Daha bir məktəbdə rüşvət qalmaqalı - Bakıda

Hər il tədris mövsümü başlayandan bitənədək orta məktəblərdə şagirdlərdən müxtəlif adlar altında pul yığılması ilə bağlı şikayətlər eşidirik. Müəllimlər günü, 8 Mart, fond, süpürgə, test və daha bu kimi onlarla bəhanələrlə valideynlər “soğan kimi soyulurlar”.

Təhsil Nazirliyi isə şikayətlərin araşdırılacağını, məcburi pul yığan direktorların işdən çıxarılacağını vəd edir. Amma bir şərtlə: “Qaynar xətt” xidmətinə zəng vuran şikayətçi adını, uşağın adını, məktəbi, müəllimin adını açıqlamalıdır. Əks halda şikayət müəllim və ya direktora qarşı qərəz kimi qiymətləndiriləcək.

Nazirliyin bu şərti övladının gələcəkdə incidiləcəyindən qorxan valideynləri rəsmi şikayətdən çəkindirir. Beləcə şikayətlər bir-birini əvəzləyir və heç kim məsuliyyətə cəlb olunmur.

Bakı şəhər sakini Ramilə Məmmədova isə nazirliyin şərtinə əməl edib. Özünün və məcburi pul yığılmasından narazı olan digər valideynlərin adından həm Bakı Şəhəri üzrə Təhsil İdarəsinə, həm də Təhsil Nazirliyinə şikayət ünvanlayıb. Amma onun şikayətinə baxmaq əvəzinə, övladını sinif yoldaşlarının qarşısında təhqir ediblər.

R.Məmmədova “Qafqazinfo”ya bildirib ki, iki qızının təhsil aldığı Xətai rayonu, 116 saylı məktəbdə tələb olunan pulu vermədiyi üçün övladları müəllim tərəfindən alçaldılıb: “Qızlarım həmin məktəbdə 1-ci və 3-cü sinifdə oxuyur. Xırda müəllimə və Kunzala müəllimə direktor Aidə Seyidovanın tapşırığı ilə bizdən müxtəlif bəhanələrlə pul tələb edir. Summativ testlərin aparılmasına görə ötən il 1 uşaq üçün 27 manat alınırdısa, bu il hər uşaq üçün 36 manat istəyirlər. Bundan başqa, sinif üzrə 20 manat qəzet pulu, hər ay 10 manat süpürgəçi pulu toplanılır. Həmçinin, məktəbin psixoloqu Gülnarə xanım da bizdən 500 ədəd “A4” kağızı tələb edir. Deyir ki, həmin vərəqlərə uşaqlarımızın psixoloji durumunu yazır və hətta o vərəqlər buna kifayət etmir”.

Valideyn iddia edib ki, rüşvət elə iclaslarda istənilir. “Bütün uşaqlara “A4” kağızında hazır test verilsə də, mənim qızımın qabağına dəftər vərəqi qoyublar və deyiblər ki, 20 test tapşırığını özün köçürt, sonra həll elə. Qızım evə ağlaya-ağlaya gəldi”.

Şikayətçi sentyabrın 29-da rəsmi olaraq ərizə ilə Təhsil Nazirliyinə şikayət ünvanlayıb. Həmçinin ondan pul istəyənin səsini yazaraq sübut kimi təqdim edib. Amma 1 aydır ki, şikayətlərə cavab verilmir.

Qeyd edək ki, bu, 116 saylı məktəblə bağlı ilk şikayət deyil. Məktəbdə müxtəlif bəhanələrlə, hətta direktorun ad günündə ona hədiyyə alınması üçün şagirdlərdən məcburi pul yığıldığı ilə bağlı məlumatlar kifayət qədərdir.

116 saylı məktəbdən virtualaz.org saytının ittiham ilə bağlı sualını cavablandırmaq istəməyiblər: “Direktor naharda, müavinləri isə dərsdədir. Heç kim suallarınızı cavablandıra bilməyəcək”.

Bakı Şəhəri üzrə Təhsil İdarəsindən isə saytın sorğusuna belə cavab verilib: “Hazırda Bakı Şəhəri üzrə Təhsil İdarəsi tərəfindən araşdırma aparılır. Araşdırmanın nəticələrinə uyğun olaraq, müvafiq tədbirlər görüləcəkdir”.

Araşdırmanın niyə bu qədər uzadıldığı, nə vaxt başa çatacağı, bu məktəblə bağlı ittihamlara indiyədək niyə reaksiya verilmədiyi barədə suallar isə cavabsız qalıb.

Amma idarədən onu da deyiblər ki, Bakı Şəhəri üzrə Təhsil İdarəsinin tabeliyində olan ümumi təhsil məktəblərinin direktorlarına təsərrüfat məqsədləri üçün 2013-cü ilin dekabr ayından etibarən avans şəklində müvafiq aylıq vəsaitlərin ödənilməsinə başlanılıb. Aylıq vəsaitlər direktorlar tərəfindən məktəblərin təcili həlli tələb olunan mal, iş və xidmətlərin alınmasına sərf edilir və bu barədə hər ay Bakı Şəhəri üzrə Təhsil İdarəsinə hesabat verilir. Ödəniş Təhsil Nazirliyinin “Təsərrüfat məqsədləri üçün plastik kartların tətbiqi barədə” müvafiq əmrinə əsasən məktəb direktorlarının bu məqsəd üçün açılmış plastik kart hesablarına köçürülür. Yəni ki, məktəblərin test üçün kağız, süpürgə almağa pulu var.

Qeyd edək ki, hazırda orta məktəblərdə qiymətləndirmə test üsulu ilə həyata keçirilir. Bundan əlavə, müxtəlif kurslar müqavilə əsasında məktəblərdə qiymətləndirmə testləri həyata keçirirlər. Bu isə pul yığılması üçün yeni vasitə rolunu oynayır. Yəqin ki, Bakı Şəhər Təhsil İdarəsi də bunu bilməmiş deyil. Necə deyərlər, görünən dağa bələdçi lazım deyil. Yetər ki, araşdırıb, nəticə görmək istəyi olsun.