«İki sahil» qəzeti Neftçilər Gününə həsr olunmuş Xüsusi buraxılış hazırlayıb

20 sentyabr- Neftçilər Günündə işıq üzü görən 200 səhifəlik Xüsusi buraxılış Azərbaycanın neft-qaz  sənayesinin 21 ildə keçdiyi inkişaf yolunu əks etdirən maraqlı yazıları, rəngli  şəkilləri və yüksək  poliqrafik tərtibatı ilə diqqət çəkir.

21 illik tarixi yol  «Əsrin müqaviləsi»nin müstəqil Azərbaycanın qarşısında hansı  iqtisadi və siyasi imkanları açdığına işıq salır, qarşıdakı illər barədə aydın təsəvvür formalaşdırır. Ulu öndər Heydər Əliyevin siyasi kursunu uğurla davam etdirən Prezident İlham Əliyevin qeyd etdiyi kimi, 1994-cü ildə «Əsrin müqaviləsi» imzalanmasaydı, bu gün Azərbaycanın iqtisadi imkanlarının və beynəlxalq münasibətlər sistemində yeri və rolunun hansı səviyyədə olduğunu təsəvvür etmək çətin deyil.     1994-cü il sentyabrın 20-də   ümummilli lider  Heydər Əliyevin  qətiyyəti sayəsində  Xəzər  dənizinin  Azərbaycana  aid  hissəsində  yerləşən  «Azəri-Çıraq-Günəşli» yataqlarının neft-qaz sərvətlərinin  birgə  işlənməsinə  dair  nüfuzlu  xarici  şirkətlərlə  Azərbaycan  Respublikası  Dövlət Neft Şirkəti  arasında  imzalanan, tarixə «Əsrin müqaviləsi» kimi daxil olan  bu mühüm saziş Azərbaycanın iqtisadi imkanlarının təqdimatında, dünya iqtisadi sisteminə inteqrasiyasında əhəmiyyətli rol oynadı. Xüsusi buraxılışın ana xəttini təşkil edən bu inkişaf fonunda keçmişə nəzər salmağa bir zərurət duyulur. 

Ölkə iqtisadiyyatının inkişafında neft amilinə yüksək dəyər verən ulu öndər Heydər Əliyev Azərbaycanın malik olduğu təbii resurslardan səmərəli istifadəni qarşıya mühüm vəzifə kimi qoymuşdur. Xüsusi  buraxılışın üz qabığında dahi şəxsiyyət  Heydər Əliyevin «Neft-Azərbaycanın ən böyük sərvəti olub, xalqa, özü də təkcə indiki nəslə deyil, həm də gələcək nəsillərə mənsubdur» fikrinin yer alması təbii ki, bu məqsədin fonunda Azərbaycanın hansı uğurlara imza atdığını daha aydın şəkildə təqdim etməyə əsas yaradır.
 Sonrakı səhifədə  Ümummilli Liderin gələcəyə inamını əks etdirən   «Əsrin müqaviləsi» ilə  qoyduğumuz  təməl XXI  əsrdə Azərbaycan xalqının inkişafı,  firavan həyatı, müstəqil Azərbaycan dövlətinin suverenliyinin  daha da möhkəmlənməsi üçün  gözəl imkan yaradacaq. İnanıram ki,  XXI əsr  Azərbaycan dövləti üçün ən xoşbəxt dövr olacaq»  fikrinin davamı olaraq  möhtərəm Prezidentimiz İlham Əliyevin «Ölkədə  çox güclü  sosial siyasət aparılır, işsizliyə qarşı  mübarizə güclənir, yoxsulluq azalır. Sənaye potensialımız və qeyri-neft sektoru  inkişaf edir.  Bütün bu uğurların təməlində  birmənalı deyə bilərəm ki, 1994-cü ildə imzalanmış «Əsrin kontraktı» dayanır»  tezisi öz əksini tapıb. Bu tezis neft siyasətinin məntiqi davamı kimi dəyərləndirilən qeyri-neft sektorunun inkişafının, bir sözlə, iqtisadiyyatın  şaxələndirilməsinin  dövlət siyasətində əsas yer tutduğunu bir daha təsdiqləyir. Təbii ki, bu da ulu öndər Heydər Əliyevin neft gəlirlərindən səmərəli istifadə etmək məqsədilə   yaradılmasına böyük zərurət duyduğu və Fərmanı əsasında yaradılan Dövlət Neft Fondunun   vəsaitlərinin təyinatı üzrə  xərclənməsindən irəli gəlir. Məhz bu əsasda möhtərəm Prezidentimiz İlham Əliyev Dövlət Neft Fondunu şəffaflıq kriteriyaları  üzrə nümunəvi qurum kimi dəyərləndirir. 

