Liviya təhlükəsizliyinin bir yüksək rütbəli rəsmisinin verdiyi məlumata görə, İslam Dövləti (İD) adlandırılan təşkilatın ali komandirləri bu yaxınlarda İraq və Suriyadan Liviyaya keçiblər.
Sözü gedən rəsmi BBC Newsnight proqramına deyib ki, getdikcə artan sayda əcnəbi döyüşçü Sirt şəhərinə gəlir.
Ötən çərşənbə axşamı 23 ölkənin nümayəndələri Romada bir araya gələrək Liviyada İD təhlükəsi məsələsini müzakirə ediblər.
İD keçmiş Liviya lideri Müəmmar Qəddafinin doğma şəhəri Sirti öz nəzarəti altına ötən il alıb.
Ölkənin bir-biri ilə rəqabət aparan iki hökuməti arasında ixtilaflar İD-ə qarşı döyüş səylərini əngəlləyir.
Belə bir ehtimal da var ki, islamçı qruplaşma keçmiş rejimə sadiq bəzilərindən dəstək alıb.
Lakin Misrata şəhərindəki təhlükəsizlik idarəsinin rəisi İsmayıl Şükri Newsnight proqramına deyib ki, son aylarda ölkəyə çox sayda əcnəbi döyüşçünün axını olub.
"Sirtdəki İD döyüşçülərinin əksəriyyəti, təxminən 70 faizi əcnəbilərdir. Əksəriyyəti Tunisdəndir, onlardan sonra sayca misirlilər, sudanlılar və bir qədər də əlcəzairlilər gəlir. Bura iraqlıları və suriyalıları da əlavə edin. İraqlıların çoxu Səddam Hüseynin ləğv olunmuş ordusunun döyüşçüləridir” – deyir Şükri.
O qeyd edir ki, İD komandirləri İraqda və Suriyada endirilən beynəlxalq hava zərbələri altında Liviyaya sığınmağa məcbur olublar.
Image copyrightGetty
"Onların bəzi üzvləri, xüsusən də İD üçün uzunmüddətli əhəmiyyət daşıyanları bura sığınırlar. Onlar Liviyaya təhlükəsiz sığınaq kimi baxırlar” – deyir komandir.
Misratadakı hakimiyyət orqanları Sirtdəki İslam Dövləti qüvvələrinə qarşı hücuma hazırlaşdığını bildirir.
Lakin Misratanın 120 kilometrliyində yerləşən Abuqreyndə BBC hər hansı döyüşə hazırlıq getdiyinin əlamətlərini görməyib.
Abuqreyn İD-dən müdafiənin son xəttidir. Burdan o yana, şərqə doğru yola İD nəzarət edir.
Abuqreyndəki komandirlər Newsnight proqramına deyiblər ki, onların Tripoli hökumətinə sadiq qüvvələri 1400 döyüşçüdən ibarətdir. Bu isə İD-in təxmin edilən qüvvəsindən azdır.
166-cı batalyonun komandiri Məhəmməd əl-Bayudi etiraf edir ki, onlar beynəlxalq yardım olmadan İD-in öhdəsindən gələ bilməyəcəklər.
Image copyrightGetty
"Qətiyyətlə deyə bilərəm ki, biz NATO-nun dəstəyini alqışlayardıq. Lakin təkcə hava zərbələri ilə İD-i məğlub etmək olmaz. Ordumuzun daha çox taktiki hazırlıq və təchizata ehtiyacı var” – deyir komandir.
Liviyaya beynəlxalq hərbi müdaxilə cəncəl məsələdir. Birləşmiş Ştatlar son həftələrdə bura məhdud sayda azı bir dəfə xüsusi qüvvə göndərdiyini etiraf edib.
İD-lə gözlənilən vuruşmada iştirak üçün potensial yerli müttəfiqlərin öyrənilməsi məqsədilə bura başqa NATO ölkələrindən də kiçik qrupların göndərildiyi bildirilir.
Lakin Abuqreyndəki döyüşçülər deyirlər ki, bu torpaqda Qərb çəkmələrini görmək istəmirlər.
“Biz liviyalılar özümüz döyüşəcəyik. Burada xarici qoşuna ehtiyac yoxdur” – deyib cənab əl-Bayudi.
Birləşmiş Krallıq da daxil, Qərb hökumətləri vəziyyətdən getdikcə daha çox narahat və səbirsiz olurlar.
İtaliyanın başçılığı altında, Birləşmiş Krallıq və Fransa da daxil bir neçə NATO ölkəsinin qoşunlarından ibarət 6 minlik təlim birləşməsinin göndərilməsi təklifi hələlik müzakirə olunur.
Burada ən böyük əngəl Liviyanın rəqib parlamentləri arasında konsensusun olmamasıdır.
BMT-nin təşəbbüsü ilə birlik hökumətinin yaradılması təklifi, həm Tripolidəki islamçı dəstəkli hakimiyyətin və həm də ölkənin şərqindəki Tobrukda beynəlxalq birlik tərəfindən tanınmış hökumətin imtinasına görə dalana dirənib.
