Təbii ehtiyatlarla relyef arasındakı mövcud qarşılıqlı və qanunauyğun əlaqə mürəkkəb relyefli dağlıq ərazilərdə, o cümlədən Azərbaycanda özünü daha dolğun təzahür etdirir. Burada relyefin son dərəcə mürəkkəbliyi və təzadlığı ilə yanaşı dağlıq sistemlərin xeyli yüksəkliyə malik olması, ovalıqların qismən dünya okeanı səviyyəsindən aşağıda yerləşməsi təbii ehtiyatların müxtəlifliyinə və ərazi üzrə paylanması qanunauyğunluğuna təsir edən başlıca amillərdəndir. Bu baxımdan ərazinin əsas iri oroqrafik vahidlərini təmsil edən Böyük və Kiçik Qafqazın, Talışın və Kür-Araz dağarası çökəkliyinin enlik, Xəzər dənizinin isə uzunluq istiqamətdə səmtləşməsi xüsusi rol oynayır.
Fiziki-coğrafi şəraitin və onun ayrı-ayrı ünsürlərinin yaranması və inkişafında özül rolu oynayan relyefin müxtəlifliyi və onu mürəkkəbləşdirən morfostruktur və morfoskulpturların mürəkkəbliyi ilə əlaqədar olaraq respublikamız təbii ehtiyatlarla xeyli zəngindir. Burada onların demək olar ki, əksəriyyəti – meteoroloji (iqlim, külək, günəşin istilik enerjisi), torpaq, bioloji (bitki, heyvanat), hidroloji (çay, göl, bulaq, yeraltı sular), mineraloji (karbohidrogen, metallik və qeyri-metallik, odadavamlı və s. materiallar) və s. ehtiyatları mövcuddur.
Azərbaycanın ümumi iqlim xüsusiyyətləri qlobal atmosfer dövranı və coğrafi şəraitlə müəyyənləşsə də, onun bu qəbildən olan ehtiyatlarla zənginliyi xeyli dərəcədə relyeflə əlaqədardır. Belə ki, məlum iqlim tiplərinin əksəriyyətinin ərazimizdə yayılmasının əsas səbəbi də relyef xüsusiyyətlərinin müxtəlifliyidir. İstər makro- və mezo, istərsə də mikroiqlim şəraitinin müxtəlifliyi ilə əlaqədar olaraq, respublikamızda Xəzər dənizi sahillərindən başlayaraq yüksək dağlığa qədər geniş rekreasiya şəbəkəsinin və kənd təsərrüfatının müxtəlif sahələrinin inkişaf etdirilməsi imkanı vardır.
Ekoloji cəhətdən təmiz, lakin ölkəmizdə tam istifadə olunmayan tükənməz enerji mənbəyi hesab edilən küləklərin təbii ehtiyat xassəsi, əsasən, onların sürəti və il ərzində davamiyyəti ilə müəyyənləşdirilir. Bu baxımdan küləyin orta illik sürətinin 3 m/san-dən yuxarı olduğu şəraitdə elektrik mühərrikini işlətməsi, həmin kəmiyyətin isə respublika ərazisində 4-9 m/san təşkil etməsi ölkəmizin yüksək külək enerjisi ehtiyatına malik olduğuna dəlalət edir. Külək ehtiyatları, ümumiyyətlə, respublika ərazisinə bütün istiqamətlərdən daxil olan hava kütlələri ilə əlaqədar olsalar da, onların müxtəlifliyi və ərazi üzrə paylanması xüsusiyyəti relyefin təsiri altında formalaşır. Burada relyefin şərq istiqamətində alçalaraq Xəzər dənizinə doğru açılması, dağlılq sistemlərin enlik istiqamətdə uzanmasının doğurduğu baryer (maneə) və eləcə də Kür və Araz çayları vadilərinin “dəhliz” effekti mühüm rol oynayır.
Abşeron yarımadası xeyli məsafədə Xəzərin içərilərinə doğru uzandığından hər tərəfdən hava kütlələri axınlarına açıq qalır və nəticədə böyük külək ehtiyatı ilə səciyyələnir. Dağlıq ərazilərdə küləyin istiqaməti və şiddəti onların yüksəkliyi ilə yanaşı silsilələrin, dağdaxili çökəkliklərin və eləcə də çay dərələrinin uzanma istiqaməti, yamacların səmtliyi və dərin aşırımların mövcudluğu ilə əlaqədardır.
