Bir məktub, bir ailənin sevinci...

İnternet əsrinin faydalarından yararlanan vətəndaşlarımız ən ucqar yerlərdə belə indi məktubu yazmağa da, göndərməyə də çətinlik çəkmirlər. Görülən işlərin nəticəsidir ki, hər bir vətəndaş Daxili İşlər Nazirliyinin saytını, onun mətbu orqanı olan “Mübariz keşikdə”qəzetini sözlərinin eşidiləcəyi bir tribuna hesab edir və əmindirlər ki, şikayətləri də, minnətdarlıqları öz  ünvanına yetişəcək.

Məktub göndərməyin də, onu oxumağın da bir ayrı sevinci, ləzzəti var. Bu illər ərzində ünvanına çatan onlarla məktubun sevincini yaşamaq bizim də  nəsibimiz olub. Belə sevincli anlardan daha birini sizinlə də bölüşürük.

 “Respublikamızda vüsət alan quruculuq-abadlıq işləri, qaçqın və məcburi köçkün soydaşlarımız, şəhid və əlil ailələri üçün üçün yeni yaşayış massivlərinin salınması,  yeni iş yerlərinin açılması və bir çox digər uğurlu layihələri saymaqla qurtarmaz. Yaşadığım Sabirabad rayonu da günü-gündən gözəlləşir, simasını dəyişir.  Hacıqabul-Bəhramtəpə yolunun yenilənməsi Sabirabadı paytaxt Bakı ilə daha sıx birləşdirib. Hazırda rayonumuzda fəaliyyət göstərən regional ASAN Xidmət Mərkəzi insanlarımızın işinin, sözün əsl mənasında, asanlaşmasına kömək edir. Əlbəttə, bütün bu nailiyyətlərin əsasında ulu öndərimizin müdrik siyasi xətti, onu uğurla həyata keçirən möhtərəm Prezidentimizin yorulmaz səyləri, ölkədə çox böyük zəhmətlər bahasına yaradılan sabitliyin, əmin-amanlığın rolu vardır...”

Bu sətirlər Eldar Məmmədovun redaksiyamıza göndərdiyi məktubundandır.  Məktubu oxuduqca bir daha əmin olursan ki, görülən iş, çəkilən zəhmət, ən əsası,  vəzifə borcu hesab etdiyimz çətin və məsuliyyətli xidmətimiz insanlar tərəfindən layiqincə qiymətləndirilir.

Yeri gəlmişkən, insanlar indi  polisə təkcə cinayətkarlıqla mübarizə aparan, sabitliyi qoruyan, onun pozulmuş hüquq və azadlıqlarını müdafiə edən bir dövlət qurumu kimi baxmır, həm də ona arxa, dayaq, əzizi bildiyi bir dost-doğma kimi baxır.

Məktubdan daha sonra oxuyuruq: “Şirvan şəhərində vətəndaşların problemlərinin həlli ilə bağlı qəbul həyata keçirən daxili işlər naziri cənab Ramil Usubovun qəbulunda oldum. Ali məktəbi bitirdikdən sonra işsiz qalan 3 övladımın birinin işlə təmin olunması üçün ona müraciət etdim. Qəbul zamanı hörmətli nazirimizin səmimiyyəti, nəzakəti, ən əsası qəbulu tam şəffaf keçirməsi məni heyran etdi. Övladımın sənədlərinə baxış keçirildi, lazımı prosedurlardan sonra qısa müddət ərzində qızım ASAN Xidmət Mərkəzində işlə təmin olundu.”...

Eldar Məmmədovun məktubu rəngdən, boyadan, pafosdan çox uzaqdır. Oxuduqca hiss olunur ki, bu sətirlər sadə bir vətəndaşın ürəyindən qopub, cümlə-cümlə ağ vərəqə hopub.  Bir müxbir marağı ilə gözlərim məktubun sonunda müəllifin telefon nömrəsini axtardı. Yazılmamışdı. Bəlkə ağsaqqal bunu yazmağı unutmuşdu. Sabirabad RPŞ ilə əlaqə saxlayıb əlaqə nömrələrimin E.Məmmədova çatdırılmasını xahiş etdim. Yarım saat keçdikdən sonra mobil telefonuma zəng gəldi. Xəttin o başından mülayim bir səs eşidildi:

 “Sizi Sabirabaddan Eldar Məmmədov narahat edir.”

Və söhbətimizə bir dost körpüsü salındı.  Dedi ki, üç qız atasıdır. Bir valideyn, vətəndaş olaraq bu gün onların gələcəyindən narahat deyil. Bilir ki, onların gələcəyinin qarantı gündən-günə daha böyük uğurlara doğru yol alan Azərbaycan dövləti və ulu öndərin layiqli davamçısı, möhtərəm Prezidentimizdir. Bu gün dövlət hər bir vətəndaşına sahib çıxır, yiyə durur, onu düşünür, onu qoruyur. Sağ olun, sağ olsunlar...”