Azərbaycan qadını-Müqəddəs və zəhmətkeş ömür sahibi…

Uca Yaradanın müqəddəs kitabımızda cənnətə daxil olmaq üçün insan övladına “olmaz”ları etməmək üçün səslənişi ilə sevgili peyğəmbərimizin “Cənnət anaların ayağı altındadır” fikri arasındakı rabitəni ilk baxışdan anlamaq çətin olsa da sonradan bu fikrin mahiyyətinə vardıqca hər şey gün kimi aydın olur. Missiyası dünyaya övlad gətirməklə bitməyən ana adlı cəfakeşin nələr çəkdiyini elə öz analarımızın ömür yolunu izləsək görə bilərik. Səhər günəşi salamlamaqla işi başlayan ananın axşam ay batandan sonra belə işinin bitməməsi, belə desək, bütün qadınların tərcümeyi-halı kimidir.

Qadın sülh rəmzidir. Müharibənin sinonimi kişilərdir-bu etiraf kimi səslənsə də həqiqətdə belədir. Çünki bütün müharibələri kişilər başlayır və kişilər də qurtarır. Müharibələrin qurbanları isə qadınlar olur. Ər, qardaş, oğul acısı ilə saçından uzun gecələrin qoynuna qısılıb səhəri dirigözlü açar analar…

Ananın övladına deyil, bütün bəşəriyyətə, yaradılışa münasibəti də sevgi üzərində qurulub. Odur ki, sevginin, kövrəkliyin, səmimiyyətin özü olan analar ədəbiyyatımızın, şeirimizin əsas mövzularından birinə çevrilib. Adına şeirlər, mahnılar yazılıb…

Ana, ana... O adın qarşısında bir qultək

Həmişə səcdədə olmaq mənə fəxarətdir.

Onun əliylə bəla bəhrinə yuvarlansam

Yenə xəyal edərəm bəzmi istirahətdir…

Cəfər Cabbarlı poeziyasinin şah damarı olan bu şeiri çoxumuz əzbər bilməsək də o öz möhtəşəmliyi ilə ruhumuza hakim kəsilib.

Ana dedim, ürəyimə yanar odlar saçıldı,

Ana dedim, bir ürpəriş hasil oldu canımda,

Ana dedim, qarşımda bir gözəl səhnə açıldı,

Ana dedim, fəqət onu görməz oldum yanımda…

Mikayıl Muşfiqin bu şeirində isə adı gələndə ağzında dili torpaq kimi cadar-cadar olan bir ana həsrətlisini görürük.

Fransız yazıçı və aforizm ustası Fransua de Laroşfuko deyirdi ki, “Qadınların cəhənnəmi qocalıqdır.” Cəhənnəm sözünün qadınlarda qıcıq yaradacağını bilsəydi yazıçı bəlkə də bu sözü bir başqa sözlə əvəzləyərdi.

Bəli, heç bir qadın qocalmaq istəmir və yazıçının fikrinə hörmətlə yanaşmaqdan başqa çarəmiz qalmır. Qadınlar haqqında bəşər yaranandan bu günə kimi deyilib, deyilir, yazılıb və yazılır. Qadın kimdir, nədir, tərifi varmı sualının bir cavabı var: O, müqqəddəsdir, əzəmətlidir, “dünyaya can gətirən bir varlıqdır”.

Tarixin müəyyən dövrlərində bəşəriyyətin xilası naminə qadın zərifliyi elə bir gücə çevrilmişdir ki, bu gücün qarşısında heç bir qüvvə tab gətirə bilməmişdir. Müharibə ocaqlarının gündən-günə alovlandığı, hər gün qorxulu xəbərlər aldığımız dünyamızda sanki içimdəki bir qüvvə məni “Qadınlar dünyanın xilaskarı ola bilər” fikrini ucadan deməyə səsləyir.

