Polis-döyüşə hazır əsgər kimi ...

Yazıya seçdiyim başlıq bəlkə də çoxlarına qəribə gələr. Polislə əsgəri eyniləşdirməyimi qınayanlar da tapılar. Ancaq yox, çox da uzaq olmayan vətən tariximizə nəzər salsaq görərik ki, polis həm də müsəlləh əsgər kimi silaha sarılıb, torpaqlarımızın müdafiəsində misilsiz xidmətlər göstərib, qanını-canını fəda edib.

Ayrıseçkilik salmaqdan min ağac uzağam. Dövlətin istənilən sturukturunda əsgər kimi ruhunu, zəkasını, bütün varlığını xalqın, torpağın yolunda səfərbər edənlər varsa, demək, orda sözdə, işdə, fikirdə birliyə can atıb gələcək hədəflər uğrunda mübarizə meydanından qalib çıxmaq istəyənlər var.

Elin haqq tərəzisinin gözü isə heç vaxt nahaqqa doğru əyilmir. O düzü-düz, əyrini-əyri görür. Bu gün sabitliyin bizə verdiyi şans hər bir işimizdə, fəaliyyətimizdə dadımıza çatır, əlimizdən tutur. Gündən-günə dəyişilən, inkişaf edən Azərbaycana gələn turistlərin sayının artması həm də ölkəmizin dünyanın diqqət mərkəzində olmasından xəbər verir. Birdə ki, hər kəs getdiyi yerdə ilk növbədə sabitliyin, əmin-amanlığın olmasını istər.

Etiraf edək ki, indi polisin üzərinə daha böyük vəzifələr düşür, məsuliyyətimizin çevrəsi genişlənir. Bir təhlükə hiss edəndə vətəndaşın üz tutduğu ilk ünvanın məhz polis olması da bunu bir daha sübut edir. Vətəndaşın bizə, polisə olan inamı gündəlik fəlaiyyətimizdə deyil, hər bir işimizdə uğurlara imza atmağımızda stimul rolunu oynayır.

Məhz bunun nəticəsidir ki, KİV-lərdə “Polis idmançımız bayrağımızı qaldırdı, himnimizi səsləndirdi, dünya çempionatının qalibi oldu” ifadəsini görəndə sevincimizin təntənəsindən sinəmiz qürur hissi ilə qabarır. Bəli, polis həm də Azərbaycan respublikasının vətəndaşı kimi onun çiçəklənməsi, inkişafı, təhləkəsizliyi, imzalar içində imzamızın olması, vətəndaşlarımızın rifahı üçün bütün bacarığını, istedadını nümayiş etdirməkdən yorulmur, usanmır.

Elə Daxili İşlər Nazirliyinə ünvanlanan, vətəndaş-polis münasibətlərinə işıq tutan, polisin fəaliyyətinə yönəlik təşəkkür məktubları ictimai dəstəyin güclü bir əl kimi hər zaman kürəyimizdə olmasını bizlərə hiss etdirir, qanunun aliliyinin, insan hüquq və azadlıqları uğrunda apardığımız mübarizənin dəstəklənməsini özündə ehtiva edir...

Və məktublardan bir neçəsini diqqətinizə çatdırırıq...

Qobustan rayon sakini Məsim Səfərov DİN-ə ünvanladığı məktubunda yazır ki, övladı 2016-cı ildə DİN Daxili Qoşunlarının Naxçıvan Muxtar

Respublikasındakı “N” saylı hərbi hissədə xidmətə başlayıb. Bir müddətdən sonra səhhətində yaranmış problemlə əlaqədar təcili olaraq Daxili Qoşunların hərbi hospitalına gətirilib. Həkimlərin gərgin səyi nəticəsində həyatı təhlükəsi sovuşub.

Məsim Səfərov övladının sağlamlığına qoşuşmasında əməyi keçən, onun tam sağalması üçün bütün səy və bacarıqlarını səfərbər edən tibb personalına dərin təşəkkürünü bildirir və Daxili Qoşunlarda yaradılan yüksək şəraitdən, əsgərlərə, zabitlərə göstərilən diqqət və qayğıdan məmnunluğunu ifadə edir.

Bakı şəhər sakini Rəşad Cəbrayılov Azərbaycan polisinin apardığı yüksək xidmət sayəsində bu gün xalqımızın sabitlik və əmin-amanlıq içində yaşamasına diqqət çəkərək qeyd edir ki, cinayətkarlıqla mübarizənin qətiyyətli təşklinin nəticəsidir ki, baş verən cinayətlər qısa müddət ərzində açılır və təqsirkarlar öz layiqli cəzalarını alırlar.

O, bir neçə gün öncə “Araz supermarket” MMC-yə və orada çalışan işçilərə qarşı cinayət törədən şəxs barəsində qanuni tədbir görülməsi üçün müraciət etdiyini və DİN rəhbərliyinin çevik şəkildə bu müraciətə cavab verdiyini, həmçinin cinayəti törətmiş şəxsin tutulduğunu Azərbaycan Polisinin vətəndaşlara diqqət və qayğısının bariz nümunəsi kimi təqdir edir, yazdığı təşəkkür məktubunda razlığını bildirir.

Fəaliyyətimiz, peşəmiz vətəndaşımızda özünə inam hissini gücləndirirsə, o bizi öz doğması, əzizi bilirsə və ən ümdəsi, bu xalqa, bu Vətənə dünən olduğu kimi bu gün də üç rəngli bayrağımızın əzəməti altında sevə-sevə xidmət ediriksə, nə mutlu bizə.