Vətəndaş kömək umur, kömək görür...

Bu gün polis-vətəndaş münasibətləri yüksələn xəttlə inkişaf edir. Təcrübə göstərir ki, polisin işi və xidmət dairəsi digər hüquq-mühafizə orqanları ilə qarşılıqlı əlaqələrlə məhdudlaşmır və o, cinayətlərin üstünün açılmasında vətəndaşın köməyinə hər zaman ehtiyac duyur. Bir çox cinayətlərin vətəndaşlarımızın səyi ilə açılması deməyə əsas verir ki, ölkəmizdə sabitliyin, əmin-amanlığın vətəndaşın özü üçün daha çox vacib olduğunun cəmiyyət fərqindədir və bu, eyni zamanda, sosial narahatlıq yaradan hallara qarşı birgə mübarizəni gücləndirir...

Paytaxtda və yerlərdə vətəndaşların qəbulu, polis-vətəndaş həmrəyliyi ürəkaçan bir mənzərə yaradır. Sabirabadda ezamiyyətdə olarkən bunun bir daha şahidi oldum.

Rəis, polis polkovniki Mübariz Quliyev gəlişimin məqsədini biləndən sonra “Bəlkə də bu bir təsadüfdür”,- deyib məni Ulacalı kəndində vətəndaşlarla keçiriləcək görüşə dəvət etdi. 

Xatırladım ki, Ulacalı Sabirabadın ən böyük kəndlərindən biridir, sakinləri elmə, biliyə xüsusi münasibəti ilə seçilirlər. Bu görüşün kənd orta məktəbinin akt zalında keçirilməsi də bu mənada təsadüfü deyildi.

Görüşdən xəbər tutan qonşu kəndlərin sakinləri də gəlmişdilər. Rəis onlarla hal-əhval tutduqdan, vəziyyətlərini öyrəndikdən sonra gəlişinin məqsədini bir daha xatırlatdı və dedi ki, hər dəfə insanlarla görüşə gələndə, onları dinləyəndə dövlətin ona verdiyi səlahiyyətləri yenidən xatırlayır, ən ümdəsi, göstərilən etimadı doğrultmağın məsuliyyətini dərk edir.

"Mən Ulacalıya dəfələrlə gəlmişəm. Bu kəndə əbəs yerə ziyalılar kəndi demirlər. Biz bu gün təkcə polislə bağlı deyil, digər problemlərinizi dinləməyə, əgər pozulan huquqlarınız varsa, onu bərpa etmək üçün sizlərə dəstək olmağa gəlmişik",- deyən Mübariz Quliyev sakinləri səmimi şəkildə polemikaya dəvət etdi.

Bağ-bağçanı, saldıqları yaşıllıqları qoruyub çoxaltmaq üçün su qıtlığından tutmuş, kənddə daha geniş ticarət şəbəkəsinin təşkilinə qədər bir çox məsələlər barədə sıxıntılarını dilə gətirənlər bunun polisin işinə aidiyyatı olmadığını bildirsələr də, yenə də polisdən kömək umduqlarını bildirdilər. Sakinlərdən Gülağa Nəsirov, Zakir Babayev, Daşqın Dadaşov  polisin işinin bu gün çox ağır və məsuliyyətli olmasını qeyd etdilər və dedilər ki, gənc nəslin cəmiyyətin bəlasına çevrilən narkomaniyanın qurbanına çevrilməməsi üçün polis əməkdaşlarının əməyi danılmazdır. 

Polis polkovniki Mübariz Quliyev onları narahat edən məsələlərin aidiyyatı qurumlara çatdırılacağını və tezliklə öz həllini tapacağını dedikdən sonra vətəndaşları da narahat edən narkomaniyanın çox ciddi bir problem olduğunu qeyd etdi. Bildirdi ki, bu gün polis, digər hüquq-mühafizə orqanları bu bəla ilə mübarizə aparsalar da yenə də vətəndaşların köməyinə ehtiyac var. Bəzən eləsi olur ki, doğması, yaxını, oğlu, qızı bu bəladan əziyyət çəkir və onu cəmiyyətin qınağına tuş gəlməkdən qorxub onu hər kəsdən, xüsusilə də polisdən gizlədirlər. Ancaq unudurlar ki, bu bəlanın kökünü kəsmək üçün əlbir işləmək lazımdır, birlikdə, hərə bacardığı qədər mübarizə aparmalıdır. Bu gün ölkəmizdə müasir tibbi avadanlıqlarla təchiz olunmuş narkoloji dispanserlər var ki, orada həmin xəstələri müalicə edərək sağlam həyata, cəmiyyətə qaytarmaq mümkündür.

Valideynlərlə bərabər müəllimlərin də öhdəsinə böyük məsuliyyət düşür.  Onlar şagirdlərə təkcə bilik, savad verməli deyil, həm də sağlam, vətənpərvər bir gənc kimi yetişdirməlidirlər.

Ulacalı kənd orta məktəbinin direktoru Nail Xanməmmədov görüşün məhz məktəbdə keçirildiyi üçün təşəkkür etdi. O, bu il məktəbdən 14 şagirdin ali məktəblərə daxil olmasını, onlardan 3-nün yüksək bal toplamasını iştirakçıların diqqətinə çatdırdı. Bildirildi ki, bu il məktəbin məzunu Nuriyev Malik Fuad oğlu 587 bal toplayaraq DİN-in Polis Akademiyasına qəbul olunub.

         Görüşdən sonra insanlar tərəfindən səsləndirilən problemlərin həllini nə vaxt tapacağı ilə bağlı sualımı cavablandıran RPŞ-nin rəisi qeyd etdi ki, bundan əvvəl əhali ilə keçirilən görüşlərdə polisə aid olmayan digər problemlər belə az vaxtda rayonun aidiyyatı qurumlarına çatdırılmış və öz həllini tapmışdır.