TƏLƏBƏ VƏ VALİDEYNLƏRDƏN SƏRT CAVAB: NƏ BAŞ VERİR?!

Strategiya.az saytına bir sıra valideyn və tələbələr adından müraciət daxil olub. Müraciətə heç bir düzəliş etmədən olduğu kimi diqqətinizə çatdırırıq:

Anadolu Universitetinin tələbə və valideyn heyəti  olaraq bir araya  gəlib son zamanlar mətbuatda  Anadolu Universiteti haqqında yayılan söz söhbətlərə cavab vermək istəyirik. Minlərlə tələbələr və valideynlər olaraq yayılan əsassız söz söhbətlərdən  çox qəzəblənərək və  “artıq bəsdir” deyərək, bu “qara təbliğat”ı aparanların cavabını hüquqi yolla vermək qərarına gəlmişik. Bu “qara təbliğat”ın kimlər tərəfindən edildiyindən  xəbərdarıq! (gələn yazımızda açıqlıyacağıq).  Biz bu qara piarı həyata keçirənlərin qərəzli olduğunu, bəzi saytlardan (faktlara əsaslanaraq yazılanlardan) və dəyərli insanlarla görüşlərdən sonra əldə etdiyimiz faktlar əsasında  əmin olmuşuq. Mətbuatda yayılan xəbərlərdə bildirilir ki, guya biz tələbələr  narazıyıq. Cəmi iki tələbənin şikayətini bizlərin də adı ilə hallandıraraq haqqımıza giriblər. Və bizlər buna heç vaxt biganə qala bilmərik, baş verənlərə hüquqi qiymət verilməsi üçün məhkəməyə müracət edəcəyik, o iki tələbə və onları bu işə sövq edən havadarları öz cəzasını məhkəmə qarşısında alacaqlar. O iki tələbə dediyimiz Ceyhun Səməd oğlu Qədimov və Məhəmməd Vaqif oğlu Əsgərovdur.
Araşdırmamız  nəticəsində məlum oldu ki, Ceyhun Qədimov 2009-2010-cu tədris ilində Anadolu Dövlət Universitetinə distant təhsil üzrə “İşletme ” fakültəsinə daxil olub. 2013-2014-cü tədris ilinə qədər təhsil alsa da 4 il ərzində 1-ci kursu başa vura bilməyib. 2014-cü ildən passiv tələbədir, yəni öhdəliyində olan dərslərini oxuya bilməməsi səbəbindən 2014-cü ildə təhsilini dondurub. Ceyhun Qədimov təhsil aldığı müddətdə təhsil haqqını  “ Avrasiya İnnovasiya İnstitutu ” İctimai Birliyinin ( QHT ) tərəfdaş qurumu vasitəsi ilə ödəyib. Onun “Anadolu Vizyonu Kurs Destek ve Turizm Sanayi Ticaret Anonim Şirketi”nin Azərbaycan Respublikasındakı Nümayəndəliyi ilə hüquqi müstəvidə heç bir əlaqəsi olmayıb.
Məhəmməd Əskərov isə 2014-2015-ci tədris ilində Anadolu Dövlət Universitetinə distant təhsil üzrə “Konaklama İşletmeçiliği” fakültəsinə daxil olub və qeydiyyatdan keçərək təhsil haqqını şəxsən özü bank vasitəsi ilə Anadolu Dövlət  Universitetinin müəyyən etdiyi xaricdəki hesabına ödəyib və onun da göstəriciləri qeyri-kafidən də aşağı olub. 1-ci kursu başa vura bilməyib. Biz tələbələrin adından istifadə etdikləri üçün, halbuki cəmi iki nəfər olduğu halda, onun biri də heç aktiv tələbə olmadığı  təqdirdə, digər minlərlə tələbənin adından danışaraq haqqımıza girdikləri üçün onları məhkəməyə verəcəyik. Belə üzdəniraq 2-3  “tələbənin” Anadolu Dövlət  Universitetində Azərbaycanda yaşayan Türkiyə, Azərbaycan və digər ölkə vətəndaşları olan biz tələbələrin (Qeyd edək ki, Azərbaycandan distant formada təhsil alanlar  yalnız Azərbaycan vətəndaşları deyil)  adından danışmaqlarına heç kim səlahiyyət verməyib.
Məlumat üçün onu da bildiririk ki, Türkiyə Respublikasının Anadolu Dövlət Universiteti Türkiyədə və dünyanın müxtəlif ölkələrindəki 2 milyona yaxın tələbəsinə, o cümlədən Azərbaycandan distant formada təhsil alan tələbələrinə İnformasiya Kommunikasiya Texnologiyaları (İKT )  vasitəsi ilə distant  formada təhsil almaq imkanı yaradır.  Buna görə də  Universitetin  Türkiyənin 100-dən çox bölgəsində və dünyanın bir çox ölkələrindəki distant təhsil alan tələbələrinin yaşadıqları ərazidə  - ölkələrdə (o cümlədən Azərbaycanda)  nümayəndəlik və filial açmasına ehtiyac qalmır. Belə ki, Anadolu Universiteti təhsil fəaliyyətini Türkiyə Respublikasının ərazisində həyata keçirir.
 2009-cu ildən başlayaraq Türkiyə Cümhuriyyətinin Prezidenti yanında Ali Təhsil Şurasının (YÖK) müvafiq qərarı ilə  qardaş  Azərbaycanda yaşayan Türkiyə, Azərbaycan və digər ölkə vətəndaşlarına  da universitetdə distant formada  təhsil almaq imkanı yaradılmışdır.  Distant formada təhsil alaraq Azərbaycanda yaşayan Türkiyə, Azərbaycan və digər ölkə vətəndaşları olan tələbələrə dərslər Türkiyədən internet üzərindən verilir, bununla yanaşı bizlərin təhsilimizə əlavə texniki dəstək məqsədilə (tələbələrlə  universitet arasında texniki əlaqələndirmə yaradılmasına, onlara lazımi məsləhətlərin verilməsinə, videokonfrans bağlantısı qurulmasına və. s. köməklik  göstərilməsi  məqsədilə) universitetlə müəyyən qurumlar    arasında  tərəfdaşlıq prinsipi əsasında  müvafiq protokollara uyğun olaraq biz tələbələrə  texniki xidmətlər göstərilir və  bundan çox  məmnunuq.