Sona Vəliyeva: “Xocalı soyqırımı bir gündə hazırlanan və baş verən qətliam deyildi” – Fotolar

“Xocalı soyqırımı Azərbaycan xalqının tarixində qanla yazılan səhifədir. Azərbaycanın ən gözəl yurdu olan Xocalı bir gecənin içində yerlə-yeksan edildi. 613 nəfər insan həmin gecədə şəhid oldu. Burada zabit və əsgərlər üz-üzə gəlmədi, dinc sakinlər, əksəriyyəti də qadın və uşaqlar olan insanlar qətlə yetirildi. Tarixdə misli görünməmiş qətliam həyata keçirildi”. Strategiya.az xəbər verir ki, bu barədə “Kaspi” liseyində Xocalı faciəsinin 23-cü ildönümünə həsr olunan tədbirdə çıxışında “Kaspi” Təhsil Şirkətinin təsisçisi Sona Vəliyeva deyib.

S.Vəliyeva Ulu öndər Heydər Əliyevin soyqırıma hüquqi və siyasi qiymət verilməsinə dair səsləndirdiyi “Xocalı soyqırımı bütövlükdə Azərbaycan xalqına qarşı yönələn amansız qətliamdır, eyni zamanda bəşəriyyət tarixində misli görünməmiş üsullarla həyata keçirilən vəhşilik aktıdır” fikirlərini xatırlatdı. S.Vəliyeva məktəbin şagird və müəllimlərinə səslənərək artıq 23-cü ildönümü qeyd olunan faciəni unutmamağı tövsiyə etdi: “Hər başımıza gələn faciənin səbəbi araşdırılarsa növbəti təhlükəsizliyimiz təmin oluna bilər. Hər dəfə bu faciələr doğru-düzgün uşaqlara izah olunarsa, Azərbaycanın yaxın gələcək qurucuları bir də xalqımızın başına bu cür faciələr gətirilməsin deyə ölkəni öz içində təhlükəsizliyini səfərbər edə biləcək bütün imkanları həyata keçirəcək”. 

Təsisçi qeyd etdi ki, Xocalı soyqırımı bir gündə hazırlanan və baş verən qətliam deyildi. Belə ki, Xocalı soyqırımının həyata keçirilməsi üçün plan illərlə hazırlanmışdı: “Bir dövlətin, bir xalqın tarixdə duruş gətirməsi üçün onu şərtləndirən bir sıra amillərdən ən əsası onun milli liderinin olmasıdır. 88-ci ildə Ulu öndərin siyasi bürodan getməsilə Azərbaycan xalqının başına gətirilən faciələrin əsası qoyuldu. O zaman Azərbaycan xalqının hakimiyyət rəhbərliyində belə bir rəsmi şəxs yox idi ki, baş verən hadisələrə reaksiya versin. Ulu öndərin yenidən hakimiyyətə gəlişi Azərbaycanı xilas etdi”. 

S.Vəliyeva qeyd etdi ki, əgər bu gün böyüyən nəslin yaddaşı nə qədər möhkəm olsa və bu hadisələrdən nəticə çıxarmağı bacarsa, gələcəkdə Azərbaycan xalqı təhlükələrlə üzləşməyəcək: “Onların ruhu qarşısında sizin bir soydaş borcunuz var. Nə vaxt bu borcları qaytarmağın yolunu düzgün müəyyənləşdirəcəksinizsə, Azərbaycan xalqının başına heç vaxt belə faciələr gətirilməyəcək”. 

S.Vəliyevanın sözlərinə görə, bu gün dünya mətbuatı Xocalı faciəsi barədə yazsa da, dünyada erməni lobbisi çox güclüdür. Belə ki, bu gün də Azərbaycan həqiqətləri tanınmasın deyə, ermənilər təbliğatın iyrənc formasına əl atırlar: “Biz milli yaddaşımızda erməniyə intiqam hissi ilə yaşamalıyıq. Bu gün Qubada kütləvi məzarlıq var. Bu gün açılan məzarlıq odur. Vaxt gələcək Azərbaycanın hər yerində belə məzarlıqlar tapılacaq. Azərbaycan dövləti bu gün Xocalı soyqırımını dünyaya tanıtmaq üçün təbliğat işləri aparır. Dünyanın 22 ölkəsində Xocalı soyqırımı anılıb. Bir çox ölkələr artıq soyqırımı tanıyır. Ali Baş Komandanın rəhbərliyi ilə bütün dünya ölkələri tərəfindən soyqırımı tanınması üçün təbliğat işləri aparılır”.

Müdafiə Nazirliyinin mənəvi, psixoloji hazırlıq və ictimaiyyətlə əlaqələr İdarəsinin rəis müavini, polkovnik Abdulla Qurbani şagirdlərə ölkəmizin milli qəhrəmanları kimi igid, cəsur, döyüşkən olmağı tövsiyə etdi.

Ermənilərin törətdiyi vəhşiliklərin analoqunun olmadığını bildirən general Dadaş Rzayev “Biz heç vaxt bu faciəni yaddan çıxarmamalıyıq” - deyə səsləndi. “Əgər Ali Baş Komandan əmr versə ki, Azərbaycan torpağı azad olunsun, bu torpaqlar mütləq azad olunacaq. Mən əminəm ki, qüdrətli ordumuzun köməyi ilə biz torpaqlarımızı geri alacağıq”. 

Milli Qəhrəman Ramil Səfərov şagirdlərə hər zaman və hər yerdə vətənimizi, ölkəmizi qorumağı, adını uca tutmağı tövsiyə edərək, onları bu yolda bir an olsun belə geri durmamağa səslədi: “Xocalı faciəsi barədə əsərlər yazılıb, filmlər çəkilib. Bu faciəni anlatmaq üçün hər kəs öz üzərinə düşən vəzifəni yerinə yetirməlidir.   

Tədbirin bədii hissəsində şagirdlər tərəfindən Xocalı hadisələrini xatırladan, həmçinin vətənpərvərlik ruhunda maraqlı səhnəciklər – “Xocalıda son gün”, “Cənab Leytenant” tamaşaları göstərildi, “Ağlama şəhid balası”, “Çəkin Qarabağdan qara əlləri” şeirləri səsləndi. “Sarı gəlin” rəqsi ifa olundu, “Çırpınırdı Qara dəniz” mahnısı xor şəklində səsləndi. 

Müdafiə Nazirliyinin Silahlı Qüvvələrinin Mahnı və rəqs ansamblı, Zaur Rzayev və Bəyimxanım Vəliyeva tədbirə öz töhfəsini verdi. 

Tədbirin sonunda “Kaspi” liseyinin direktoru Tural Əliyev gələn qonaqlara və şagirdlərə öz təşəkkürünü bildirdi və hər kəsi liseyin şagirdləri tərəfindən “Xocalı soyqırımı”na aid çəkilmiş rəsmlərdən ibarət sərgiyə baxmağa dəvət etdi.