Bayrağımızı ucaldanlar... -Fotolar

 Bayrağımız dalğalanır, himnimiz səslənir. Bu qüruru bizə yaşadanlar isə gələcəyimiz olan gəncliyimizdir.

Belə gənclərdən biri də BMİ Nərimanov Rayon Mühafizə İdarəsinin əməkdaşı Səməd İbrahimovdur.

Səmədin adını eşidib döyüşlərini izləsəm də üzünü görmək nəsib olmamışdı. RMİ-nin rəis müavini, polis polkovnik-leytenantı Nazim Həsənov “Bir çox rayonların mühafizə xidmətindən, onların əməkdaşlarından yazırsan, bizim əməkdaşdan da bir yazı hazırla, o bayrağımızı ucaldır, bizi tanıdır” deyəndə, sözün düzü, tutuldum. Düz sözə nə deyəsən...

Əlində böyük bir çanta ilə otağa girəndə təəccübləndim. Çantanı açdı və masanın üstü medallarla, vunpellərlə doldu. Bu dəfə heyrətləndim. Və tanış olduq. Siz də tanış olun.Səmədi tanıdım. Görüşüb, hal-əhval tutduq. Səndən yazmaq istəyirəm fikrimi gülə-gülə qarşladı və “nə etmişəm ki, onu da yazasan” dedi...

Səməd İbrahimovu 1985-ci ildə Bakı şəhərində doğulub. İdmanı kiçik yaşlarından sevib. Özünün dediyi kimi, atasının, əmisinin gətirdiyi və o zaman qadağan edilən döyüş filmlərini izləyəndən sonra idmançı olmağa qərar verib. 258 nömrəli ota məktəbin idman zalında kinoda gördüyü fəndləri təkrarlayanda sinif yoldaşları ona gülsələr də  o, inadından dönməyib. Beləcə, böyük idmana gəlib. Karate-do idman növündə idman həyatının çətinliklıəri ilə rastlaşsa da özünü kiqboksinqdə, taekvandoda sınayıb. Səbr, dözüm, həvəs gücünə-güc qatıb. Kontakt-karatedən 12 dəfə respublika, 4 dəfə Bakı  çempionu titulunu qazandıqdan sonra dünyaya çıxıb, beynəlxalq dərəcəli idman yarışlarının da qalibi olub.

60 kiloqram çəki dərəcəsində öz sözünü deyə biləcək bir idmançı kimi artıq onunla hesablaşırdılar. Əlbəyaxa döyüş növləri ustası Azad Əskərovun rəhbərliyi ilə məşqlərə başlayır və Pankration döyüş növündə 60 kiloqram çəki dərəcəsində Bakı, Respublika çempionatında birinci olub.

Uğurların sərhəddini genişləndirmək üçün xarici ölkələrə üz tutur. Gürcüstanda, Rusiyada, Rumıniyada, Polşada, Türkmənistanda, Qazaxstanda keçirdiyi görüşlərdə parlaq qələbələrlə yadda qalıb.

Deyir ki, 2011-ci ildə Sankt-Peterburq  şəhərində dünya çempionatında vuruşanda Peşəkar Döyüş Növləri Federasiyasının Prezidenti yaxınlaşaraq haradan olduğunu soruşub  və onu dünyaca məşhur olan Rusiya Əlbəyaxa Döyüş Növləri Federasiyasının Prezidenti Fyodr Yemelyanko ilə tanış edib...

“Ən çox yadında hansı yarış qalıb” sualıma cavab verməyə tələsmədi. Gözlərini qızıl kimi par-par parıldayan kuboklara zilləyib danışmağa başladı:

- 2009-cu ildə Ukraynada çoxnövçülük döyüş növləri üzrə keçirilən yarışa qatılmışdım. Finalda rəqibim erməni döyüşçü idi. Sözün düzü, həyəcanlıydım. Ondan qorxmurdum, qorxum ondan idi ki, birdən uduzsam mən vətənimə necə, hansı üzlə qayıdacağam. Döyüş Ka-1 formasında keçirilirdi. Rəqibimə artıq birinci raundda bələd oldum, onun güləşdən anlayışı yox idi. Maraqlı məqam o idi ki, döyüşdən öncə rəqibimin məşqçisi ilə danışdım ki, əgər mən udsam, sənin yetirmən Azərbaycan bayrağını kürəyindən asacaq, yox əgər uduzsam, mən sizin bayrağı kürəyimdən asacağam. Təhlükəli bir addım atmışdım, sözün əsl mənasında, risqə getmişdim. Çətinliklə də olsa, döyüşü uddum. Bayrağımızı ermənin kürəyindən asdım. Bu həm də simvolik məna daşıyırdı. Yəni siz ermənilər də vaxt gələcək ki, bu bayrağın altında yaşayacaqsınız, Azərbaycan öz bütövlüyünə, tarixi torpaqlarına qovuşacaq və mən ən möhtəşəm yarışlara ata-babalarımın yurdu olan Göyçədən qatılacağam..

Bir müddət keçəndən sonra o məni revanş döyüşə çağırdı. Biz avqustun 28-də Batumidə görüşdük. Döyüşün hakimi erməni olduğundan narazılığımı bildirdim və gürcü hakim onu əvəzlədi. Döyüş başlayanda hiss etdim ki, rəqibim güclənib və o müəyyən vaxt ərzində döyüşlərimi izləyib, zəif-güclü tərəflərimi ayırd edib. İkinci raundda o məndən üstün idi. Üçüncü raundda fikirləşdim ki, qələbəni əldən vermək olmaz və ona ağır sarsıdıcı, sındırıcı fənd işlədib diz çökdürdüm...

Dördüncü dan qara kəmər sahibi olan həmkarımız 2015-ci ildə Polşada keçiriləcək Qeyri-Döyüş Növlərinin Olimpiadasına hazırlaşır.

O, həm də məşqçi kimi fəaliyyətini davam etdirir. Deyir ki, əlbəyaxa döyüş növlərini bilmək həm cinayətkarlıqla mübarizədə, həm də ictimai asayişin qorunmasında polisin köməyinə çatır. Axı polis əməkdaşı həm də güclü olmalıdır ki, vətəndaşlara xidmət etməkdə, onu qorumaqda çətinlik çəkməsin.