Neft strategiyasının uğurla həyata keçirilməsində neftçilərin əməyi dövlətimiz tərəfindən hər zaman yüksək dəyərləndirilib.  Məhz ulu öndər Heydər Əliyevin 16 avqust 2001-ci il tarixli Fərmanı ilə Neftçilər Gününün təsis  edilməsi, hər il 20 sentyabr  ərəfəsində neçə-neçə  qabaqcıl neftçinin yüksək dövlət mükafatları ilə  təltif edilməsi  cəmiyyətimizin avanqard qüvvəsi olan neftçilərin əməyinə verilən qiymətin, onlara diqqətin bariz nümunəsidir. Bu fikir SOCAR-ın prezidenti, Milli Məclisin deputatı Rövnəq Abdullayevin  Neftçilər Günü münasibətilə təbrikində də əksini tapıb. Təbrikdə deyilir ki,  sevindirici haldır ki,  neftçilərimiz  dövlət və xalq qarşısında  böyük məsuliyyət və cavabdehlik   daşıdıqlarını  heç zaman unutmur, ölkəmizin sosial-iqtisadi  həyatında yaxından  iştirak edir,  əzmlə çalışır, xalqımızın rifah halının yüksəlişi naminə əllərindən gələni əsirgəmir, göstərilən  yüksək etimadı  əməli fəaliyyətləri ilə doğruldurlar. Onların fədakar  əməyi dövlətimiz  tərəfindən həmişə yüksək qiymətləndirilir.   Xüsusi buraxılışda dövlət başçısı İlham Əliyevin 18 sentyabr  2015-ci il tarixli «Azərbaycan Respublikasının neft sənayesi işçilərinin təltif edilməsi haqqında», «Azərbaycan Respublikasının neft sənayesi işçilərinə fəxri adların verilməsi haqqında», «Azərbaycan Respublikası Prezidentinin fərdi təqaüdünün verilməsi haqqında» sərəncamları yer alıb. 

Azərbaycan  Respublikası  Dövlət  Neft  Şirkətinin  prezidenti  Rövnəq  Abdullayevin  Azərbaycanın  neft  sənayesi  işçilərinə  bayram  təbrikində o da  bildirilir ki, Azərbaycan neftçiləri hər il bu günü böyük əmək nailiyyətləri, sonsuz  iftixar və  qürur hissi il qarşılayırlar.  Ötən illərdə qazanılmış nailiyyətlər  respubilkamızın  iqtisadi qüdrətini daha da   artırmış,  beynəlxalq nüfuzunu gücləndirmişdir. Neftçilərimiz bu gün də öz şanlı ənənələrinə  dönməz sədaqət nümayiş etdirirlər. Onlar  Azərbaycanın tükənməz  təbii potensialının daha geniş həcmlərdə  reallaşmasına, Xəzərin milli sektorunda  hasil olunacaq enerji ehtiyatlarının Avropa bazarlarına çıxarılmasına əlverişli imkan yaradacaq möhtəşəm bir layihənin- Cənub Qaz Dəhlizi layihəsinin həyata keçirilməsində  mühüm rol oynayırlar.

