Həcc ziyarətlərinin şərtlərini asanlaşdırmaq haqqında

   Bizdə müəyyən dini ayinləri icra etmək üçün çox hallarda insanların çoxu aciz qalırlar. Çünki, müəyyən adət-ənənələri icra etmək üçün, müəyyən dini ritualları yerinə yetirmək üçün bəzən xərc çəkməli oluruq. Bu ibadət növlərindən biri də həcc ərəfəsində həcc ziyarətinə getməkdir. Bizim məmləkətimizdə hər il həcc ziyarətləri üçün qiymətlər baha olur. Biz digər ölkələrlə müqayisə etdikdə gördük ki, həqiqətən bizə həcc üçün deyilən qiymət həddən artıq çox bahadır.

Bu məsələ həcc ölkəsi ilə müqavilə bağlayan bizim rəsmi qurumlarımızın arasında olan ticarət məqsdəli müqavilələrinə əsasən həyata keçirilir. Biz nümunə üçün deyə bilərik ki, Türkiyədə həcc ziyarəti üçün elə də çox baha qiymət tələb olunmur. Bunun müxtəlif səbəbləri vardır. Birincisi budur ki, Türkiyə neçə illərdir həcc ziyarətlərini təşkil edir, demək olar ki, Məkkədə və Mədinədə şəhərində türklərin əvvəldən bütün növ əlaqələri daha sıx olub, demək olar ki, Məkkədə və Mədinədə olan otellərin, restoranların, ticarət obyektlərin çoxunu da türklər işlədirlər. Həcc ərəfəsində bunu müşahidə etmək mümkündür. Hər addımdan bir türk restoranları, türk otelləri, bəzi yerlərdə hətta türk qardaşlarımızın tikdirdiyi məscidlər vardır. Bunu biz Türkiyədə də müşahidə edirik. Görürük ki, onlar islamı müasir dövrün tələblərinə uyğun şəkildə elmlə öyrənir, oxuyur, yaşayır və yayırlar. Biz isə Azərbaycan tarixinin müəyyən işğal dövrlərində uzun illər ateizmi yaşadığımız üçün dindən uzaqlaşdırılmış, hətta bu gün də elmi şəkildə, mənbələr əsasında dinimizi bilməyən yaşlı nəslimizin müəyyən qisminin dinə qarşı mənfi fikirlərinin şahidləri oluruq. Biz hələ müstəqillikdən sonra dinimizi canlandırmağa başlasaq belə hələdə müəyyən kütlələr vardır ki, dini boğmaq üçün cəhd edirlər. Bunun da səbəbi ola bilsin ki, insanların dini elmi şəkildə bilməmələrindən irəli gəlir. Yaxud insanların bəzisinin inancları olmadıqları üçün, ya da başqa qeyri dini inancları olduğu üçün dinə qarşı açıq aşkar mübarizə aparmalarını da görməkdəyik. Ancaq bizim də ölkəmizin digər dini canlı tutan ölkələrə qoşulması üçün dinin elmi tərəfini cəmiyyətə təqdim edən savadlı ilahiyyatçılarımızı cəmiyyət içərisinə çıxarmağımız qaçınılmazdır. Çünki, bu gün hələdə bəzi insanlarda din dedikdə yas yerləri, mollalar, xurafatçılıq, mərsiyə deyib ağlamaq anlaşılır. Amma əsl islam dini bildiyimiz kimi belə xurafatlardan uzaqdır.

Mövzunu başqa yerə yönəltmədən qeyd edək ki, bizim ölkəmizdə həcc ziyarətinin baha olmasının müxtəlif səbəbləri ola bilər. Burada daha çox xeyir əldə etmək, daha çox qurumların eyni məqsədlə həcc ziyarətini təşkil etmələri, Məkkədə otellərin baha olması kimi səbəblər də ola bilər. Bütün bu səbəbləri müəyyən aidiyyatlı qurumlar daha yaxşı bilirlər.

Qeyd edim ki, biz 2013-cü il həcc ziyarətində olanda QMİ-nin təşkil etdiyi otellərin sıx, hətta bir otaqda 6-7 nəfərin qaldığını müşahidə etdik. Ancaq 3-4 nəfərlik otaqda qalmaq üçün daha çox pul ödəməyə məcbur olursan. Hətta Məkkəyə yaxın və uzaq olan otellər də vardır. Əgər müəyyən yollarla bizim də xüsusi olaraq Məkkədə çox gözəl şəraitli otellərin tikilməsi məsələsi gələcəkdə olarsa bu çox gözəl olar. Həmçinin əgər mümkün olarsa biz həcc ziyarətinin qiymətlərində də güzəştlər edə bilərik. Bütün bunlarla məşğul olan xüsusi qurum vardır ki, onlar bu məsələləri daha axşı bilirlər. Onların da mövqeyini öyrənmək, bahalılığın səbəbinin nə olduğunu bilmək hamımız üçün yaxşı olardı. Çünki biz türk qardaşlarımıza deyəndə ki, bizdə həcc ziyarəti 3-4 min dollara başa gəlir. Onlar dəhşətə gəldilər. Onlarda həddən artıq münasib qiymətə həcc ziyarətləri təşkil olunur.

Bu barədə Allahın Rəsulu da insanların ibadət şərtlərini asanlaşdırmağı öz ümmətinə tövsiyə etmişdir. Buyurmuşdur ki, “Asanlaşdırın, çətinləşdirməyin”. Həcc ziyarəti ibadət olduğu üçün onun şərtlərini asanlaşdırmaq, qiymətlərini münasib etmək daha çox xeyir gətirən əməl hesab olunur. Çünki həcc ziyarətində ibadət edən insanların bütün savabları onların ora getməsinə kömək edən, onlar üçün yol şərtlərini asanlaşdıran insanların üzərinə düşür. Bu səbəbdən aidiyyatlı şəxslər bu savablardan özlərini məhrum etməməlidirlər.