Qadın heyvan kəsə bilər?!

14:16 / 29.10.2014

Əkrəm Həsənov

İlahiyyat üzrə fəlsəfə doktoru

Mənə hansısa bir məsələdə sual verildikdə, vaxt ayırmağa çalışıram ki, onunla bağlı qısa da olsa məlumatlandırıcı bilgiləri qeyd edim ki, digər insanlar da həmin sualın cavabından fayda əldə edə bilsinlər. Bu gün də bir neçə nəfərdən həmin sual gəldiyi üçün onunla bağlı qısa açıqlama verməyi, şəriətimizin bu məsələdə mövqeyini qısa olaraq bildirməyi özümə borc bildim.

Bu da qadınlarla bağlı bir şəriət məsələsidir ki, bütün qadınların bunu bilməsi vacibdir. O da budur ki, qadınlar da kişilər kimi şəriətlə mükəlləf olunublar. Kişilərdə və qadınlarda şəriətin əmrləri olduğu kimi və olduğu qaydada yerinə yetirilir. Onlardan biri də heyvan kəsməkdir.

Sual belədir ki, qadın toyuq, inək və s. halal, yeməli əti olan heyvanları kəsə bilərmi?

Cavab budur ki, qadın da heyvan kəsə bilər. Toyuq da kəsə bilər. Qadınlar bunu bilməlidirlər ki, onların heyvan kəsməkləri dini cəhətdən qadağan deyil. Əksinə dinimizdə buna icazə verilib. Hədis mənbələrində qeyd edilir ki, Muhəmməd peyğəmbərin (səlləllahu aleyhi və səlləm) dövründə heyvan kəsən kənizlər (cariyələr) olub. Həmin hədislərdən birini Abdulla ibn Ömərin azad olunmuş köləsi Nafi, Kəb ibn Malikin bir oğlundan İbn Ömərə danışdığı vaxt bu sözləri eşitmişdir: “Atası (Kəb) ona belə bir əhvalat danışmışdı: Mal-heyvan otaran bir kəniz bir qoyunun ölmək üzrə olduğunu görüb, dərhal bir daşı qırmış və onunla həmin qoyunu kəsmişdi. Bu vaxt atası Kəb ailə üzvlərinə demişdi ki, məsələnin məğzini peyğəmbərdən soruşub öyrənənə qədər o qoyunun ətindən yeməyin. Sonra gedib, bunu peyğəmbərdən soruşmuşdu. Peyğəmbər (səlləllahu aleyhi və səlləm) də onların qoyunun ətini yeməklərinə icazə vermişdi” (Buxari, Zəbaih, 18-19, Vəkalət, 4; Müslim, Ədahi, 19; İbn Macə, Zəbaih, 8; Əbu Davud, Ədahi, 3; Muvatta, Zəbaih, 4; Əhməd ibn Hənbəl, 2/76, 80).

Bu hədisdən gördüyümüz kimi, qadınlar da heyvan kəsə bilərlər. Başqa sözlə desək, onların kəsdikləri heyvanın ətini yemək olar. Heç bir problem yoxdur. Şəriətimizdə icazəli hesab olunur. Heyvan kəsməklə bağlı şərtlərdə “kişi olmalıdır” kimi bir şərt yoxdur. Ona görə də kişilər kəsə bildiyi kimi, qadınlar da şəxsən heyvan kəsə bilərlər. Mühüm olan şəriətə uyğun kəsməkdir. Heyvanı üzü qibləyə çevirmək, Bismilləh demək və digər şəriət hökmlərini yerinə yetirməkdir.

Buxarinin mövzu başlığında istinadsız qeyd etdiyi bir hədisə görə isə, Əbu Musa əl-Əşəri qızlarına qurbanlarını özləri kəsmələrini, ayağını qurbanın boynuna basmağı və kəsərkən təkbir söyləyib bismillah deməyi tənbeh etmişdir (Buxari, Ədahi, 10). Əgər bir müsəlman ailəsində həddi büluğa çatan, müsəlman olan bir oğlan uşağı, müsəlman kişi varsa ən fəzilətlisi budur ki, həmin oğlan və kişi heyvanı kəsməlidir. Əgər belə biri yoxdursa və heyvan da kəsilməlidirsə onda qadın özü şəriətə uyğun heyvanın başını kəsə bilər. Bəzi alimlər isə hətta evdə kişi olsa belə yenə də qadının da kəsməsinin icazəli olduğunu bildirmişlər. Allah daha düzünü bilir.
Əkrəm Həsənov (ilahiyyat üzrə fəlsəfə doktoru).

Qadın heyvan kəsə bilər?!

Əkrəm Həsənov

Müəllifin digər yazıları

Xəbərlər

Ədəbiyyat

© 2012 | Bütün hüquqları qorunur.

Əlaqə