Bir sıra rayonlarda, o cümlədən Cəlilabad rayonunda müəllimlərin məzuniyyət pulunun verilməsində gecikmənin olması, bunun da guya maliyyə təminatında çətinliklərdən qaynaqlanması ilə əlaqədar xəbərlərlə bağlı Trend-in sorğusuna cavab olaraq Maliyyə Nazirliyinin mətbuat xidmətindən bildirilib ki, ümumtəhsil məktəblərində çalışan pedaqoji işçilərinin əməkhaqqı və məzuniyyət pullarının verilməsində heç bir gecikmə yoxdur və cari ilin 15 iyul tarixinə bu ödənişlər tam həcmdə maliyyələşdirilib.
“Təhsil işçilərinin məzuniyyət haqları Azərbaycan Respublikası Təhsil Nazirliyinin şəhər - rayon təhsil şöbələri və ərazi maliyyə hesablaşma mərkəzləri tərəfindən aparılmış hesablamalara əsasən təqdim edilmiş sifariş və ödəniş sənədlərinə müvafiq olaraq tam məbləğdə ödənilib. O ki qaldı Cəlilabad rayonu üzrə ödənişlərə, bildiririk ki, təqdim edilmiş sifarişlər əsasında vaxtı-vaxtında maliyyələşmə aparılıb və rayon Təhsil şöbəsinin təqdim etdiyi arayışa əsasən pedaqoji işçilərə 2016-cı ilə üzrə əməkhaqqı və məzuniyyət haqlarına görə hər hansı borc yoxdur”, - deyə nazirlik bəyan edib.
Maliyyə Nazirliyi bir daha bildirir ki, tez-tez məqsədli şəkildə büdcənin icrasında, eləcə də sosial sahədəki xərclərin maliyyələşdirilməsində çətinliklərin olması ilə bağlı yayılan və heç bir əsası olmayan məlumatlar həqiqətə uyğun deyil və böhtan xarakteri daşıyır.
Bununla yanaşı, Maliyyə Nazirliyi büdcədən vəsait ayrılması ilə əlaqədar hər hansı sualları olanlara mətbuat orqanlarında məsuliyyətsiz çıxışlar etmək əvəzinə məsələnin aidiyyəti qurumlarla, o cümlədən Maliyyə Nazirliyi ilə əlaqə saxlayaraq araşdırılmasını tövsiyə edir.
Strategiya.az