Təbrikdə  qeyd edilir ki, Azərbaycan  neft sənayesinin  flaqmanı, regionun öncül şirkəti olan SOCAR dünya bazarlarında da  mövqeyini möhkəmləndirir, inamla irəliləyir.  SOCAR artıq üzünü  gələcəyə tutan  müasir, innovativ, modern, çevik, transmilli şirkətlərlə  bir sırada dayanan sənaye kompleksinə çevrilmişdir.  Şirkət  beynəlxalq neft və  qaz layihələrində  ölkəmizi ləyaqətlə  təmsil edir, müstəqil işlədiyi yataqlarda  müvəffəqiyyətlə  çalışır.  Bütün bunlar onu deməyə əsas verir ki,  o, indi  istehlakçılar üçün  həmişə olduğundan daha etibarlı tərəfdaşdır. Təbrikdə bu inam da ifadə edilir ki,  gələcəkdə çox mühüm layihələr həyata keçirəcək, yeni-yeni zirvələr fəth edəcəyik.

Xüsusi buraxılışda dövlətimizin başçısı İlham Əliyevin «…Bizim bərabər həyata  keçirdiyimiz  böyük layihələr bu gün dünya enerji xəritəsinə yeni çalarlar gətirmişdir.  İndi bölgəni  birgə icra etdiyimiz  layihələrsiz təsəvvür etmək mümkün deyildir.  2006-cı ildə  Bakı-Tbilisi-Ceyhan neft, 2007-ci ildə Bakı- Tbilisi-Ərzurum qaz kəmərləri Avropanın enerji  xəritəsini böyük dərəcədə dəyişmişdir. Bu gün  biz yeni böyük tarixi əhəmiyyəti olan TANAP layihəsinə də  start veririk.  Əminəm ki, TANAP layihəsi eyni uğura nail olacaqdır. Bakı-Tbilisi-Ceyhan, Bakı-Tbilisi-Ərzurum layihələri kimi   TANAP layihəsi də  vaxtında və keyfiyyətlə icra ediləcəkdir» fikirlərinin yer alması da səbəbsiz deyil. Bu fikirlər «Əsrin müqaviləsi»nin növbəti layihələrə yol açdığını bir daha nümayiş etdirir.     

SOCAR-ın prezidenti R.Abdullayevin «Azərbaycanın qalibiyyətli  enerji strategiyası  qlobal  inkişafa mühüm töhfələr verir» yazısında  qeyd edilir ki, ulu öndər Heydər Əliyevin Azərbaycanın  sürətli inkişafına  yönəlmiş hərtərəfli, müdrik  siyasətinin  möhtərəm Prezidentimiz İlham Əliyev tərəfindən uğurla davam etdirilməsi nəticəsində  Azərbaycan artıq  bütün dünyada  etibarlı tərəfdaş, qlobal  enerji təhlükəsizliyi sistemində  əvəzolunmaz yeri olan bir ölkə kimi tanınır. Dünya iqtisadiyyatına sürətlə  inteqrasiya olunan respublikamız bu gün də  Xəzərin enerji  daşıyıcılarının beynəlxalq bazarlara  nəql edilməsi istiqamətində  möhtəşəm layihələr həyata keçirir.

