Peşəkarlıq, məsuliyyət və nizam-intizam uğurların açarıdır

Ölkəmizdə beynəlxalq tədbirlərin, idman yarışlarının keçirilməsi artıq ənənə halını alıb. Bütün bunların əsas səbəbi, əcnəbilərin özlərinin də etiraf etdiyi kimi, Azərbaycanda sabitliyin olması və onun yüksək səviyyədə qorunmasıdır.  Əlbəttə, sabitlik olan yerdə inkişaf da var, rifah da. İllərin sınağından çıxan, ən çətin tapşırıqların öhdəsindən layiqincə gəlməyi bacaran DİN-in Cevik Polis Alayı da sabitliyin, asayişin sayıq keşikçisidir.

         Yeri gəlmişkən, gələn il ölkəmizdə keçiriləcək I Avropa Oyunlarına hazırlıq prosesində ictimai qaydanın qorunması və ictimai təhlükəsizliyin təmin olunması ilə bağlı tədbirlər planına müvafiq olaraq, alaya gənc əməkdaşların seçimi zamanı xarici dil bilən namizədlərə üstünlük verilmiş, ingilis dilini bilən əməkdaşların biliklərinin artırılması üçün müvafiq tədbirlər görülmüş, 300 əməkdaş ingilis dili məşğələlərinə cəlb olunmuş və onlara müfaviq şərait yaradılmışdır.

         May ayının 27-dən iyun ayının 2-dək gənclər arasında atletika üzrə Avropa Olimpiya  təsnifat yarışlarının və iyun ayının 10-dan 16-dək bədii gimnastika üzrə Avropa çempionatının Bakıda keçirilməsi ilə əlaqədar yarışların keçiriləcəyi məkanlarda nəzarət-buraxılış rejiminin təşkili, habelə ölkəmizə təşrif buyurmuş xarici qonaqların qalacaqları ərazilərdə ictimai qaydanın qorunması və ictimai təhlükəsziliyin təmin edilməsi üçün alayın əməkdaşları may ayının 25-dən iyun ayının 17-dək xidmətə cəlb edilmiş, tədbirlərin keçirildiyi müddət ərzində heç bir qanun pozuntusu qeydə alınmamışdır.

         Alayın əməkdaşları tərəfindən bu ilin 6 ayı ərzində müxtəlif cinayət və inzibati xəta törətmiş 12876 şəxs (cinayət-axtarış xətti üzrə 308, o cümlədən soyğunçuluğa görə 10, oğurluğa görə 80, xuliqanlığa görə 84, narkotik vasitələrin qanunsuz dövriyyəsinə görə 80, dələduzluq etdiyinə görə 7, habelə digər cinayətlərə görə 15 nəfər) tutularaq məsuliyyətə cəlb edilmişdir. Avara və dilənçilik etdiyinə görə 619, müəyyən olunmayan yerdə alverlə məşğul olan 1560, polisin qanuni tələbinə tabe olmayan 93, pasport rejimini pozan 2064 nəfər, şübhəli şəxs qismində və digər hallara görə saxlanılanlar aidiyyatı polis bölmələrinə təhvil verilmişdir.

         DİN-in göstərişləri, tələbləri rəhbər tutularaq, vətəndaşların hüquqlarının qorunması, bu sahədə mövcud qanunvericiliyin tələblərinə riayət olunması diqqət mərkəzində saxlanılır, vətəndaşların müraciətlərinə baxılması zamanı haqlı tələblərin təmin edilməsinə xüsusi diqqət yetirilir, polis nəfərləri tərəfindən vətəndaşlara qarşı ciddi qanun pozuntuları törədildiyi halda sərt cəza tədbirləri görülür, şikayətlərin, xüsusən təkrar və kollektiv müraciətlərin yaranma səbəbləri, onların artımına təsir edən amillər ətraflı araşdırılaraq lazımı tədbirlər həyata keçirilir.

         İdman nailiyyətlərinin əldə olunmasında, ölkə və beynəlxalq yarışlarda ölkəmizi təmsil edənlərin sırasında “çeviklər”in xüsusi yeri var.

Belə ki,  2014-ilin martında keçirilən güc çoxnövçülüyündə, aprel ayında keçirilən atıcılıq üzrə, Respublika gününə həsr olunmuş  xidməti çoxnövçülük üzrə keçirilən yarışda ÇPA komandası 1-ci yeri tutmuşdur.  O, ümumilli liderimizin doğum gününə həsr edilmiş estafet qaçışında ikinci, güc coxnövçülüyündə isə I  yerə layiq görülmüş,  DİN-in orqan və hissələri arasında atəş üzrə keçirilən yarışda III, həmin ay sərbəst güləş üzrə keçirilən yarışda da Alayın komandası üçüncülüklərini qoruyub-saxlamışdır.  İyun ayında Bakı şəhərində poverliftinq növü üzrə keçirilən Avropa çempionatında Alayın xüsusi təyinatlı I taborunun polis nəfəri, polis serjantı Ramin İrzazadə  3-cü yerə layiq görülmüşdür.

Yazını hazırlayarkən Alayın əməkdaşı, I taborun 1-ci bölüyünün polis serjantı Elşən İbişovun iyulun ayının 11-dən 21-dək Belçikanın Brüssel şəhərində keçirilən cui-citsu üzrə “Ümumavropa Oyunlarında” 1-ci yeri qazanması xəbərinin də sevincini yaşadıq.

Keçən altı ayda görülən işlərə nəzər salarkən Alay komandiri, polis polkovniki Zaur Abdullayev bunları dedi:

- Şəxsi heyət yaxşı bilir ki, hər bir uğurun açarı məsuliyyətli, nizam-intizamlı olmaq və verilən tapşırıqları vaxtında, dəqiq yerinə yetirməkdir. Məhz görülən işlərin nəticəsidir ki, sabitliyin qorunmasında və ictimai asayişin keşiyində fərqləndiklərinə görə Alayın Qərargah rəisinin döyüş təlimi üzrə müavini, polis mayoru Fariz İsmayılov və III patrul bölüyünün komandiri, polis mayoru Rizvan Zeynalov “İgidliyə görə” medulla təltif edilmiş, Azərbaycan Polisinin yaranmasının 96-cı ildönümü münasibətilə 2 əməkdaşa  mükafat qaydasında xüsusi rütbələr verilmişdir.

İnanırıq ki, Çevik Polisi Alayı bundan sonra da xidməti fəaliyyətində, cinayətkarlıqla mübarizədə, istimai asayişin qorunmasında əldə etdiyi uğurların sayını daha da artıracaqdır.