Adının çəkilməməsini xahiş edən məktub müəllifi daha sonra yazır ki, oğlunun dediyi ünvan Nəsimi rayonu, Azadlıq prospekti 58v-də yerləşən “Buqatti” adlı gecə klubu olub: “Həmin gecə klubuna getdim. Bildirdim ki, filankəsin atasıyam. Məni bir otağa apardılar. Həmin otaqda 7 nəfər idmançı görkəmli şəxs var idi. Oğlum və dostu da orda idi. Oğlumun dostu qarın nahiyəsindən aldığı zərbədən ikiqat olmuşdu. Nə baş verdiyini soruşdum. Həmin idmançı görkəmli şəxslərdən nisbətən bəstəboy olan və özünü gecə klubunun sahibi kimi təqdim edən Səbuhi adlı biri mənə dedi ki, oğlunuz dostu ilə kluba gəlib. Sonra onlara 2 qız qoşulub. Həmin qızlar viski və ”Redbull" dəsgahı sifariş veriblər. Deyiblər ki, onları sizin oğlunuz və dostu qonaq edib. Onların sifarişinin qiyməti 170 manat edib. Amma oğlunuz bu pulu vermək istəməyib və ofisiantla aralarında insident yaranıb. Nəticədə mənim adamlarım oğlunuza və dostuna güc tətbiq məcburiyyətində qalıb. Mən oğlumla da danışdım. Lakin o bildirdi ki, həmin qızları tanımırlar. O qızlar əvvəldən gecə klubunda olublar və yalnız onların deyil, başqalarının da masasına oturublar. Anladım ki, bütün bunlar sadəcə tələdir. Səbuhiyə dedim ki, sizin etdiyiniz cinayətdir. Əvvəla, azyaşlını gecə klubuna buraxmağı sizə kim icazə verib? Ikincisi, oğlum hətta nəsə sifariş verib onun pulunu ödəməkdən imtina etmişdisə belə, siz polisə müraciət etməli idiniz. Amma siz cinayətə yol verərək onu öz bildiyiniz kimi mühakimə etmisiniz. Bildirdim ki, sizdən polisə şikayət edəcəm. Lakin həmin Səbuhi adlı şəxs dedi ki, nə polisdən, nə Daxili Işlər Nazirliyindən qorxmur, onları heç saya salmır. Çünki onu Musa Musayev adlı güclü şəxs himayə edir. Sonra onlardan biri mənə dedi ki, yaxşısı budur, Səbuhini hirsləndirmə, yoxsa sənin üçün daha pis olar. Hesabın yarısını ödə problem həll olunsun. Beləliklə, məndən 80 manat alandan sonra oğlumu və dostunu buraxdılar".
Məktub müəllifi deyir ki, gecə klubundan çıxandan sonra yaxınlıqda olan 22-ci polis bölməsinə (!) gedib: “Başımıza gələnləri danışdım, ərizə yazdım. Lakin heç bir nəticəsi yoxdur. Sonradan mənə bəlli oldu ki, Səbuhinin dediyi Musa Musayev adlı şəxs Nəsimi Rayon Polis Idarəsinin rəisidir. Gördüm ki, ərizəmin heç bir nəticəsi olmadı qərara aldım ki, məsələni ictimailəşdirim”.
Yazıda adı hallanan şəxslərin də mövqeyini dərc etməyə hazırıq.
/“Azadlıq” qəzeti/
