Strategiya.az-a verilən məlumata görə, Nizami Kino Mərkəzində  aprelin 21-dən Azərbaycan istehsalı olan  “Pərdə”,  Russiyanın 3 d formatında çəkilmiş “Ekipaj” , Türkiyənin “Kolpaçino 3. Devre”, Böyük Britaniya və ABŞ-ın  “Cinayətkar” bədii filmlərinin nümayişi başlanıb.

 “Ekipaj” filminin ssenari müəllifi Tixon Kornev,  rejissoru  Nikolay Lebedevdir. Film dram,  triller  və məcara janrında çəkilib. Yaş həddi:16+

Film gənc və bacarıqlı təyyarəçi Aleksey Quşinin həyatından bəhs edir. Aleksey avtoritet tanımır, həmişə öz şərəf kodeksinə uyğun qərarlar alır. Absurd bir tapşırığı yerinə yetirmək istəmədiyinə görə o,  hərbi aviasiyadan kənarlaşdırılır.

Quşin uçuş həyatına yenidən başlayır. Onun komandiri sərt və prinsipial Leonid Zinçenko və ikinci –pilotu əlçatmaz gözəl Aleksandradır. Münasibətləri heç də sadə deyil.  Amma həyatla ölümün səddində, torpaq ayaqlarının arasından gedən zaman, od və külün ortasından xilas məqamı gələndə Quşin nəyə qadir olduğunu göstərir. Yalnız birlikdə ekipaj qəhrəmanlıq nümayiş etdirib   yüzlərlə insan həyatı xilas edə bilərlər .

         Filmdə baş rollara Danila Kozlovskiy, Vladimir Maşkov, Aqne Qrudite, Katerina Şpitsa, Serqey Qazarov, Elena Yakovleva, Serqey Şakurov, Vera İvanova, Tatyana Novik, Yan Qe  və başqaları çəkilib.

“Art Film Baku”  kinoşirkətinin çəkdiyi “Pərdə” filmi  dram janrındadır. Filmin sseanri müəllifi və rejissoru Emil Quliyevdir. Yaş həddi:18+

         Ata məsləhəti, el adət-ənənəsi ilə evlənərək sonradan bədbəxt olan Zaur, hal-hazırda seçim qarşısındadır. O, öz bacısı Lalənin sevdiyi oğlan Eminlə xoşbəxt olmasını istəyir. Bunun üçün Zaur, bacısının qaçırılmasına icazə verməlidir. Cəmiyyətin, dostların, qonşuların bu işə münasibəti necə olacaq kimi fikirlər Zauru çıxılmaz vəziyyətdə qoyur. Onun seçimindən bir ailənin taleyi asılıdır...

         Filmdə aktyorlar Tural Əhməd, Vüsal Mehrəliyev, Azər Aydəmir, Zaur Şəfiyev, Könül Cəfərzadə, Zemfira Əbdülsəmədova, Nəsibə Eldarova, Ayşad Məmmədov və  Beyrək Rüstəmzadə çəkiliblər.

         “Cinayətkar” filmini rejissor Ariel Vromen  Duqlas Kukun ssenarisi əsasında fantastika, döyüş, detektiv, kriminal və   dram janrında ekranlaşdırıb.  Yaş həddi: 16+

         Film azərbaycan dilində subtitrlərlə nümayiş edilir.

         Dünya miqyaslı fəlakətin  qarşısını almaq üçün  genetiklər çox çətin və inanılmaz əməliyyata  əl atırlar. Onlar ölmüş kəşviyatçısının beynini və bacarığını  təhlükəli caninin beyninə yerləşdirərək onun agentin başa vurmadığı missiyanı yekunlaşdırmasına ümid edirlər.

         Baş rollara Kevin Kostner, Qari Oldman, Tommi Li Cons, Rayan Reynolds, Elis İv, Qal Hadot, Xordi Molya, Maykl Pitt, Amori Nolasko,Antye Traue və başqaları çəkilib.

         AF Mediya şirkətinin təqdim etdiyi  “Kolpaçino 3. Devre”  komediyasının   rejissoru və ssenari müəllifin  Şafak Sezerdir.

         Ozgür əri Sabrinin xəyanətindən sonra ondan ayrılır  və yaşadığı villanı kino çəkilişlərində istifadə üçün kirayə verərək dolanır. Bir dartışmada Ozgürün telefonu bir mafiya üzvünün telefonu ilə qarışır.   Ev kirayəsinin pulunu gözləyən Ozgürə içində iyirmi ədəd bir milyon dollarlıq banknot olan bir zərf  gəlir. Ozgür pulların üzərinə planlar qurarkən mafiya başçısı ona və dostlarına bunu bağışlamayaçağını   çatdırır.

         Filmdəki obrazları aktyorlar Şafak Sezer, Erkan Petekkaya, Aydemir Akbaş, Ebubekir Öztürk, Volkan Başaran, Serkan Şengül, Ali Çatalbaş, Burak Öncü' və başqaları canlandırıb.

Filmlər haqqında daha ətraflı məlumatı Nizami Kino Mərkəzinin facebook səhifəsindən öyrənmək mümkündür. (https://www.facebook.com/NizamiCinema?rf=hl