“Prezident dedi ki, bizə belə inteqrasiya lazım deyil” – Elman Nəsirov

Oktyabrın 7-də ilin 9 ayının yekunları və qarşıda duran vəzifələrlə  bağlı ölkə başçısı İlham Əliyevin sədrliyi ilə Nazirlər Kabinetinin müşavirəsini keçirib. Prezident bir sıra məsələlərə toxundu. Dağlıq Qarabağla probleminin həllinin yubadılmasının pərdəarxası məqamlarından danışdı. Azərbaycanın xarici siyasətinin ana xəttini təşkil edən Qərb ölkələri ilə bərabərhüquqlu əməkdaşlıq kursu barədə ətraflı məlumat verdi. İlham Əliyev həmçinin ABŞ-ın dövlət katibi Con Kerrinin Dağlıq Qarabağ münaqişəsinin nizamlanması ilə bağlı qərəzli bəyanatına da münasibət bildirdi.

Müşavirənin siyasi tərəfini  şərh edən millət vəkili, politoloq Elman Nəsirov  bildirib ki, ölkə başçısı bir çox mühüm məsələləri qabardıb:

“İlk növbədə bunların içərisində Azərbaycanın həyata keçirdiyi siyasətin mahiyyəti ilə bağlı məsələlərə nəzər salındı. Yəni, Azərbaycan  benəlxalq diplomatiyada hansı xətti həyata keçirməlidir - əməkdaşlıq yoxsa inteqrasiya xəttini. Ölkə başçısı qeyd etdki ki, bizim öz içərimizdə də Azərbaycanın Avropaya inteqrasiya etməsini istəyən qüvvələr var. O, həmin dairələrin bununla bağlı öz məqsədlərinin olduğunu bildirdi. Biz hansı Avropaya inteqrasiya etməliyik. Bu gün Qərb ölkələrində çox ciddi böhran yaşanmaqdadır. Ölkəmiz həmin böhranamı inteqrasiya etsin?! Cənab prezident qeyd etdi ki, bu güm Avropada “stop islam” deyirlər. Qaçqın düşən müsəlmanlara qarşı ikili standartlar tətbiq edilir. Biz bunamı inteqrasiya etməliyik? Ölkə başçısı son müşavirədə çox ciddi suallar qoydu. Prezident qeyd etdi ki, bizə belə inteqrasiya lazım deyil, biz bərabərhüquqlu, qarşılıqlı əməkdaşlıq xəttini seçmişik. Ölkəmizin Qərb ölkələri ilə sıx əməkdaşlıq münasibətləri mövcuddur. 9 Avropa ölkəsi ilə sıx tərəfdaşıq. Ölkə prezidenti açıq şəkildə bəyan etdi ki, Azərbaycana inteqrasiya yox, sıx əməkdaşlıq xətti vacibdir və siyasi kurs da məhz buna görə müəyyənləşdirilib”.  

Elman Nəsirov İlham Əliyevin Dağlıq Qarabağ müşavirəsi ilə bağlı müşavirədə səsləndirdiyi fikirlərə də münasibət bildirib. Millət vəkili qeyd edib ki, ölkə başçısı münaqişənin bu vaxta qədər yubadılmasının əsas səbəbləri haqqında ictimaiyyətə ətraflı məlumat verib:

“Ölkə başçısı qeyd etdi ki, aprel döyüşlərindən sonra münaqişənin həlli istiqamətində yeni bir situasiya yaranmışdı. Məhz həmin situasiyanın təsiri altında may və iyun aylarında prezidentlər səviyyəsində görüşlər keçirildi. Lakin bu görüşlərdən sonra yenidən pauza yaranıb. Ermənistan da hər vəchlə çalışır ki, hazırki status-kvonu qoruyub saxlasın. İşğalçı ölkə rəhbərliyi yenə də öz təxribatçı siyasətini həyata keçirir. Prezident Ermənistanın işğalçı siyasətini davam etdirməsinin səbəblərini də açıqladı. Onun himayədarlarının bir qismi ona silah-sursat, digər qismi pul, başqaları isə onların işğalçılıq siyasətinin təbliğatını aparır. Ermənistana bu istiqamətlərdə dəstək gəldiyindən beynəlxalq hüquq normalarına, qəbul edilmiş qətnamələrə heç bir məhəl qoymur. Cənab prezident BMT Təhlükəsizlik Şurasının işğal faktı ilə əlaqədar olaraq qəbul etdiyi qətnamələrə də toxundu. Bildirdi ki, bugünə qədər həmin qətnamələrdən irəli gələn vəzifələr icra edilməyib. Bu da BMT kimi böyük, beynəlxalq və universal bir təşkilatın imicinə zərbədir”.

Elman Nəsirov prezidentin Con Kerrinin son qərəzli bəyanatı ilə bağlı səsləndirdiyi fikirlərə də münasibət bildirib:

“Ölkə başçısı ABŞ-ın dövlət katibi Con Kerrinin qərəzli çıxışına münasibət bildirərkən dedi ki, bu çox insafsız bir bəyanatdır. Prezident vurğuladı ki, faktiki olaraq bu bəyanat ATƏT-in Minsk qrupunda həmsədr olan dövlətlərin bəyanatı ilə daban-dabana  ziddir. Birləşmiş Ştatlar səviyyəsində də qeyd olunub ki, status-kvo qəbuledilməzdir. Burada ziddiyət var. Bir yandan  ABŞ prezidenti deyir ki, status-kvo qəbuledilməzdir amma onun dövlət katibi başqa bir bəyanat verir. Prezident həmin müşavirədə qeyd etdi ki, Con Kerrinin bəyanatından hər kəsin xəbəri var. Amma  bağlı qapılar arxasında Azərbaycan tərəfinə təziyiqlər edilir ki, Dağlıq Qarabağdan imtina etsin. Ölkə başçısı qeyd etdi ki, nə qədər ki, Azərbaycanda indiki iqtidar hakimiyyətdədir, bu heç bir zaman mümkün olmayacaq.

Ölkə başçısı həmçinin vurğuladı ki, bu iqtidar uzun müddət hakimiyyətdə olacaq, çünki xalqın böyük etimadını qazanıb. Son referendumun nəticələri də bunu təsdiqlədi. Bəzi xarici dairələrin Dağlıq Qarabağla bağlı prinsipial mövqeyinə görə, indiki iqtidarı gözləri götürmür”. //ha