Rusiyaya güvənmək olmaz

Fazil Mustafa: "Rusiyanın Azərbaycanda öz qoşunlarını, hərbi bazasını yerləşdirməsi nəticəsində nəinki Qarabağı, Azərbaycanı itirə bilərik"

Bütöv Azərbaycan Xalq Cəbhəsi Partiyasının (BAXCP) sədri, deputat Qüdrət Həsənquliyev Qarabağ probleminin həlli üçün Rusiya ilə yaxınlaşmağı və əgər bu yaxınlaşma işğaldakı torpaqların azad edilməsinə kömək edəcəksə, o zaman Azərbaycanda Rusiyaya məxsus hərbi bazaların yerləşdirilməsi təklifi ilə çıxış edib. Lakin gözlənildiyi kimi bu təklif mübahisələrə səbəb olub və hətta partiya sədrini dövlətə xəyanət etməkdə ittiham edənlər də var. Böyük Quruluş Partiyasının başqanı, deputat Fazil Mustafa da həmkarının təklifi ilə razılaşmır. O, "Ekspress"ə müsahibəsində Rusiyadan gözlənilən təhlükə barədə də danışıb.


- Qüdrət Həsənquliyevin Rusiya qoşunlarının Azərbaycanda yerləşdirilməsi ilə bağlı təkilifini necə dəyərləndirirsiniz?

- Bütövlükdə bu məsələni bir az konteksdən çıxarmaq doğru olmaz. Yəni Qarabağın xilası üçün bir variant olaraq təklif olunur. Amma bu variant nə dərəcədə məqbuldur, bunu müzakirə etməliyik. Yəni burda niyyət heç də rus qoşunlarının Azərbaycanda yerləşdirilməsi deyil. Bu, bilavasitə Qarabağ probleminin həlli və Azərbaycana qaytarılması məsələsidir. Ona görə də, məncə, bu variantın nə dərəcədə Azərbaycan üçün effektli olub-olmayacağını müzakirə etməliyik. Məncə, bu variant effektli deyil və bu variantda da Azərbaycan tərəfi tamam fərqli bir yol izləməlidir. Çünki Rusiya ilə bağlı bizim bütün müşahidə elədiyimiz addımlar onu göstərir ki, Rusiyaya güvənmək olmaz. Rusiya Qarabağ məsələsinin həllinə, ümumiyyətlə, maraqlı deyil. Bunu bəhanə edərək Rusiyanın Azərbaycanda öz qoşunlarını, hərbi bazasını yerləşdirməsi nəticəsində biz Azərbaycanı itirə bilərik, nəinki Qarabağı. Ona görə də, məncə, bu yol məqbul deyil. Biz daha fərqli bir yol axtarmalıyıq. Yəni Rusiyaya güvənərək bu addımı atmaq mümkün deyil.

- Bəs siz bu fərqli yolu nədə görürsünüz?

- Fərqli yol kimi əsas əhalinin potensialına dayanaraq Qarabağın qaytarılması siyasəti nəzərdə tutulmalıdır. Çünki bizim başqa resurslarla, müharibə aparma resursu ilə addım atmağımızda böyük əngəllər yaranacaq. Əlverişli konyekturanı gözləməliyik. Amma əhalinin bütövlükdə Qarabağın qaytarılma prosesinə hazırlaşması ilə daha çox üstünlük qazana bilərik. İnsanlar buna inanmalıdırlar və buna səfərbər olmalıdırlar. Əsas məsələ budur.

- Ümumiyyətlə, rus qoşunlarının Azərbaycanda yerləşdirilməsi ölkəmiz üçün hansı fəsadlara yol aça bilər?

- Bu, bilavasitə Azərbaycanın müstəqilliyinin itirilməsi deməkdir. Çünki bir ölkənin ərazisində başqa bir ölkənin hərbi bazası varsa, həm də o ölkədə bu bazanı xoş niyyətlə saxlamırsa, bu o deməkdir ki, istənilən vaxt Azərbaycan ərazisində qiyam qalxa bilər və bu da həmin hərbi birləşmələr tərəfindən dəstəklənə bilər. Ukrayna nümunəsi, Krımdakı hadisələr budur.

- Yeri gəlmişkən, Rusiyalı politoloqlar Ukraynadan sonra növbənin Qarabağa çatacağı barədə fikirlər irəli sürürlər. Eyni zamanda, ABŞ-ın nüfuzlu qəzetlərindən birində də Rusiyanın növbəti hədəfinin Azərbaycan olacağı barədə məqalə yazılıb. Rusiyadan belə bir təhlükə gözləmək olarmı?

- Bu realdır. Amma bütövlükdə Rusiya təkcə Azərbaycan üçün yox, bütün Avropa üçün təhlükəyə çevrilməyə başlayır. Ona görə də hamılıqla bu problemin önünü kəsmək üçün addımlar atılmalıdır. Söhbət təkcə Qarabağdan getmir. Ümumiyyətlə, Rusiya bu regionda özünün istədiyi siyasəti yeritmək niyyətindədir və bunun da qarşısı alınmasa daha böyük faciələr baş verə bilər.

- Yəni SSRİ-nin bərpası baş verə bilər?

- Bu, mümkün deyil. Ümumiyyətlə, bunun ideya olaraq da gerçəkləşdirilməsi üçün zəmin yoxdur. Sadəcə, zorla işğal ola bilər. Hətta SSRİ formalaşanda belə bir ideya tapılmışdı. Amma indi o ideya anlayışı gündəmdə deyil.

- Rusiya təhlükəsinə qarşı hamılıqla mübarizənin aparılması zərurətindən danışdınız. Hazırda Ukrayna hadisələrindən dolayı Qərbin Rusiyaya qarşı sanksiyaları o dərəcədə təsir göstərmir. Sizcə, hansı addımlar Rusiyanı bu işğalçılıq niyyətindən daşındıra bilər?

- Mən hesab etmirəm ki, sanksiyalar təsir göstərmir. Artıq təsir göstərməyə başlayıb. Rusiyaya qarşı bu siyasət ardıcıl yeridilməlidir ki, bir, iki, üç aya bu siyasət öz həllini tapsın. Mütləq bu siyasət Rusiyaya təsirini göstərəcək.

- Azərbaycanda rus pasportlarının verilməsində bir təhlükə görürsünüz?

- Bəli, təhlükə görürəm. Bizim konstitusiyada belə bir müddəa var ki, heç kimin vətəndaşlığına xitam verilə bilməz. Amma mən hesab edirəm ki, qanunvericilikdə dəyişiklik edərək könüllü şəkildə Rusiya vətəndaşlığını qəbul edən şəxslərin Azərbaycan vətəndaşlığından azad olunmasını təmin etməliyik. Çünki ikili vətəndaşlığın olmaması buna imkan verir.