Məktəbin direktoru Kəmalə Şıxlinskiyə himayədarlıq edən yüksək vəzifəli şəxslər belə, məsələni ört-basdır edə bilməmişlər

Binəqədi rayonunda yerləşən 179 saylı məktəbin direktoru yol verdiyi mənimsəmə hallarına görə “cəzalandırılaraq”, Xətai rayonundakı 59 saylı məktəbə direktor təyin olundu

İki gün bundan öncə, yəni 25 oktyabr tarixində qəzetimizdə dərc etdiyimiz “179 saylı məktəbdə mənimsəmə faktları” başlıqlı yazıda, Binəqədi qəsəbəsində yerləşən bu orta təhsil müəssisəsində cərəyan edən bəzi proseslərdən bəhs etmiş və hətta bu proseslərin davamı olaraq, hansı hadisələrin gözlənildiyi barədə müəyyən proqnoz da vermişdik. Məqalədə qeyd olunmuşdu ki, bu yaxınlarda 179 saylı məktəbin fəaliyyəti təftiş olunan zaman bir çox qanun pozuntuları, o cümlədən külli-miqdarda maliyyə mənimsəmələrinin yer alması faktları aşkar olunmuşdur. Mənbənin iddiasına görə, hətta iş o yerə çatmışdır ki, bu məktəbin direktoru Kəmalə Şıxlinskiyə himayədarlıq edən yüksək vəzifəli şəxslər belə, məsələni ört-basdır edə bilməmişlər. Vəziyyətdən yeganə çıxış yolu kimi isə, direktoru başqa məktəbə keçirmək qərara alınmışdır. Təbii ki, yenə də direktor vəzifəsinə. Biz göstərmişdik ki, əldə etdiyimiz məlumata görə, bu transfer yaxın günlərdə baş tutmalıdır. Və budur, artıq dünəndən Kəmalə Şixlinskaya yeni vəzifədə, Xətai rayonu 59 saylı orta məktəbin direktoru vəzifəsində fəaliyyətinə başlamışdır. Məlumatı təqdim edən mənbə, həmçinin bu xanım direktorun tərk etdiyi 179 saylı məktəbdə yol verdiyi mənimsəmələrin təfərrüatları barədə də müəyyən açıqlama verib. Bu barədə məlumatda deyilir: “Kəmalə Şixlinskaya 179 saylı məktəbə üç ərzində rəhbərlik edib. Bu yaxınlarda keçirilən yoxlama zamanı aşkarlanan yeyintilər isə, konkret olaraq məktəbdə dərs bölgüsü zəminində törədilən maxinasiyalarla bağlı olub. Belə ki, direktor İngilis dili dərslərini yalnız sənəd üzərində müəllimlər arasında bölüşdürüb. Reallıqda isə, bu dərsləri yalnız bir müəllimə aparıb. Dövlət tərəfindən müəllimlərə həmin dərs saatlarına görə ayrılan maaşlar isə, direktor tərəfindən mənimsənilib. Bu minvalla da, üç il ərzində Kəmalə Şixlinskaya dövlətin 95 min manat pulunu mənimsəyib. Direktora xüsusi himayədarlıq edən Binəqədi Rayon İcra Hakimiyyətinin başçısı Xaləddin İsgəndərov məsələdən xəbər tutan da isə, artıq necə deyərlər, iş-işdən keçmiş olub. Yəni, məsələni ört-basdır etmək artıq mümkün olmayıb. Bununla belə, başçı hər halda Kəmalə Şixlinskayanın yaxasını cəzadan qurtara bilib. Sadəcə olaraq, bunun üçün direktorun eyni vəzifəyə, amma artıq bir başqa rayonun məktəblərindən birinə keçirilməsi gərəkib. Dünən isə məlum olub ki, Kəmalə xanım Xətai rayonunda yerləşən 59 saylı məktəbə direktor təyin olunub”.

Yeri gəlmişkən, elə dünən redaksiyamıza təqdim olunmuş daha bir məlumatda Kəmalə Şixlinskayanın Binəqədi RİH-nin başçısı tərəfindən himayə olunmasının səbəbləri barədə də bəzi maraqlı açıqlamalar yer alıb. Mənbə iddia edir ki, bu himayənin əsasında sadəcə olaraq Xaləddin İsgəndərovun bu xanım direktorun atası, Şəmkir rayon təhsil şöbəsinin müdiri Məcid Şıxlinski ilə olan dostluq münasibətləri durmur: “Ehtimal etmək olar ki, müəyyən istiqamətlərdə dövr edən maliyyə vəsaitlərinin hərəkəti də bu münasibətlərin formalaşmasına əlverişli mühit yaradır. Hərçənd Kəmalə Şixlinskayanın artıq başqa rayonda fəaliyyət göstərəcəyini nəzərə alsaq, “maliyyə dövriyyəsinin” bundan sonrakı istiqamətlərinin də dəyişəcəyini gözləmək olar...”

Matreialda adı keçən bütün tərəflərin mövqeyini işıqlandıra bilərik.http://www.bizimdovr.az/