Leyli Yekta: ”Təəssüf ki, İsveçdə Azərbaycan musiqisi tanınmır”

14:21 / 28.09.2017

Oktyabrın 6-da İsveçdə yaşayan həmvətənimiz Leyli Yekta və isveçli Nils Larson Bakıda kamera və orqan musiqisi ilə çıxış edəcəklər. Qeyd edək ki, Azərbaycan musiqiçisinin əcnəbi musiqiçi ilə ortaq ifası müsbət dəyərləndirilməlidir. Bu gün Avropada Azərbaycan mədəniyyətinin və musiqisinin təbliğatı istiqamətində müəyyən işlər aparılır. Avropanın tərkib hissəsi olan İsveçdə vəziyyət necədir? Musiqiçi Leyla Yekta diaspor üzrə araşdırmaçı jurnalist Elnur Eltürkün suallarını cavablandırıb.

- İlk öncə oxucularımıza özünüz haqqında məlumat verərdiniz.

-Azərbaycanda dünyaya göz açmışam. İlk musiqi təhsilimi orada almışam. Ü.Hacıbəyov adına Azərbaycan Dövlət Konservatoriyasını piano ifaçılıq üzrə Cahangir Qarayevin sinfini 1991-ci ildə, aspiranturanı isə Kamera ansamblı üzrə 1998-ci ildə bitirmişəm. Həmin ildə İsveçin Stokholm şəhərinə köçdükdən sonra qərara gəldim ki, musiqi təhsilimi orada davam etdirim. Beləliklə, Stokholm şəhərinin Krallıq Musiqi Akademiyasının orqan fakültəsində 5 il oxuyub oranı bitirdikdən sonra aspiranturaya daxil oldum və müvəffəqiyyətlə həmin təhsilimi də başa vurdum. Hal-hazırda Stokholmun mərkəzi kilsələrinin birində orqan ifaçısı kimi çalışıram.

-İsveç cəmiyyətində Azərbaycan musiqisi haqqında təsəvvürlər necədir?

-Təəssüflər olsun ki, Azərbaycan musiqisi İsveç xalqı arasında çox da tanınmayıb. Buna görə də ən əsası Azərbaycanın musiqisini, mədəniyyətini və zəngin tariximizi təbliğ etməyi özümə borc bilirəm. Bununla əlaqədar qeyd etmək istəyirəm ki, bu ilin iyul ayında öz solo konsertimi təşkil edib, məşhur bəstəkarlarımızın əsərlərini ifa etdim. Konsertim Stokholm şəhərinin mərkəzi kilsələrinin birində keçirildi və böyük rezonans yaratdı. Bu fakt məni çox ilhama gətirdi. Beləki, yeni fikirlər üzərində işləmək üçün stimul yaratdı. Mənim gələcək planlarım arasında Azərbaycan musiqisini təbliğ etməklə ölkələrimiz arasında bir mədəniyyət körpüsü yaratmaq durur.

-Azərbaycan diaspor təşkilatları dəstək olurmu?

-Təəssüflə qeyd etməliyəm ki, Azərbaycan diaspor təskilatlarından bu zamana kimi dəstək olmayıb.

-Qarşıda hansı layihələriniz gözlənilir?

-Yuxarıda qeyd etdiyim kimi, gələcəkdə müxtəlif planlar haqqında fikirləşirəm və əminəm ki, mənim fəaliyyətim Azərbaycan və Avropa ölkələri arasında mədəniyyət əlaqələri yaratmaq və onları inkisaf etdirmək üçün mühüm rol oynayacaq. Qeyd edim ki, Bakı konsertimdən sonra noyabr ayında mənim Praqa şəhərində konsertim gözlənilir.

Leyli Yekta: ”Təəssüf ki, İsveçdə Azərbaycan musiqisi tanınmır”

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə