"Niderlandın hərəkəti demokratiya üçün qara ləkədir" - AÇIQLAMA

Niderland hökumətinin Türkiyənin xarici işlər naziri Mövlud Çavuşoğlunun və ailə və sosial siyasət naziri Fatma Betül Sayan Qayanın səfərinə icazə verməməsi iki ölkə arasındakı diplomotik münasibətləri gərginləşdirib.

Maraqlıdır, Türkiyə ona edilən diplomatik basqıya qarşı hansı addımı atacaq?

Mövzu ilə bağlı Metbuat.az-a açıqlama verən millət vəkili Elman Nəsirli bildirib ki, bu, bu hadisə Hollandiyadakı hakimiyyətin əsl simasını ortaya qoydu:

“Türkiyəyə münasibətdə Avropa İttifaqı ölkələrinin, xüsusilə də Almaniya, İsveçrə, Hollandiya və Danimarkanın münasibəti göz önündədir. Bu davranış onu göstərir ki, əslində, Avropa İttifaqı ölkələrində demokratiya məsələsində çox ciddi problemlər yaşanmaqdadır. Avropa İttifaqı çox ciddi bir sistemli böhran yaşayır. Bu hadisələr həm də diplomatik problemlərin mövcudluğunu sübut elədi. Və növbəti dəfə təsdiqlədi ki, demokratiya, insan hüquqalarının müdafiəsi, insanların söz, mətbuat, sərbəst toplaşmaq azadlığı Avropa İttifaqı ölkələrinin planlarını həyata keçirmək üçün vasitədir. Reallıqda bunu pozan elə özləridir. Əks təqdirdə, türk vətəndaşlarına qarşı küçədə təzyiqlər olmazdı. Belə olan vəziyyətdə, Türkiyənin hansı addımlar atacağı məsələsi gündəmə gəlir”.

Millət vəkili əlavə edib ki, artıq Türkiyənin atacağı addımlarla bağlı müəyyən məlumatlar var:

“Türkiyə prezidenti Rəcəb Tayyib Ərdoğan qeyd edib ki, ölkəsinin xarici işlər nazirinin təyyarəsinin enməsinə icazə verməyənlər Türkiyəyə təyyarə ilə necə gələcəklərini düşünsünlər. Söyləyib ki, bu, mülki insanlara deyil, diplomatlarla bağlı məsələlərə aid olacaq.

Türkiyənin bu məsələdə hansı yolu seçəcəyi ilə bağlı Türkiyənin xarici işlər naziri Mövlud Çavuşoğlu da ilkin mövqeyini açıqlayıb. Qeyd edib ki, 2016-ci ilin mart ayında Avropa İttifaqı ilə bir saziş imzalanıb. Həmin sazişin mahiyyəti ondan ibarət idi ki, Türkiyə ərazisindən qeyri-qanuni Avropa İttifaqı ölkələrinə daxil olmuş qaçqınlar geri qaytarılacaq, əvəzində isə bir nəfər suriyalı qaçqın Avropa İttifaqı ölkələrinə buraxılacaq. Nəticədə, Türkiyə 3 milyondan artıq qaçqını öz ərazisində saxlayır. Onların Avropa İttifaqına daxil olmasının qarşısına sədd çəkib. Bunun əvəzində ilkin mərhələdə Türkiyəyə 3 milyard avro ödənilməli, Türkiyənin Avropa İttifaqı ölkələrinə vizasız keçidi formalaşmalı idi. Amma bunların heç biri baş tutmayıb. Çavuşoğlu qeyd edib ki, belə olan vəziyyətdə Türkiyə ilə Avropa İttifaqı arasında vizasız rejime keçid reallaşdırılmalıdır. Bu olmayacağı təqdirdə, məsələyə yenidən baxılıb, 2016-cı ilin mart müqaviləsi ləğv olunmalıdır.

Bundan savayı, Türkiyə prezidenti qeyd edib ki, Avropa İttifaqı Türkiyə üçün artıq cəlbedici deyil. Türkiyə üçün alternativlər var. Bu nöqteyi nəzərdən, Türkiyə prezidneti Şanxay Əməkdaşlıq Təşkilatının (ŞƏT) adını çəkib. Yəni, Avropa İttifaqının əvəzi olaraq, Türkiyə Şanxay Əməkdaşlıq Təşkilatına üzv ola bilər. Açıq şəkildə qeyd edib ki, ölkəsi bu istiqamətdə Rusiya prezidenti Vladimir Putin və Qazağıstan prezidenti Nursultan Nazarbayevlə müvafiq danışıqlar aparıb. Beləcə, hadisələr gərgin ssenaridə inlkişaf etməkdədir”.

Millət vəkili sonda bunları qeyd edib:

“Hadisələr bir daha Hollandiyadakı hakimiyyətin əsl simasını ortaya qoydu. Bu da ondan ibarətdir ki, Türkiyədə keçirilən referenduma dəstəklə bağlı mitinqə icazə verməyən, zor tətbiq etməklə onu dağıdan rəsmi Amsderdam, artıq Türkiyədə olan referendumun əleyhinə keçirilən mitinqlərə icazə verir. Buna demokratiya üçün böyük qara ləkə deyirlər. Təəssüf ki, bu ləkə Avropa qitəsində baş verir və təəssüf ki, bunu edən Türkiyənin, NATO-nun müttəfiqi olan Hollandiyadır. Bu, çox acınacaqlı haldır. Hesab edirəm ki, bunun çox ağır fəsadları hələ qarşıdadır”.