Səidə Dadaşovanın uşağının atası, Əlikram Bayramovun ad günü və...

Milli.Az jurnalist İntiqam Valehoğlunun müəllif layihəsi olan "Həftəbecər"i (52-ci say) təqdim edir.

Son günlər havalar o qədər romantik keçir ki, adam bir quşa da kiş deyib narahat eləmək istəmir. Quş olanda nə olar? Onu da Allah yaradıb, onun da istirahət etmək hüququ var, o da bir ananın balası, bəlkə də bir balanın anasıdır.

Nə etmək olar ki, onun da bəxtinə quş olmaq düşüb. Quş demişkən, yenə də söhbət fırlandı gəldi bu şou aləminin üstünə. Bura elə bir yerdir ki, lap istəyir ən dürüst adam olasan, yenə deyəcəklər ki, əşşi müğənnidir də. Bir az sarsaq bənzətmə olsa da, çəkinmədən demək olar ki, müğənni həyatı quş həyatı kimidir. Hər gələn sənə bir daş atır.

Səidə Dadaşova 36 yaşında bir uşaq dünyaya gətirib. Hərə bir tərəfdən tökülüşüb ki, bəs uşağın atası başqa bir qadının əridir. Vəziyyət o həddə çatıb ki, ərlərinin sonsuzluğundan gileylənən qadınlar da həmin uşağı öz ərlərinə "bağlayırlar". Amma bir qadın ortaya əməlli-başlı sənəd-sübut qoyub ki, bəs Səidə mənim ərimə qardaş deyib, sonra da əlimdən alıb. Səidə də deyib ki, atam balası, mən heç kimə qərdeş-zad demirəm, deməmişəm də. Uşağın atası tamam başqa adamdır. Həmin o qardaş da zəng vurub jurnalistlərə deyib ki, mən indi xaricdəyəm, Bakıya çatınca qaçın canınızı qurtarın. Yoxsa gəlib orada qanı su yerinə axıdacağam. Axırda görüb ki, söhbətin barıtı çox oldu. Deyib atam, pis başa düşməyin, özüm elə elədim ki, hirsli olduğumu başa düşəsiz.

Bir təklifim var. Yüz faiz bir qurum yaradılmalı və şou arvadlarının doğduğu uşaqların kimdən olduğu üzə çıxarılmalıdır. Yoxsa belə getsə, çox kişilərin evi dağılacaq. Məsələn, bir evə sən də gedirsən, mən də, bizdən başqa daha beş nəfər də. Sabah oradan güldan itirsə, hamımızı birdən tutub basırlar dama. Amma evdə təhlükəsizlik kamerası olsa, daha bir də əziyyət çəkib hamını çağırmazlar. İndi mən demirəm kiminsə harasınasa kamera qoymaq lazımdır. Düşünülsə, nəsə etmək mümkündür.

Mədəniyyət və Turizm Nazirliyində xətrimi o qədər çox istəyirlər ki, hər həftə bu qurum haqda yazmağı özümə borc bilirəm. Ötən həftə əməkdar artist Əli Nur demişdi ki, bu qurum fəxri adları satır. Özü də qiymətlər xeyli yüksəkdir. Elə bunu yazmışdım ki, bir də gördüm nazirlikdə aləm dəyib bir-birinə. Dedim yəqin çox xoşlarına gəlib. Məlum oldu ki, başqa söhbət imiş. Azərbaycanda heç bir nazirlikdə mənim bu qədər hörmətim yoxdur. Heç bir dövlət qurumu yazdığım yazıya görə bu qədər narahat olmur, müxtəlif şəxslərin vasitəsilə bu qədər xahiş-minnətlər etmir. İki gün öncə jurnalistləri Naftalana yığıb aparıblar. Jurnalistlər də burada Naftalan nefti ilə tanış olublar.

Səfərdən şəkilləri görəndə çox sevindim. Bildim ki, nazirlik özü mənə əziyyət verməmək üçün dəvət etməyib. Naftalan Bakıdan xeyli yoldur. Get, qayıt, yazı hazırla, xeyli vaxt aparacaq. Nazirlikdən bir tanış adam mənə dedi ki, səni başqa səbəbə dəvət etməyiblər. Soruşdum səbəbi. Dedi ki, qardaş, sən Bakıda oturub Gəncə, Mingəçevir teatrları haqda yazdığın yazıları zorla çıxartdırmağa çalışırlar. Bəs gedib Naftalanda gözünlə gördüklərini yazsaydın, onda yalvarsaydılar da, xeyri olmayacaqdı. Dedim, əşşi mənim boş vaxtım olsa, göyərçinlərimi uçurdaram da buradan Naftalana nöyütə baxmağa görə nöş gedirəm ki? Həm də nöyüt işinə başqaları baxır.

Üç-dörd gün öncə Space-də böyük sənətkar, vokal-estrada məktəbimizin nadir səs sahiblərindən biri, toyların bəzəyi, kənd toylarının şahı, şəhər toylarının padşahı Əlikram Bayramovun ad günü keçirilirdi. Ad gününü də elə Əlikram boyda da olmasa, təxminən o "razmer"də xeyli sənətkar toplaşmışdı. Elə birinin adını deyəcəm - aşıq Telli. Yox, deyəsən "razmer" çox yekə oldu. Eşitdiyimə görə gələn ay Üzeyir Mehdizadənin ad günüdür. Keçirmək məsləhətdir.

Müğənni Ayan müsahibədə deyib ki, bundan sonra ailə qurmaq haqda düşünür. Ailə qurduğu insanla da yaş fərqi 10 da ola bilər, 30 da. Hərə bu söhbəti bir yerə yozub.

Axır ki, Elza Seyidcahanın parlament seçkilərində uduzduğu rəsmən təsdiqini tapdı. Ha-ha-ha-ha... hi-ha-ha-ha... Gülmürəm. Deputatların bəxti gətirdi bu səsləri eşitməkdən. Əsas məsələ odur ki, İlhamə Quliyeva növbəti seçkilərdə özü Elza Seyidcahana səs verəcək. Tobaaa...

Strategiya.az