onların fəaliyyətinə dair araşdırmanın nəticələrinə əsasən, nümunəvi fəaliyyətinə görə 574 nəzarətçi-müəllimə təşəkkür elan edilib, o cümlədən 26 nəfəri fəxri fərmanla təltif edilib. Köçürməyə və digər qayda pozuntularına yol verən 493 nəzarətçi bazadan xaric edilib.

Qeyd edək ki, TQDK tərəfindən araşdırmanın nəticələri ilə tanış olmaq üçün nəzarətçi-müəllimlərin çalışdığı orta ümumtəhsil müəssisələrinə məktublar ünvanlanıb.

Xatırladaq ki, indiyə qədər TQDK tərəfindən keçirilən imtahanlarda nümunəvi fəaliyyətinə görə fərqlənən 1571 nəzarətçiyə təşəkkür elan edilib, o cümlədən 222 müəllim fəxri fərmanlarla təltif edilib. Bunlardan Bakı şəhərinin 258 saylı məktəbindən 13 nəfər, 13 və 73 saylı məktəblərdən 11 nəfər, 263 və 283 saylı məktəblərdən 10 nəfər, 39, 93, 99, 114, 129, 144, 150, 157, 266, 285, 286, 290 saylı məktəblərdən isə 9 nəfər xüsusi olaraq seçiliblər.

Qəbul imtahanlarında nəzarətçi kimi iştirak etmiş müəllimləri ...

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə