“Səs Azərbaycan” musiqi yarışmasının qalibi məlum olub

Ən baxımlı musiqi yarışması – “Səs Azərbaycan”ın (“The Voice Of Azerbaijan”) qalibi məlum olub. Prezident İlham Əliyevin təşəbbüsü və dəstəyi ilə keçirilən, hazırlıq prosesi və yarış müddəti ümumilikdə 8 ay sürən “Səs Azərbaycan” musiqi yarışması milyonlarla tamaşaçını Azərbaycan Televiziyasının (AzTV) ekranı qarşısına topladı.

Gənc istedadları üzə çıxarmağa xidmət edən, musiqisevərlər tərəfindən böyük maraqla qarşılanan bu müsabiqəni də AzTV uğurla təqdim etdi.

“Səs Azərbaycan” ölkəmizdə keçirilən və Azərbaycan Televiziyası ilə tamaşaçılara təqdim olunan ilk musiqi yarışması deyil. Prezident İlham Əliyevin və Heydər Əliyev Fondunun prezidenti Mehriban Əliyevanın genişmiqyaslı fəaliyyəti nəticəsində indiyədək beynəlxalq forumlar, eləcə də milli mədəniyyətimizin təbliği istiqamətində bir sıra nəhəng yarışmalar uğurla keçirilib. Avropanın nüfuzlu “Eurovision” mahnı müsabiqəsində qalibiyyətimiz bu mötəbər yarışı 2012-ci ildə ölkəmizə gətirdi. Azərbaycan bu yarışmaya yüksək səviyyədə ev sahibliyi etməklə öz adını “Evrovision” tarixinə qızıl hərflərlə yazdı. Bu baxımdan ilk Avropa Oyunlarının məhz Azərbaycanda keçirilməsi ilə bağlı qərar təsadüfi deyildi. Mötəbər yarış yüksək səviyyədə keçirilməklə yanaşı, tamaşaçılara da peşəkarlıqla təqdim olundu. İlk Avropa Oyunlarının mükəmməl yayımını “Azərbaycan Televiziyası” və “İdman-Azərbaycan” kanalı yüksək keyfiyyətlə həyata keçirdi, tamaşaçılara yarışları zövqlə izləmək imkanı yaratdı. Heydər Əliyev Fondunun dəstəyi, Azərbaycan Mədəniyyəti Fondunun layihəsi, Azərbaycan Televiziyasının təşkilatçılığı, Mədəniyyət və Turizm Nazirliyinin iştirakı ilə keçirilən, muğam sənətini yaşatmağa xidmət edən “Muğam televiziya müsabiqələri” də ölkəmizdə, eləcə də ondan kənarda böyük tamaşaçı sevgisi qazandı. AzTV 5 dəfə muğam müsabiqələrini yüksək peşəkarlıqla təşkil etdi və yayımladı.

Növbəti – dünya miqyaslı layihə isə dövlətimizin başçısının təşəbbüsü və dəstəyi ilə reallaşdı: dünyanın ən nüfuzlu mahnı müsabiqəsi, 50-dən çox ölkədə lokal versiyaları yayımlanan “The Voice” – “Səs” ölkəmizə gətirildi.

Niderlandın “Talpa” şirkətinə məxsus layihənin lisenziyası Azərbaycan Televiziyasına verildi və 2015-ci ilin iyulundan işlərə başlandı. Yayım hüququnun məhz AzTV-yə verilməsi təsadüfi deyildi. Televiziyanın canlı yayımlarda kifayət qədər təcrübəsi, müasir maddi-texniki bazası, peşəkar kadr potensialı lisenziyanın alınmasında və layihənin uğurla başa çatdırılmasında həlledici rol oynadı.

Azərbaycan Televiziyası yarışın təşkili üçün hazırlıq prosesi və seçim turlarında 600 kvadratmetrlik, yarışmanın əsas hissəsində 1200 və 900 kvadratmetrlik çəkiliş pavilyonlarını yayımın yüksək səviyyədə təşkili üçün 16 kameralı HD formatlı səyyar televiziya avadanlığı, onlarla əlavə kamera və mikrofon, yüzlərlə işıq avadanlığı, 200 kvadratmetrdən artıq veb-ekranlar, operativ və yüksək peşəkar standartlara uyğun montaj studiyaları ilə təmin etdi. Layihənin ərsəyə gəlməsinə 200 yerli, onlarla xarici mütəxəssis cəlb olundu.

Dörd ay ərzində iştirakçılar tamaşaçılar qarşısında çıxış etdi, müxtəlif janrlarda mahnılar oxudular. Həm özləri həyəcanlandı, həm ustadları öz yetirmələrinin ifasını böyük sevgi və nigaranlıqla izlədi, həm də yüz minlərlə tamaşaçı bu ifalardan zövq aldı. Yarışa Azərbaycanın bütün bölgələrindən 3000-ə yaxın ərizə qəbul olunmuşdu. Namizədlərdən 100 nəfər seçildi və onların da 56 ən yaxşısı yekun mərhələyə vəsiqə qazandı. “Səs Azərbaycan” həm də onu sübut etdi ki, bu gün ölkənin nəinki iri şəhərlərində, həmçinin rayon və kəndlərində də dünya musiqisinin müasir trendlərindən xəbərdar olan minlərlə gənc var: onların davranışı, dünyagörüşü, düşüncə tərzi müasir Azərbaycan gəncinin modelidir. Bu da təbii ki, ölkədə gənclər siyasətinin düzgün məcrada getdiyinin sübutudur. Layihədə təkcə Azərbaycanın deyil, Rusiya, Ukrayna, Almaniya, Niderland, Türkiyə, ABŞ, Gürcüstan və digər ölkələrdən ifaçılar da öz güclərini sınamışdı. Yeri gəlmişkən, final günü – martın 5-də Azərbaycanda Bədən Tərbiyəsi və İdman Günü qeyd olunurdu və yekun yayımın məhz bu günə salınması təsadüfi deyildi. Bununla Azərbaycan Televiziyası gənclər gününə növbəti töhfəsini verdi.

Yarışın formatına uyğun olaraq, final günündə Bakcell operatorlarına göndərilən səslər qalibi müəyyən edəcəkdi. Birinci yerə iddialı, sona qalan 2 nəfər – Mübariz Tağıyevin tələbəsi Emiliya Yaqubova və Faiq Ağayevin tələbəsi Hüseyn Abdullayevin həyəcanını təsəvvür etmək belə mümkün deyildi.

Hamı çox böyük həyəcan və maraqla Azərbaycanın “Səs”inin kim olacağını gözləyirdi...

Qalibi tamaşaçıların göndərdiyi “sms”lər müəyyənləşdirdi. 90283 səs Emiliya Yaqubovanı yarışın birincisi etdi.

“Səs Azərbaycan” milyonlarla insanın qəlbini ovsunlayan musiqinin bayramı, təntənəsi və qələbəsi idi.

Qalib ifaçıya 30000 manat məbləğində pul mükafatı verildi. Bununla yanaşı, onun tanıdılması istiqamətində yeni mahnının yazılması, təbliğatı reallaşdırılacaq.

Beləliklə, 200 nəfərdən artıq insanın çalışdığı bu nəhəng layihə son akkordlarını vurdu. 4 ay ərzində hər həftə Azərbaycan Televiziyası sizin evinizdə bayram ab-havası yaşatdı. Bununla da, Azərbaycan mədəniyyətinin dünya təbliğində növbəti uğura imza atıldı.