Ukrayna mətbuatında yeni prezident Petro Poroşenkonun Rusiyaya qarşı sanksiyaların dayandırlması ilə bağlı bəyanatı yer aldı.

Xatırladaq ki, bir müddət öncə, Rusiya Ukraynaya satdığı qazın ödəniş sistemində dəyişiklik edərək, məbləğin əvvəlcədən ödənilməsini tələb edirdi. Məlum məsələdir ki, Ukraynanın Rusiyaya kulli miqdarda borcu olduğu halda belə bir addımın atılması qazın, ümumiyyətlə, satışını dayandırmaq məqsədi daşıyırdı.

Baş verən bu prosesləri Aktual.az-a Prezident Yanında Dövlət İdarəçilik Akademiyası Siyasi Araşdırmalar İnstitutunun rəhbəri, politoloq, professor Elman Nəsirov şərh edib. O bildirib ki, Ukraynanın seçimi əvvəlcədən bəlli idi:

“Ukrayna, Moldova, Gürcüstan birmənalı şəkildə özlərinin xarici siyasətlərində Qərb istiqamətini prioritet seçmişdilər və buna müvafiq olaraq da, hər üç dövlət Avropa İttifaqı ilə əməkdaşlığın daha da dərinləşdirilməsi, perspektivdə Aİ-na üzvlük məsələsini gündəmə gətiriblər. Burada heç bir manipulyasiya siyasətinin yeri yoxdur. Seçim, vektor birmənalıdır. Bu seçiminə görə, Ukraynanın hansı təhlükələrlə, problemlərlə üzləşdiyi də bəllidir. Belə olan təqdirdə, məlum Ukrayna böhranı və Krımın ilhaqından sonra bir sıra ekspertlər, haqlı olaraq, qeyd edirdilər ki, bu vəziyyətdə Rusiya, tamamilə, Ukraynanı itirmiş oldu. Yəni artıq Ukraynanın seçimi birmənalıdır və bu, gözlənilən idi”.

Politoloq qeyd edir ki, Saakaşvili hakimiyyətdən getdikdən sonra bəzi qüvvələr düşünürdülər ki, Gürcüstanın Rusiya ilə yaxınlaşma tendensiyası olacaq:

“ Saakaşvilidən sonra yeni hakimiyyətin Avropa İttifaqı ilə münasibətlərə fərqli prizmadan yanaşacağını deyirdilər. Oxşar yanaşma Moldova münasibətlərində də var idi. Amma hadisələrin sonrakı gedişatı göstərdi ki, Ukrayna ilə yanaşı Gürcüstan və Moldovanın da seçimi birmənalıdır. Onlar Avropa İttifaqına daxil olmaq yolunu seçiblər və bu istiqamətdə mərhələli şəkildə inteqrasiya prosesini həyata keçirirlər. Bu nöqteyi- nəzərdən hesab etmək olar ki, hər üç dövlətin Avropa İttifaqında azad ticarət zonası ilə saziş imzalaması məntiqi və gözlənilən proses idi”.

E. Nəsirov Ukraynanın yeni prezidenti Poroşenkonun Rusiyaya sanksiyaların dayandırlması ilə bağlı çıxışına da toxunub:

“Ukraynanın yeni prezidenti Petro Poroşenko onun fərqindədir ki, Qərbin Ukraynaya dəstəyi, hələ ki, onların gözlədiyi səviyyədə deyil. Bu səbəbdən də Rusiya amilini nəzərə almaq lazımdır. Ona görə də, Poroşenko Rusiya ilə bağlı siyasətində yumşaq hakimiyyət elementlərinə üstünlük vermək xəttini seçib.

Hazırda Avropada Ukraynaya çox nikbin yanaşırlar. Təsadüfi deyil ki, Poroşenkonun AŞPA sessiyasında olması onun sürəkli alqışlarla qarşılanması ilə nəticələnmişdi. Ukrayna, sözsüz, Avropaya inteqrasiya istiqamətini seçib. Belə olan halda, Rusiya ilə münasibətlərin kəskinləşməşi həmin seçimin reallaşması yolunda suni əngəllərin yaranmasına gətirib çıxara bilər. Ukrayna prezidenti Poroşenko Rusiya ilə münasibətdə yumşaq siyasət yeridərək, sanksiyaların dayandırılması tələbi ilə çıxış edib. Proqnozlaşdırmaq olar ki, Poroşenkonun bu jesti Moskvada müsbət qiymətləndiriləcək.

Digər tərəfdən, Ukrayna prezidentinin məlum çıxışı Ukrayna ilə Rusiya arasında qaz problemi ilə bağlıdır. Bir müddət əvvəl Rusiya Ukraynaya satdığı qazın ödəniş sistemində etdiyi dəyişiklik, əslində, Ukraynaya qazın verilişinin dayandırılması məqsədi daşıyırdı. Poroşenko hesab edir ki, Rusiyaya qarşı bu jesti həmin problemin həll olunmasında rol oynaya bilər”.