Xüsusi  buraxılış ümumilikdə  Azərbaycan  Respublikası  Dövlət  Neft  Şirkəti  strukturlarının  fəaliyyəti, onların  əlamətdar  günü - neftçilərin  peşə  bayramını  hansı  nailiyyətlərlə qeyd etməsi və qarşıda hansı vəzifələrin dayandığı   barədə  dolğun  təəssürat  yaradır.  Şirkətin  birinci  vitse-prezidenti, akademik   Xoşbəxt  Yusifzadənin «Ömrümüzə yazılan gün», iqtisadi məsələlər üzrə vitse-prezident Süleyman Qasımovun ««Əsrin müqaviləsi»ndən ötən hər il Azərbaycanın  neft-qaz sənayesində böyük təntənə ilə qeyd  edilir»,  sərmayələr və marketinq üzrə vitse-prezident Elşad Nəsirovun «Sərmayələrdən səmərli istifadə  SOCAR-ın  beynəlxalq əməkdaşlıq əlaqələrinin  inkişafını şərtləndirir», emal üzrə vitse-prezident David Məmmədovun «Azərbaycan Dövlət Neft Şirkətinin neft-qaz emalı və neft-kimya  sənayesinin uğurları»,  vitse-prezident Mikayıl İsmayılovun ««Əsrin müqaviləsi» xalqımızın sosial rifahının təminatçısıdır», sosial məsələlər üzrə vitse-prezident Bədəl Bədəlovun «Neftçilərin sosial müdafiəsinin gücləndirilməsi prioritet məsələlərdəndir», kadr, rejim və informasiya texnologiyaları üzrə vitse-prezident Xalik Məmmədovun «SOCAR-da beynəlxalq standartlara uyğun yeniliklər tətbiq  olunur»,  neftin, qazın hasilatı və nəqli üzrə vitse-prezident Rəhman Qurbanovun ««Əsrin müqaviləsi»ndən ötən dövrdə  neft-qaz hasilatının həcmi artıb, ixrac imkanları daha da  genişlənib», ekologiya üzrə vitse-prezident Rəfiqə Hüseynzadənin «SOCAR-ın il ərzində  neft-qaz sənayesində  ekoloji təhlükəsizliyin təmin olunması istiqamətində  fəaliyyəti», strateji inkişaf  üzrə vitse-prezident Tofiq Qəhrəmanovun «SOCAR: Strateji məqsədimiz  dövlətin güclənməsi  və xalqın rifahıdır»,  Azərbaycan Neft və Qaz Sənayesi İşçiləri Həmkarlar İttifaqı Respublika Komitəsinin sədri Cahangir Əliyevin «Neftçilərin səmərəli  istirahəti,  sosial müdafiəsinin təşkili  başlıca  məqsədimizdir»,  «Azneft» İstehsalat Birliyinin  baş  direktoru  Daşqın İskəndərovun « Neft və qaz hasilatına dair dövlət tapşırıqları vaxtından əvvəl və artıqlaması ilə  yerinə yetirilir», «Azəriqaz» İB-nin baş direktoru Əkbər Hacıyevin ««Azəriqaz» İB neftçilərin  peşə bayramı gününü böyük nailiyyətlə qarşılayır», «Azərikimya» İstehsalat Birliyinin  Müşahidə Şurasının sədri Muxtar Babayevin «Azərikimya»da  yeni layihələrin  həyata keçirilməsi ilə bağlı  işlər davam  etdirilir»,  Kompleks Qazma İşləri Trestinin müdiri İskəndər  Şirəlinin «Yeni quyuların qazılmasında  ən müasir texniki və texnoloji  yeniliklərdən istifadə  edilir»,  «Neftqaztikinti» Trestinin müdiri Mirkazım Abasovun  «Neftqaztikinti» Tresti 2015-ci ilin I yarımilliyini yüksək istehsal göstəriciləri ilə  başa vurub», Heydər Əliyev adına Neft Emalı  Zavodunun direktoru Elman İsmayılovun «Ümummilli lider  Heydər Əliyev  zavodumuzun inkişaf tarixinin müəllifidir»,
