Fevralın 17-də axşam saatlarında Ankarada terror aktı törədildi.

Hadisə hərbçiləri daşıyan avtomobil karvanının keçişi zamanı baş verdi.

Nəticədə 28 nəfər öldü, 60-dan artıq adam yaralı halda xəstəxanalara çatdırıldı.

Dünən gecə xain terror hücumu Ankaranı qəlbindən vurmuşdu.

Ötən günün həmin, məlum saatına kimi siyasi səhnədə aktorlar “tamaşa”nın kulminasiyasını oynayırdılar.

Qəfil pərdə düşdü.

Gecə səhərə kimi Anakaranın bir tərəfində meyitlər daşınarkən, siyasi rəhbərliyin səhər saatlarına kimi qərar verib, nəticə çıxarmaq üçün zaman qazanması mümkün oldu.

Gün başlarkən Ərdoğandan açıqlama gəldi.

“Səbrimizi zorladılar”.

Nə baş vermişdi həmin günə qədər?

17 fevral tarixinə kimi Türkiyə siyasi gündəmi çalxalanmaqda idi.

Bu ölkənin birbaşa Suriya girdabına daxil edilməsi, Rusiya və İranla üz-üzə qalması, NATO üzvü kimi Avropa və ABŞ-dan dəstək görməməsi və çoxlu sayda daxildə və xaricdə terror təşkilatlarına qarşı mübarizə aparması vizionda aşkar idi.

(Əslində heç nə yeni deyil. Türk siyasi leksikonunu "Osmanlıyız" kəlməsi alan kimi köhnə kin təzələndi).

Rusiya ilə məlum təyyarı qalmaqalından sonra işin rəngi dəyişərək, rus qüvvələri Suriyada YPG-ni dəstəkləməyə, türkmanları bombalamağa və Türkiyəni daha ağır qaçqın axını ilə üz-üzə qoymağa başladı.

Türkiyə ətrafında toxunan hörümçək toruna əlavə oyunçuların da daxil olması ilə məsələ dolaşıq kələfə döndü.

Türkiyə Suriya cəbhəsində gecikdiyi üçün yeni müttəfiq axtarışına başladı.

Və...

Səudiyyə Ərəbistanı Suriyaya minlərlə xüsusi təyinatlı əsgərini göndərəcək.

Bu barədə Böyük Britaniyada nəşr olunan "Ze Qaardian" qəzeti xəbər yaymışdı.

Özü də 10 gün əvvəl.

“Qəzet iddia edir ki, rəsmi  Ər-Riyad Türkiyənin köməyi ilə İŞİD-ə qarşı yerüstü hərbi əməliyyat aparmaq üçün Suriyaya girəcək. Krallıqdakı mənbələr də bildirib ki, Səudiyyə Ərəbistanının fəaliyyəti Türkiyə ilə əlaqəli şəkildə həyata keçiriləcək. Qeyd olunur ki, hər iki dövlət Bəşər Əsəd rejiminə qarşı çıxır və Suriya münaqişəsinin siyasi yolla həllinə şübhə ilə yanaşır.

Ekspertlər bildirir ki, Ər-Riyadın mümkün yerüstü əməliyyatla bağlı sonuncu bəyanatı rəsmidir və ciddi xarakter daşıyır. Amerika Birləşmiş Ştatları Krallıqla Suriyada quru əməliyyatları ideyasını müzakirə etməyə hazırdır”.

Ardınca isə Türkiyə və Səudiyyənin birgə Suriyaya 300 minlik ordu yeridəcəyi iddiası gündəmi zənginləşdirdi.

Təxminən, bir həftə əvvəl, Suriya cəbhəsinin türk qanadının da daxil olduğu Münhen konfransı işə başladı.

Alınan nəticələr Türkiyə üçün dəqiq hədəfə yürüməyə imkan verdi.

Bax, bütün sirr də burda cəmləşib.

Münhendən sonra, Türkiyənin prezidenti Bakıya, baş naziri Brüsselə getməli idilər.

