“Həyətlərimiz hər gün, azı, 20-30 santimetr aşağı gedir. Tövlənin qabağı uçdu. Kiçik çatlar getdikcə iri yarğanlara çevrilməyə başlayır. Biz də insanıq, qorxuruq, camaat ev-eşiyini atıb gedir, kənarda qalır».Bunu Cəlilabadın Sadatlı kəndinin sakinləri deyir.
Bu kənddə torpaq sürüşməsi evlərə yaxınlaşıb. Kənd sakini Həmzə Allahverdiyev danışır ki, son bir neçə gündə durum bir qədər də təhlükə halı alıb. İnsanlar evlərində yaşamağa qorxurlar. Məsələn, H.Allahverdiyev özü 9-nəfərlik ailəsini başqa yerə köçürüb, özü isə həyətin ətrafında günbəgün genişlənən yarıqlara çarə aramaqdadır.
Kənd sakinlərinin deməsinə görə, səbəb son günlər intensiv yağıntılardır. Həmzə Allahverdiyev deyir: «Əsas təhlükə kəndin «Yeddi bulaq» adlanan ərazisindədir. Bir neçə gün əvvəl həyətin ətrafında yaranan kiçik yarıqlar indi dərinləşib. Qonşunun üçyaşlı uşağı yarığa düşmüşdü, axtarıb-axtarıb gedib oradan tapdıq. Əgər o yarığın üstünü torpaq layı örtsəydi, yaxud o dərin yarıq yağış suyu ilə dolu olsaydı, uşağın ölüsü də ələ gəlməzdi. Deməyim odur ki, vəziyyət bu dərəcədə ciddidir».
Kəndliləri narahat edən ikinci məsələ təpəliklərdən qopan iri torpaq laylarının evlərə tərəf hərəkət etməsidir. Kəndin yaxınlığındakı bir təpəliyin altını yağış suları yuduqca, torpaq layları qopub yollara, evlərin qarşısına düşür.
Kənd sakini Bəhrəm Abdullayev deyir, bir neçə gün öncə təpəliyin yaxınlığından keçən bir kəndli, az qala, torpaq layının güdazına gedəcəkmiş: «Ötən ay torpaq layı bir kəndlinin maşınının üstünə çökdü, maşın yararsız hala düşdü. O günlərdə də bir qonşu torpaq layının altında qalacaqdı. Ərazidən ötmək təhlükəyə çevrilib. Düzdür, özümüz təhlükədən qorunmağa çalışırıq. Ancaq bu «Yeddi bulaq» ərazisinə görə hökumət mütləq təcili tədbir görməlidir. Göz görə-görə evlərimiz, həyətlərin hasarları əyilir, aşağı gedir. Hökumət qarşısını almasa, bunun sonu faciədir
Cəlilabad rayon İcra Hakimiyyətindən isə bildirilib ki, «Yeddi bulaq» adlanan ərazi Fövqəladə Hallar Nazirliyinin və rayonun fövqəladə hallar komissiyasının nəzarətindədir. Əgər durum bir qədər də ciddiləşsə, köçürmə mümkündür: «Hələlik vəziyyət sakinlərin dediyi kimi də təhlükəli deyil. Hər şey nəzarətdədir. Komissiyanın nümayəndələri hər gün əraziyə baxış keçirirlər, sakinlərlə söhbətləşirlər».
İcra Hakimiyyətindən bildirilib ki, Sadatlıda sürüşməyə məruz qalmış ərazidən bir neçə ailənin köçürülməsi nəzərdə tutulub. (“Azadlıq” radiosu)
