“Ekspress – Elita” MMC-də nə baş verir? - Fotolar

 Strategiya.az-a Nəcəfov Zaur Ənvər oğlu tərəfindən şikayət daxil olub. Redaksiyamıza gələn Nəcəfov Zaur bildirir ki, “Ekspress – Elita” MMC – nin rəhbərliyi tərəfindən qanunsuz olaraq, Əmək Məcəlləsinin 70-ci maddəsinin b bəndinə əsasən işdən azad edilib. O, bildirir ki, 2014 – cü il  aprelin 23-də əmr yazılıb ki, sahənin bağlanması ilə əlaqədar ixtisara düşüb. May ayının 12-nə qədər əmək kitabçasını özlərində saxlayıblar. Əmək kitabçasına isə yazılıb ki, Əmək Məcəlləsinin 68 –ci maddəsinə əsasən işdən azad olunub, yəni öz xahişi ilə. Aprelin 23-ü işdən çıxmaq əmri yazılandan sonra mayın 7-nə qədər də müqaviləsiz işlədiblər. O, bildirir: “2014-cü ilin yanvarın 20-dən işə düzəlmişəm. Bir ay müqaviləsiz və maaşsız işlədiblər. Bu müddət ərzində 10 manat veriblər və deyiblər ki, satılan qəzet və jurnalın 18 faizidir. Fevralın axırında Dövlət Əmək Müfəttişliyi Xidmətinə ərizə yazmışam, müqaviləsiz və maaşsız işlədildiyimi bildirmişəm. Müfəttişlik işə qarışandan sonra mənimlə 2014-cü il fevral ayının 1-dən etibarən müqavilə bağlayıblar. Yəni yanvar ayını nəzərə almadılıar.  Müqavilədə 65 manat maaş təyin edilib və bildirilib ki, iş yükün çox olsa da bu maaşı alacaqsan. Əməkhaqqının işəmuzd olan 18 faizlik hissəsini kəsiblər.  Əmək Müfəttişliyinə ikinci şikayətimdən sonra məni ixtisar ediblər. Heç bir xəbərdarlıq etmədən. Əmək Müfəttişliyinə ikinci şikayətimdən sonra 5 saylı region üzrə Dövlət Əmək Müfəttişliyində oldum. İcraçı Səmədlə danışdım, O, mənə bildirdi ki, şirkət rəhbərliyinin dedikləri ancaq sözdədirsə, biz heç nə edə bilmərik. İşləməyinə davam et. Mən isə işə gedəndə əmr göstərdilər ki, ixtisara düşmüşəm. Mən əmrə qol çəkmək istəmədikdə bildirdilər ki, abunəçilərin qəzet və jurnallarını ünvanlara çatdırmaq üçün mənə verməyəcəklər. Mən Səmədə zəng edib soruşdum ki, əmrə qol çəkimmi? O, bildirdi ki, tanış olmağına qol çəkirsən, qol çək. Mən əmrə qol çəkəndən sonra müdirün köməkçisi Təranə qəzet və jurnal dolu olan çantanı mənə tulladı və dedi ki, əmrə qol çəkmisənsə, bunları abonentlərə çatdıra bilərsən. Mən dəfələrlə tələb etdikdən sonra işdən çıxmağım haqqında əmri mənə verdi. Mən də həmin əmri icraçı Səməd göstərdim. Səməd dedi ki, bu, qanunsuz əmrdir və buna görə onları cərimə edə bilərlər. Qeyd etdi ki, bu əmri başqalarına göstərmə, sizin müdriyyət bunun qanunsuz olduğunu bilsə, qanunsuz əmri düzəldəcəklər və biz onları cərimə edə bilməyəcəyik. Mayın beşindən, yəni üçüncü ərizəmi yazdığım gündən indiyə kimi Əmək Müfəttişliyindən mənə heç bir rəsmi cavab gəlməyib. Mən Səmədlə əlaqə saxladıqda o, mənə bildirdi ki, istəyirsən müəssisəni ver məhkəməyə, ancaq Ekspress – Elitanın cərimə olunması ilə bağlı mənə heç nə demədi. Ərizəmdə əlaqə nömrəm və ünvanım var idi. Mən özüm 5 saylı Region üzrə Dövlət Əmək Müfəttişliyi ilə əlaqə saxlasam da bu günə qədər rəsmi cavab ala bilməmişəm və müəssisə haqqında görülmüş tədbilər haqqında mənə heç nə bildirmirlər. Vergilər Nazirliyinin 195 nömrəsinə də müqaviləsiz işlədiyim ilə bağlı da  şikayət etmişəm. Vergilər Nazirliyinə şikayət etdikdən sonra Ekspress - Elitadan 109 manat 10 qəpik  pul almışam. Audit Departamentinin işçisi Məhərrəmov Saleh iki dəfə məndən pulu almağımla bağlı izahat aldı.  

Son olaraq Zaur bizdən işə bərpa olunmağını və əməkhaqqının əksik olan hissəsini almağa köməklik etməyimizi  xahiş etdi.    

Bura qədəri bizdən, bundan sonrası isə aidiyyatı qurumların işidir. 

Bütün tərəflərin mövqeyini işıqlandırmağa hazırıq.