Buna qədər isə Suriyanın Türkiyə üçün ölüm – qalım məntəqəsinə dönən Azez bölgəsi kürdlərin hücumlarına məruz qaldı.

Rusiyanın havadan köməyi ilə terrorçular Türkiyənin dəstəklədiyi Azad Suriya Ordusunu bu styrateji məntəqədən çıxartmaq üçün qan tökməyə başladılar.

Türkiyə bunun cavabını verməmişdən qabaq, YPG-ni top atəşinə tutmağa davam etdi.

Amma bunlar Türkiyəni qane etməyəcəkdi.

Ölkə adminstrasiyası güman ki, daha ciddi qərar verəcəkdi. Amma cəmi iki saatlıq zaman arası hər şeyi dəyişdi.

Türkiyə bundan sonra nə edəcəkdi?

Qəflətən, dünən Ankara terrorundan təxminən iki saat əvvəl, Türkiyə kəşfiyyatı (MİT) ölkədə yeni terror aktlarının törədilməsi imkanları barədə xəbərdarlıq etdi.

Bu barədə  “Haber7” qəzeti MİT-dəki mənbəyə istinadən xəbər yaydı.

“Kəşfiyyatın məlumatına əsasən, PYD və PKK terror təşkilatlarının bəzi üzvləri Türkiyənin beynəlxalq aeroportlarında terror aktları törətməyə hazırlaşırlar. Bu məqsədlə PYD və PKK-nın 14 silahlısı Türkiyə ərazisinə daxil olub. Qəzet yazır ki, terror aktları Türkiyənin Suriyada yaraqlıların mövqelərini atəşə tutmasına cavab olaraq hazırlanır”.

Nəhayət, iş bitdi

Qəflətən partlayan bombanın səsi Moskvadan, Vaşinqtondan, Kandildən, Şamdan eşidildi.

İşin burası önəmli, kim idi terrorçu?

“Dünən Türkiyənin paytaxtı Ankarada baş vermiş terror hadisəsinin Suriya vətəndaşı Salih Necar tərəfindən törədilməsi barədə məlumat verilib. S.Necar bir il öncə qaçqın kimi Suriyadan Türkiyə ərazisinə daxil olub. Terror aktının əsas qurbanları hərbçilər olub, hadisə yerində olan Ankara sakinləri xəsarət alıb”.

Kartlar açıq, aydın deyilmi?

Türkiyənin qabağını kəsdilər.

Təkrar edərək, altından xətt çəkirəm, önünü kəsdilər.

Nəticədə, 15 saatdır ki, türk hakimiyyətinin başı qarışıb, daxili işlərinə.

Nə Ərdoğan Bakıya gələ bildi, nə Davudoğlu Avropaya gedə bildi.

Nə də Səudiyyədən gələn yüksək çinli qonaqları qarşılayan oldu.

Bəs kimdir Salih Necar?

Türkiyə Suriya savaşı zamanı 3.5 milyon qaçqını qəbul etdi.

Milyonlardan biri də kürd əsilli Necar ailəsi idi.

İllər sonra, çörəyini yediyi ölkəni qana boyamaq üçün əvvəlcə PKK-nın Suriya qanadı olan YPG-yə qoşulacaq, təlimatlarını alıb, Türkiyənin ürəyinə xəncər saplayacaqdı.

YPG- isə Suriyada Rusiyanın, İranın və ABŞ-ın himayəsi ilə türk dəstəkçisi olan müxalifətləri qırmaqla, türkmanlara divan tutmaqla məşğuldur.

Hələ də suallar açıq qalır:

Türkiyə nə edəcəkdi və nə edəcək?

Bayrağına qan rəngi qatmış ölkə, şəhid ruhları üzərində qərar tutub.

Qeyd: Atatürkün əlində bayraq, atın belində olan bir rəsmi var: önündə yüzlərlə düşmən sancaqlı ölkə.

Bu foto da məndən gündəmə daha yaxın olmaq üçün./atv/