Yeni bir elmi araşdırma, dünyada ölümlərin 10 faizinə siqaret çəkməyin səbəbkar olduğunu göstərir.
Siqaret çəkmək nəticəsində ölüm hallarının yarısı Çin, Hindistan, ABŞ və Rusiyanın payına düşür.
Siqaret çəkməyə qarşı onilliklər boyu keçirilən kampaniyalardan asılı olmayaraq, əhali artımı siqaret çəkənlərin ümumi sayının artımına səbəb olub.
Araşdırma The Lancet tibbi dərgisində dərc edilib.
"Əlimizdə 50 ildən artıqdır ki, siqaret çəkməyin sağlamlığa zərərini sübut edən dəlillərin olmasına baxmayaraq hazırda dünyada dörd kişidən biri hər gün siqarət çəkir", baş təhqiqatçı doktor Emmanuela Gakidou deyib.
Xəstəliklərin Qlobal Möhnəti adlı hesabat 1990-cı və 2015-ci illər arasında 195 ölkədə siqaretin çəkilməsi barədə toplanan məlumat üzərində hazırlanıb.
Hesabatda 2015-ci ildə dünyada bir milyard insanın hər gün siqaret çəkdiyi deyilir. Onlardan dörddə biri kişi, 20-də biri isə qadındır.
Yüksək vergilər
1990-cı ildə üçdə bir kişi və 12-də bir qadının siqaret çəkdiyi göstərilib. Yeni hesabat bu rəqəmin aşağı düşdüyünü göstərir.
1990-cı ildə 870 milyon siqaret çəkən olub. Lakin əhali artımı nəticəsində onların sayı 2015-ci ildə 1 milyarda çatıb.
Eyni dövrdə siqaret çəkmək nəticəsində ölənlərin sayı 4,7 faiz artaraq 2015-ci ildə 6,4 milyona çatıb.
Hesabat yüksək vergilər, paketlər üzərində xəbərdarlıq və maarifləndirmə proqramlarının uğurlu olduğunu göstərir.
Hesabatın 25 illik dövründə Braziliyada siqaret çəkənlərin sayı kişilər arasında 29 faizdən 12 faizə, qadınlar arasında isə 19 faizdən 8 faizə enib.
Eyni dövrdə Bangladeş, İndoneziya və Filippində dəyişiklik müşahidə edilməyib, lakin Rusiyada qadınlar arasında siqaret çəkənlərin sayı 4 faiz artıb.
