"Elton mənə arvadının ...."

Elton ilə ilk tanışlığımızı belə xatırlayıram... Muğam teatrı, hələ tanınmamış, ürəyi dolu gənc bir müğənni... Salam verən kimi özünü təqdim etdi və başladı, özü də nə başladı. Müəllimi Teymur Əmrahın əlindən yaman yanıqlı idi.

Strategiya.az-ın məlumatına görə, Milli.Az xəbər verir ki, bu barədə xalq artisti Aygün Kazımova müğənni Elton Hüseynəliyevhaqqında danışarkən vurğulayıb. 

Xalq artisti deyir ki, Elton dayanmaq bilmirdi: "Siz onu tanımırsınız, siz bilmirsiniz. O insan məndən əl çəkmir. Məndən istifadə edir. Mənim şəxsi həyatıma müdaxilə edir. Mənə başqa-başqa təkliflər edir. Mənə göz verib, işıq vermir".

Kazımova söyləyir ki, yenicə tanış olduğu gənc müğənninin bu etirafları onu çox düşündürüb: "Axı mən Teymur Əmrahı tanıyıram. O, istedadlı pedaqoqdur. Niyə Eltona belə zülm edir? Nə istəyir Eltondan? Beləcə Eltona ürəyim ağrıdı. Eltonla hər görüşəndə qeybətindən qalmırdı. Xüsusilə də, qadın müğənnilərin arxasınca danışırdı. Sən demə, qeybət etmək Eltonun adəti imiş".

Eltonun efirdə onun barəsində son açıqlamasına da toxunan A.Kazımova deyilənlərin tam bir cəfəngiyyat olduğunu bildirdi: "Çıxıb efirə deyir ki, guya duet oxumağı mən ona təklif etmişəm. Əslində isə mahnıların və duetlərin təklifi hər zaman mənə Elton tərəfdən gəlib. Mahnının musiqisini, sözlərini hər zaman o tapıb. Aranjman işini də Elton həll edib. Mahnılar mənə hazır şəkildə təqdim olunub. Mənim işim, sadəcə, studiyaya girib oxumaq olub. Bu sözlərimi onun keçmiş prodüseri Anar Mədətov, mənim keçmiş Eltonun isə indiki prodüseri Tolik də təsdiq edə bilər. Elton çox nankor insandır. O, həyat yoldaşının hesabına gündəmə gəldi. Əli pula, şan-şöhrətə çatandan sonra mənə arvadının qeybətini edirdi. Məni özünə dərd ortağı seçmişdi. Nə vaxt görüşürdüksə, sənətdən danışmaq əvəzinə, Eltonun qeybətlərini dinləyirdim.

Mən, doğurdan da, Eltonu özümə dost bilirdim. Ona ürəyim ağrıyırdı. Hələ elə söhbətlər var ki, onu açıqlaya bilmirəm. O, həyatda quzudur. Efirə çıxanda isə vəhşiləşir. Mən efirdə gördüyüm Eltonu tanıya bilmirəm. Mən onu əvvəldən tanısaydım, ömrüm boyu onu yaxınıma buraxmazdım. O ki qalsın, onunla dostluq edim.

Bir adam ki, iki gözəl övladının anası, illərdir onun yolunda hər cəfaya qatlaşan, işini, karyerasını onun karyerasına qurban verən, bu gün qazandıqlarına həyat yoldaşının sayəsində çatan ömür-gün yoldaşının qədrini bilmirsə, ağzına gələni danışırsa, oturduğu hər yerdə və mənim yanımda ailəsinin, evinin, həyat yoldaşının qeybətini edən kişiyə kişi demək olar?

Xalq artisti iddia edir ki, dəfələrlə Eltonu boşanmaq fikrindən daşındırıb: "Deməli, Elton nə özünü aparmağı, nə də danışığını bilir. Dəfələrlə ayrılmaq istədiyini deyirdi. Deyirdim ki, iki gözəl balan var. Belə şey etmə. Ailəsindən elə danışırdı ki, dəhşətə gəlirdim. Kişi də belə şey danışar? Kişi də öz həyat yoldaşını belə alçaldarmı? Onun aləmində hamı günahkardır, hamı ondan istifadə edir, hamı ona qarşı haqsızlıq edir, hamı onu incidir, hamı onun yolunu kəsir, hamı onun paxıllığını edir. Elə yazıq-yazıq danışır ki, polad belə əriyir, nəinki adamın ürəyi sızıldayır. İnsanı inandırmaq üçün özünə haqq qazandırmaq üçün dindən-imandan danışır. Adama elə gəlir ki, qarşısında qanadsız mələk oturub. Az qalsın, dəsmal götürüb ağlayasan. Bu hərəkətləri ilə özünü mənə inandırıb, dostluğumu qazandı. Az qala uşaq kimi onu qoruyurdum. Mən Eltonu özündən çox düşünürdüm. Narahat olub qeydinə qalırdım. Çünki Elton itib yoxa çıxırdı, ailəsini başlı-başına buraxırdı. Özünü ailəsinə, uşaqlarına həsrət qoyurdu. Mən nə biləydim ki, bu mələk cildində şeytandır. Mən nə bilərdim ki, o, sözün əsl mənasında, artistlik edir. İndi də düşüb kanallara mənim qeybətimi edir. Hələ çox şeylər montaj olunur ki, siz onları görmürsünüz. Onlar efirə getmir. Gör nə günə qalmısan ki, sənin efirdə danışmağa mövzun yoxdur. Sənə mikrofon uzadıb ancaq Aygün Kazımova haqda soruşurlar. Sənə mikrofon uzadılanda, ancaq qeybət edirsən. Fikir vermisinizsə, ancaq xanım müğənnilərin arxasınca danışır.

Adama sual verərlər ki, öz mövzun yoxdur ki, xanımların qeybətini edirsən? İndi də başlayıb Röya ilə belə oldu, Natavanla belə oldu. Bizim dilimiz varsa, dilçəyimiz də var. Bir-birimizə sözümüz olanda, açıq-aşkar deyirik. Sənin kimi üçüncü, dördüncü adamı söhbətimizə qatmırıq.

Bu naftalin iyi verən, toz basmış variantları qoy kənara. Deyəsən, unutmusan saatlarla vaxtımı alıb Röya və Natavanın arxasınca etdiyin qeybətlər. Utan, kişi adı daşıyırsa, ay qədirbilməz!  Bir dilinə yiyə dura bilmirsən. Deyəsən, hulqumunu sən çoxdan udmusan!"