Bu gün qadınların günüdür. Bu gün bütün qadınlar istər ki, silahlar sussun, göy üzündə qara buludlar olmasın, dili, dini, rəngi, irqi ayrı olan insanlar birləşib ANA ürəyinin rahatlıq tapması üçün “Biz sülhə səs veririk” desinlər. Dünyadakı bütün qadınların ən böyük istəyi, amalı, əmin-amanlıq və sülhdür. Könül istərdi ki, qadın adını uca tutaraq sevə-sevə qeyd etdiyimiz 8 Mart Beynəlxalq Qadınlar Günü dünyada sülh günü kimi tarixə düşsün…

Böyük mütəfəkkirimiz Hüseyn Cavidin: “Sürüklənən bəşəriyyət qadınla yüksələcək” deməsi Azərbaycan Kişisinin qadına verdiyi dəyərin, önəmin və ona olan inamın təcəssümüdür. Təəssüf hissi ilə qeyd edim ki, bu gün od içində yanan dünyamızın hər yerindən anaların fəryadı eşidilir. Atılan mərmilər, ölümsaçan güllələr Anaların səsini eşitmir, onun təkcə oz övladından deyil, bütün dünyadan ötrü narahat olduğunu anlamır.

Azərbaycan qadını ona həvalə edilən hər bir işdə uğur qazanıb, yeniliklərə imza atıb. Məhz bütün bunların şahidi olan, onlara hər zaman diqqət və qayğı ilə yanaşan, Azərbaycan qadınının taleyini düşünən ümummilli liderimiz Heydər Əliyev deyirdi: «İnsan cəmiyyətində qadının rolu, əhəmiyyəti məlumdur. Azərbaycan qadını öz ağlı, zəkası, müdrikliyi, sədaqəti, qəhrəmanlığı, vəfası ilə bizim xalqımızı, millətimizi daim ucaldır. Qadınlar cəmiyyətdə, həyatda göstərdikləri bütün başqa xidmətlərlə yanaşı, ona görə ən yüksək qiymətə layiqdirlər ki, onlar anadırlar…»

Yeri gəlmişkən, ulu öndər qadın azadlığına və onların bütün sahələrdə irəli çəkilməsinə xüsusi diqqət ayırır, qadınların təhsil almasını vacib məsələ kimi

qarşıya qoyurdu. Məhz onun uzaqgörən siyasəti nəticəsində Azərbaycan qadını cəmiyyətdə öz layiqli yerini tapdı.

Vətənin mübariz və müsəlləh əsgəri kimi ötən əsrin sonlarında müstəqillik uğrunda aparılan mübarizədə, həmçinin torpaqlarımızın Ermənistan tərəfindən işğalının qarşısının alınmasında Azərbaycan qadınlarının cəsarətinin və mübarizliyinin şahidi olduq. Hətta onlardan bir neçəsi Azərbaycanın Milli Qəhrəmanı adına layiq görülmüşdür.

Bu gün Azərbaycan Respublikasının Prezidenti cənab İlham Əliyev tərəfindən ölkənin ictimai-siyasi, sosial-iqtisadi və intellektual-mənəvi həyatının ən müxtəlif sahələrində, o cümlədən daxili işlər orqanlarında da qadınların daha geniş təmsil olunmasına çox böyük diqqət yetirilir. Məhz göstərilən diqqət və qayğının, etimadın nəticəsidir bu gün daxili işlər orqanlarında 3000-ə yaxın qadın əməkdaş xidmət aparır.

Vurğulamaq yerinə düşər ki, istər ölkəmizdə, istərsə də kənarda öz işi, bacarığı və əvəzsiz xidmətləri ilə Azərbaycan xanımlarını ən yüksək səviyyədə təmsil edən Azərbaycanın birinci xanımı, YUNESKO-nun və İSESKO-nın xoşməramlı səfiri Mehriban xanım Əliyevanın ölkə Prezidenti tərəfindən Azərbaycan Respublikasının birinci vitse-prezidenti təyin edilməsi isə bütün Azərbaycan xanımlarına ən böyük ehtiramın, etimadın bariz nümunəsidir.