Düşmənlə bir yataqda...-Fotolar

Layihə: Bu kino ki, var...

Düşmən yalnız avtomatla döyüşdüyün, hər an hücumuna hazır olduğun kəs deyil. Düşmən hər gecə səni “sevən” və ya səni sevməyə məcbur edən kəs də ola bilər…

1991-ci ildə yazıçı Nensi Praysın eyniadlı romanı əsasında çəkilmiş “Düşmənlə yatmaq” filmi işıq üzü görür.

Ən yaxşı filmləri 90 –cı illərə təsadüf edən Culiya Roberts filmdə baş rolu oynayır.  

Triller janrında çəkilmiş “Düşmənlə bir yataqda” filmi ilk səhnələrdən hadisələrin çox melodik cərəyan edəcəyini vəd edir.

Dəniz, gənc və ehtiraslı cütlük, dəniz sahilində yerləşən böyük ev, qağayılar, gözəl musiqi və...

Və yalnız sonrakı dəqiqələrdə bu səhnənin pərdəsi açılır və əsl problem bütün incəlikləri ilə birgə üzə çıxır – tiran ər tərəfindən zorakılığa məruz qalan gənc həyat yoldaşı...

Bu səhnə hər şeyi məhv edir – o qağayıların cəh-cəhini də, o gözəl dənizi, o gözəl musiqini də...

Lora əri Martinin quludur - pəncərədən boylanmaq olmaz, şam yeməyini gecikdirmək olmaz, dəsmallar, şkafın içindəki bankalar - hər şey səliqə ilə yığılmalı, bir sözlə, qaydasında olmalıdır. Hətta məhəbbətlə məşğul olmağın vaxtını da Martin özü müəyyənləşdirir, ancaq bu məhəbbətdən savayı hər şeyə bənzəyir. Lora isə hər dəfə yalandan həmin an razı, xoşbəxt olduğunu sübut etmək məqsədilə gülümsəyir.

Nəzərə alsaq ki, qadın  üçün məcburi “məhəbbət”dən pis şey yoxdur...

Lora səhv edə bilməz, etmir də. Çünki hər növbəti səhv yaxşıca döyülmək deməkdir. O isə bundan qorxur. Ən dəhşətlisi və gülməlisi isə Martinin hər növbəti zorakılığından sonra arvadına hədiyyələr etməsidir. Beləliklə, “qızıl” qayda: döymək, sonradan könlünü almaq...

Lakin ərindən gizli üzgüçülük dərslərinə gedən Lora elə dənizin köməyilə ərindən xilas olmağın yolunu düşünür. Artıq hər şeyə son qoymağın vaxtı gəlib çatmışdı. Uğursuzluğa düçar olsa belə, itiriləsi heç nə yox idi daha... Bütün cəsarətini toplayan Lora öz ölümünü uydurur...

Beləcə, dənizdə fırtına zamanı Loranın üzməyi bacarmadığını düşünən Martin həyat yoldaşının öldüyünə inanır.

Martin arvadını itirdiyini düşündüyü gecə, Lorq başında parik avtobusla yeni həyata başlamaq üçün dabanına tüpürüb içində qorxu, həyəcan və azad olmaq hissi ilə qaçırdı...

• Onunla neçə müddət yaşamısan?
• 3 il, 7 ay, 6 gün...

Beləcə, Lora yeni həyata başlayır – yeni evdə, yeni adla, yeni saçla... Ayova ştatında hər şey yenidən başlamalı idi. Psixi xəstə olan ərindən çox-çox uzaq olmasına baxmayaraq, Lora keçmiş vərdişlərdən, qorxudan tam xilas olmamışdı. Lakin burada tanış olduğu və kollecdə dram dərsləri deyən qonşusu Ben onun sağalmasını sürətləndirir... Loraya yenidən ürəkdən gülməyi, sevinc hissi yaşamağı, sevməyi öyrədir. Bunun üçün isə böyük villa, böyük pullar gərək deyildi.

Qadını böyük villa və böyük pullar xoşbəxt etmir, qadını onu sevən, incitməyən, anlayan biri xoşbəxt edir...

Filmin sonlarında keçmiş yenidən Loranı təqib etməyə başlayır. Despot və ruhi xəstə olan ərinə görə Lora anası ilə belə gizlindən görüşməli olurdu. Martin arvadını sağ olduğunu öyrənmişdi, onun yerini isə Loranın xəstə anasından öyrənir...

Bəzən yeganə çarə elə ölümdür. Filmin son səhnəsində əlində Martinin pistoletini ona tuşlayan Lora polisə zəng edir: “Mən elə indicə qulduru öldürdüm” – deyib atəş açır...

Hollivudsayağı səhnələr və sonluğun yer aldığı film, hər bir halda, Culiya Robertsin ən uğurlu filmlərindəndir. Aktrisa bu filmdə zorakılığa və psixiki təzyiqlərə məruz qalmış qadın rolunu mükəmməl canlandırır.

Təəssüf ki, bu cür ailə modeli hər bir dövr və məkan üçün keçərlidir. Ancaq bu film hər bir qadını qəddarlığa boyun əyməməyə və mübarizəyə səsləyir.

Hər bir qadın anlamalıdır ki, çıxış yolu dözmək deyil, azad olmaqdır.../1937.az/