Məşhur müğənni Oya Ergün sabah konsert verəcək

15:49 / 04.03.2015

Bu gün Beynəlxalq Mətbuat Mərkəzində Türkiyənin tanımış klassik və opera müğənnisi Oya Ergünün "Sevgilim” adlı CD-sinin və eyniadlı klipinin təqdimat mərasimi keçirilib.

Təqdimat mərasimində müğənni Oya Ergün, "Kaspi” qəzetinin baş redaktoru İlham Quliyev, müğənninin ailəsi və media nümayəndələri iştirak edib.

Təqdimat mərasimində çıxış edən Oya Ergün bildirib ki, sabah mənim Azərbaycanın dəyərli müğənnisi Rəşid Behbudovun 100 illiyinə həsr olunan konsert proqramım olacaq: "8 mart Beynəlxalq Qadınlar Günü ərəfəsində olduğu üçün bu konsert Azərbaycan qadınlarına hədiyyə edilib. Konsert pulsuzdur. Rəşid Behbudov adına Mahnı Teatrında baş tutacaq. Konsertdə Azərbaycanın dəyərli sənətçiləri də iştirak edəcək. Mən bu konsertdən nə isə qazanc gözləmirəm. Bu konsert Azərbaycan xanımları üçün hədiyyədir. Konsertdə məni 8 nəfərdən ibarət azərbaycanlı orkestr müşayiət edəcək. Konsertdə əsasən Azərbaycan mahnılarını səsləndirəcəyəm. Bundan əlavə italyan və türk mahnılarını da oxuyacağam. Konsertdə Rəşid Behbudovdan əlavə, məşhur bəstəkar Fikrət Əmirovun da mahnılarına yer verilib. Konsertə həmçinin, bütün mətbuat dəvətlidir”.

Xanım müğənni qeyd edib ki, Rəşid Behbudovu ilk dəfə 10 yaşında olarkən dinləyib: "Radioya qulaq asırdım. Birdən 3 Azərbaycan mahnısı ifa olundu.

Mahnılardan çox təsirləndim və o zamandan Rəşid Behbudov adını bir daha heç unutmadım. Musiqi təhsili almağa başladığımda tez-tez onun mahnılarını dinləyirdim. O, mənim üçün Favorittidən fərqli deyil. Uzun müddətdən sonra onun ölkəsində yaşamağa başladım. Burada yaşadığım 2 il müddətində onu çox daha yaxından tanıdım. Bu yay Avropada 5 konsertim olacaq. Həmin konsertlərdə Rəşid Behbudov repertuarı ilə çıxış edəcəyəm”.

O.Ergün təəssüf etdiyini bildirib ki, təkcə Azərbaycan, Türkiyə deyil, ümumiyyətlə Amerika və Avropa ölkələrində də klassik və opera mahnılarının dinləyicisi çox azdır: "Operanı dinləmək istəyən şəxs onda həmin sevgi uşaqlıq yaşlarında başlamalıdır. Demək olar ki, opera yarandığı gündən onun dinləyicisinin sayı az olub. Dünyanın çox yerlərində operaya maraq demək olar az göstərilir”.

"Kaspi” qəzetinin baş redaktoru İlham Quliyev bildirib ki, konsertin informasiya dəstəkçisi "Kaspi” qəzetidir: "Kaspi” qəzeti bu günə kimi bir çox belə konsertlərin informasiya dəstəkçisi olub. Oya xanım ümumilikdə uzun müddətdir Azərbaycanda yaşayır. Ən əsası odur ki, Oya xanım Azərbaycanı sevir. O, fəaliyyətində Azərbaycan mədəniyyətinin təbliğinə xüsusi yer verib. Rəşid Behbudovun dünya səviyyəsində tanıdılmasında dəstək verir. Ona görə də "Kaspi” qəzeti özünə bir borc hesab edir ki, Oya Ergünün bütün tədbirlərinə informasiya dəstəyi versin”.

Daha sonra məşhur müğənni jurnalistlərin suallarını cavablandırıb. Məşhur müğənni çıxışının sonunda onu hər zaman dəstəkləyən dəyərli şairə Sona Vəliyevaya, millət vəkili Qənirə Paşayevaya öz dərin təşəkkürünü bildirib./AZADİNFORM/

Məşhur müğənni Oya Ergün sabah konsert verəcək

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə