Elçin Hüseynovu qınadılar: “Bu, iyrənclikdir”

 Bir müddət əvvəl müğənni Elçin Hüseynovun məclislərin birinə beş cangüdənlə gəlməsi social şəbəkələrdə müzakirəyə səbəb olub. İfaçının cangüdənlərin xidmətinə ehtiyac duymasını təqdir edənlər olsa da, əksəriyyət onun bu addımını qınayıb. Ümumiyyətlə, sənə adamının toya, yaxud hansısa məclisə cangüdənlə getməsi nə dərəcədə doğrudur?  “Reytinq” qəzeti məzələ ilə bağlı bir qrup ictimaiyyət nümayəndələrinin, ziyalıların fikirlərini öyrənib.

 Respublikanın əməkdar artisti Lalə Məmmədovaya görə bu, mütləqdir. Amma reklam xarakteri daşımamalıdır:

 “Əgər toy, el şənliyini nəzərdə tutursunuzsa, nəzərə almaq lazımdır ki, orada içkili insanlar olur deyə xoşagəlməz hadisələrin baş verməsi də mümkündür. Çəkilişlərdə isə müxtəlif tipli insanlarla qarşılaşırıq. Məsələn, bir dəfə çəkiliş sonrası mənə əl verib görüşən insanın siflis xəstəsi olduğunu öyrəndim. Yəqin ki, həmin an hansı vəziyyətə düşdüyümü deməyə ehtiyac yoxdur. Ümumiyyətlə qadın müğənnilər iş məkanlarına tək getməməlidirlər. Ancaq yeni addım atan ifaçıların mühafizəçi ilə görünmsəi məndə yalnız gülüş doğura bilər. Onların bu hərəkəti insanlarda özləri haqda tanınmış ifaçı təsəvvürü yaratmaqdır. Yaxşı olardı ki, onlar əvvəlcə ifa, səhnə mədəniyyəti, intellekt qabiliyyətlərinidüşünsünlər, sonra imic”.

 Satirik şair Əvəz Qurbanlı bildirib ki, sənət adamlarının mühafizəçilərlə gəzib-dolanması təkcə Azərbaycanda deyil, dünyanın hər yerində mövcuddur və hər kəsin, qanunun və əxlaq qaydalarının yol verdiyi çərçivədə müstəqil hərəkət etmək haqqı var. Əgər hansısa hərəkətinlə başqalarının haqqını tapdamırsansa, narahatlıq yaratmırsansa, o hərəkəti etməkdə azadsan. Bizim sənət adamlarının mühafizəçilərlə dolaşmağına gəldikdə, Əvəz Qurbanlı hesab edir ki, bunun bir neçə səbəbi var:

“Birincisi, sənət adamı məşhur olduğu üçün və ya məşhur olmaq istədiyi üçün diqqət cəlb edir. Yaxud da cəlb etməyə çalışır. İkincisi toylarda arzuolunmaz hallarla qarşılaşmamaq üçün bu addımı atırlar.  Üçüncüsü ehtiyac olmasa da, bir-birinin bəhsinə mühafizəçi saxlayırlar. Mən düşümürəm ki, bizim müğənnilərimizin xaricdəki həmkarları kimi fanat ordusu olsun və bu baxımdan qorunmağa çalışsın. Bizim sənətçilərimiz ən çox, öz günahlarından qorunmaq üçün mühafizəçi saxlayırlar. Məsələn, hansısa həmkarına etdiyi pisliyin müqabilində "cavab zərbəsi" almaq qorxusu var. Yaxud, insanların nifrətini qazandıqlarından qorxduqları üçün belə edirlər və s. Mən demirəm, bütün sənətçilərimiz belədir. Amma mühafizəçi ilə "fırlanan" sənətçilərin böyük əksəriyyəti belədir”.

Yazçı-dramaturq Firuz Mustafa isə ümumiyyətlə yaradıcı adamların hər hansı bir yerə mühafizəçilərlə getməsinə yaxşı baxmır:

“İndi bir çox şeylər dəbə minib, o cümlədən "canqoruyanlarla" hərəkət etmək, onların xidmətindən istifadə etmək. Bu məsələyə yalnız bir cəhətə görə haqq qazandırmaq olar: indi gənclərin bir çoxu özlərinə lazımi iş yerləri tapa bilmir, bekarçılıqdan bekar işlərə baş qoşurlar. Olsun ki, "mühafizəçi" işi haradasa onların karına gəlir. Əlbəttə, əgər bu işi "iş yeri" hesab etmək olarsa...”