Geofizika və Geologiya İdarəsinin rəisi Vaqif Abdullayevin «Geofizika və Geologiya İdarəsinin uğurları», Sərmayələr İdarəsinin rəisi Vaqif Əliyevin «Sərmayələr İdarəsi «Əsrin müqaviləsi»nin qarşıya qoyduğu vəzifələri  şərəflə yerinə yetirir», Neft Kəmərləri İdarəsinin rəisi Vasif Əmirovun «Neftin emal və ixraca nəqli yüksək səviyyədə və təhlükəsiz şəkildə  təmin edilir», Marketinq və İqtisadi Əməliyyatlar İdarəsinin rəisi Ədnan Əhmədzadənin «Neft və qaz sənayesinin inkişafı Marketinq və  İqtisadi  Əməliyyatlar  İdarəsinin fəaliyyət kursunu müəyyənləşdirən başlıca amillərdir», «Neftqazelmitədqiqatlayihə» İnstitutunun direktoru Fəxrəddin İsmayılovun ««Neftqazelmitədqiqatlayihə» İnstitutu ölkə neftçilərinin peşə bayramı ərəfəsində»,  Nəqliyyat İdarəsinin rəisi  Elçin Zülfüqarovun «SOCAR-ın struktur bölmələrinə  beynəlxalq standartlara uyğun nəqliyyat  xidməti göstərilir»,  «Qaz İxrac» İdarəsinin rəisi  Qağaməli  Seyfullayevin «Təbii qaz həcmlərinin səmərəli idarə edilməsi nailiyyətlərin əsasıdır», İnformasiya Texnologiyaları və Rabitə İdarəsinin rəisi İlham Aslanovun «İnformasiya-kommunikasiya  texnologiyalarının  inkişafı Azərbaycanı  fərqləndirən  cəhətlərdən biridir»,  Qaz Emalı Zavodunun direktoru Aqşin Paşayevin «Əsrin müqaviləsi» iqtisadi yüksəlişin başlanğıcı», Təhlükəsizlik İdarəsinin rəisi Rəşad Əliyevin «Təhlükəsizlik tədbirlərinə xüsusi önəm verilir»,  Sosial İnkişaf İdarəsinin rəisi Qasım İbrahimovun «İdarəmiz sosial yönümlü Dövlət Proqramlarının icrasında fəal iştirak edir», Ekologiya İdarəsinin rəisi Azər Əliyevin «Neft strategiyasının icrasında ətraf mühitin mühafizəsi  prioritet məsələdir»,  Təlim, Tədris və Sertifikatlaşdırma İdarəsinin rəisi Fuad Süleymanovun «Təlim, Tədris və Sertifikatlaşdırma İdarəsi verilən tapşırıqları layiqincə  yerinə yetirir»,  Heydər Əliyev adına Bakı Dərin Özüllər Zavodunun direktoru Ayaz Qarayevin «Yeni neft-qaz strategiyası gələcəyə böyük inam yaradır»,  Dalğıc və Qəza-Xilasetmə İşləri İdarəsinin rəisi Pənah Həsənovun «Dalğıc işi böyük məsuliyyət tələb edir», Əmək Şəraiti Normalarının İşlənməsi İdarəsinin rəisi Telman Məhəmmədovun «İşlər müasir tələblərə və beynəlxalq standartlara uyğun qurulur»,  «Neftçi İdman Klubu» İctimai Birliyi İdarəetmə Aparatının rəhbəri,   MOK-un İcraiyyə Komitəsinin üzvü Sadıq Sadıqovun «İlk Avropa Oyunlarında  böyuk qələbəyə  imza atdıq»  və «İki sahil» qəzetinin baş redaktoru, Əməkdar Jurnalist  Vüqar Rəhimzadənin «Azərbaycanın iqtisadi və siyasi  inkişafı «Əsrin müqaviləsi»ndən başlanmışdır» məqalələrində «Əsrin müqaviləsi»nin imzalanmasından sonra ölkəmizin neft-qaz sektorunda   əldə  olunan uğurlar, onların fonunda qeyri-neft  sektorunun inkişafına yönələn addımlar geniş şəkildə təhlil edilir.

Xüsusi buraxılış ulu öndər Heydər Əliyevin «Azərbaycanın  böyük neft və qaz sərvətlərinə malik olması bizim xalqımızın xoşbəxtliyidir və bu gün üçün, gələcək üçün, xalqımızın   yaxşı yaşaması üçün, ölkəmizin inkişaf etməsi üçün ən əsas amildir» fikri ilə tamamlanır. Bütun bu uğurlar gələcəyə daha böyük inamla baxmağa, yeni-yeni hədəflərə əsas yaradır.