Tanınmış aktyor, respublikanın əməkdar artisti Fizuli Hüseynovun məsələyə münasibəti isə çox qısa və konkret olub: “Vallah nə deyim, sənətçi mühafizəylə gəzirsə, bədbəxtdir demək! Bu, xəstəlikdi və belələrinin müalicəyə ehtiyac var”

 Aktyor Faiq Mirzəyev də sənət adamının mühafizəçiylə gəzməsinə yaxşı baxmır:

“Onlar bunu piar üçün edirlər. Amma yüngül piardır, bayağı görünür. Çünki sənətdə heç bir izləri yoxdur. Yenə Zeynəb Xanlarova mühafizəçiylə gəzsə, haqq qazandırmaq olar”.

Aktyor “özünüz nə vaxtsa mühafizəçi ilə gəzərsiniz” sualına belə cavab verib: “Bizim böyük sənətkarlarımızın heç biri mühafizəçi ilə gəzməyib. Nə Ələsgər Ələkbərov, nə Hökumə Qurbanova, nə Ağadadaş Qurbanov, nə də Nəsibə Zeynalova. Əgər söhbət müğənnilərdən gedirsə, mən nə Müslüm Maqomayev kimi dahini,  nə də Zeynəb xanımı mühafizəçiylə görməmişəm. İndikilərin etdiyi hoqqabazlığı görəndə ətim tökülür. Mən o vaxt mühafizəçiylə gəzərəm ki, çox böyük bir uğurum olsun, fanatların əlindən sərbəst gəzə bilməyim üstümə atılsınlar, mühafizəçi də onların qarşısını kəssin. Yoxsa iki mahnı oxuyub, üç dəfə də efirə çıxandan sonra elə bilirlər ki, Maykl Cekson, ya da Ledi Qaqadılar. Bunu dərk etmək lazımdır ki, əgər sən toylara gedirsənsə, deməli əlçatmaz deyilsən. Məntiqlə belə çıxır ki, onlar söz atıb ələ salanlardan qorxurlar”.

 Təşkilatçı Samir Xəttab isə düşünür ki, istənilən tanınmış adamın mühafizəçiyə ehtiyacı var: “Dünya təcrübəsində də bu tətbiq edilir. Normal  haldır”

 Tanınmış rəqqas-xoreoqraf Şəhriyar Cəfərov isə düşünür ki, içki məclisidirsə hər an arzuolunmaz vəziyyət yarana bilər: “Fiziki təzyiqlərdən, yesiz davranışlardan qorunmaq üçün məclislərə cangüdənlə gedənləri anlamaq olur. Çünki hər hansı tərbiyəsizliyə sənət adamının özünün cavab verməyi düzgün ddeyil.  Hətta cavabını verə bilsə də, cavab verməməlidir”.

Gənc müğənni Əminə Şirin də düşünür ki, sənət adamı mühafizəçiylə gəzə bilər: “Kimsə düşmənli ola bilər. Nəinki toyda, hətta yaşadığı binanın alaqapısının ağzına da mühafizəçi qoya bilər. Məncə bu çox normaldır. Burda söhbət müğənninin səviyyəsindən getmir. Ən səviyyəsiz müğənninin də kiminləsə düşmənçiliyi ola bilər”.

 Yazar Cəlil Cavanşir isə hesab edir ki, bu, iyrənclikdir:

“İyrənclikdir. Azərbaycanda bu cür hərəkət edən müğənniləri heç bir tədbirə dəvət etməmək lazımdır. Yekəxanalıq və görməmişliyin əlamətidir. Xalq onlardan qorunur, onlar kimdən çəkinir? Kimə lazımdır onları narahat etmək? uzaq başı bir şəkil çəkdirərlər. Yoxsa lovğalanmaq üçün arxasında boynuyoğun idmançı gəzdirmək tərbiyəsizliyin böyüyüdür. Bu xalqın çörəyini yeyib, bu xalqdan qorunan, uzaq dayanan, məsafə saxlayan adamlara gərək Azərbaycan insanı etiraz etsin. Çağırmasınlar belə debil müğənniləri.

Tanınmış xəbər aparıcısı Nəsimi Nəbizadə  məsələyə yarızarafat cavab verdi:

“Qadındısa bəlkə evdən tək buraxmırlar? Ola bilər...”

 Jurnalist Fuad Mədətov isə düşünür ki, sənət adamı mühafizəçidən istifadə edirsə, bəzi hallarda hörmətsizlikdir: “Amma onu da nəzərə al ki, toyda sərxoşlar çox olur və əsasən özlərini onlardan qorumaq üçün mühafizəçidən istifadə edirlər. Ümumiyyətlə, mühafizəçisi olmayan bir çox müğənnilər var ki, toylarda sərxoş olub-olmamasından asılı olmayaraq, hörmətə layiq qarşılanırlar. bunu da nəzərə alaq”.

 Aşıq Namiq Fərhadoğlu isə düşünür ki, müğənni toya cangüdənlə getməməlidir:

“Toyda yox, amma konsertdə ola bilər”

 İntiqam Valehoğlu