Günəş enerjisi ehtiyatı göstəricilərinin (günəşli saatların miqdarı, günəş radiasiyasının cəmi, radiasiya balansı) başqa fiziki - coğrafi amillərlə yanaşı, əsasən, radiasiya qradienti kəmiyyəti (100 m-də, 0,8 kkal/sm²) ilə müəyyənləşdirildiyindən onun paylanmasında relyef mühüm rol oynayır. Belə ki, il ərzindəki günəşli saatların miqdarı Kür-Araz çökəkliyində və Abşeron-Qobustan bölgəsində dağlıq ərazilərə nisbətən xeyli yüksəkdir. Bu kəmiyyət dağlıq ərazilərdə 1900-2200, Kür-Araz çökəkliyi və Abşeron-Qobustanda 2200-2500, Orta Araz çökəkliyində isə 2500-2900 saata çatır.
Günəş radiasiyasının illik miqdarı da respublikanın relyefi ilə əlaqədar olaraq qeyri-bərabər paylanmışdır. Onun kəmiyyəti dağətəyi qurşaqdan (120-130 kkal/sm²) istər yüksək dağlığa (140-145 kkal/sm²), istərsə də ovalığa doğru (130-135 kkal/sm²) artır. Radiasiyanın yüksək kəmiyyəti ilə fərqlənən Naxçıvan bölgəsində (145-160 kkal/sm²) onun ən böyük qiyməti yüksək dağlıqda müşahidə edilir. Radiasiyanın paylanmasında qeyd olunan anomallıq relyefin təsiri ilə yaranan xüsusi halla-buludluq rejimi ilə əlaqədardırsa, onun yüksək qiyməti ərazinin kontinentallığı ilə əlaqədardır.
Azərbaycan, əsasən, yeraltı isti sularla təmsil olunmuş böyük yerdaxili enerji ehtiyatına malikdir. Həmin sular layarası və çat suları şəklində mövcuddur. Layarası sular düzənlik və qismən də dağlıq ərazilərin sinklinorium çökəkliklərində adətən yer təkinin məhəlli istilik sahələri, çat suları isə maqmatik fəaliyyətin qalıq istiliyi ilə əlaqədar olaraq formalaşır. Layarası suların geniş inkişaf etdiyi sahələrdən biri Kür çökəkliyi və Abşeron yarımadası artezian hövzələri hesab olunur ki, burada suyun hərarəti 150ºC-yə çatır.
Yüksək temperaturlu suların təbii çıxışları Kiçik Qafqazda Kəlbəcər, Laçın rayonlarında və Naxçıvan MR-da, Talış zonasında Lənkəran, Masallı, Böyük Qafqazda Qax, Qəbələ, Quba və başqa rayonlarda mövcuddur.
Müxtəlif təbii amillərin qarşılıqlı əlaqəsinin və təsirinin məhsulu olan torpaqlar ərazidə yayılmış süxurların və onlardan təşkil olunmuş relyefin əsasında yaranır. Bu baxımdan Azərbaycanın torpaq ehtiyatları xeyli zənginliyi ilə səciyyələnir. Burada təbii şəraitin, ilk növbədə relyefin mürəkkəbliyi ilə əlaqədar olaraq xeyli torpaq növü əmələ gəlmişdir. Onlar relyefin yaratdığı şaquli zonallıq qanunauyğunluğuna tabe olmaqla dəyişilərək dəniz sahili qumlu torpaqlardan tutmuş, yüksək dağlıqdakı torflu və ibtidai dağ-çəmən torpaqlarınadək geniş genetik sıranı əhatə edir.
Azərbaycanın zəngin bioloji ehtiyatlarının da paylanmasında relyefin rolu aşkar təzahür edir. Dağlar, düzənliklər və eləcə də hər bir yüksəklik qurşağı özünəməxsus bitki və heyvanat aləmi ilə fərqlənir. Meşələr yüksək dağlıqda inkişaf edə bilmədiyi kimi, yüksək dağlığın da subalp və alp çəmənlikləri üçün səciyyəvi olan bitkilərə başqa ərazilərdə təsadüf edilmir. Qafqaz kəli, dağ keçisi, qarapaça, qar sıçanları, qartallar və s. yalnız yüksək dağlıqda, qamış pişiyi, ceyran, anqut, vağ və başqa heyvan və quşlar isə yalnız düzənliklərdə məskunlaşırlar.
Azərbaycanın su ehtiyatlarının paylanmasında relyef hər şeydən əvvəl mənşə və yüksəklik mövqeyindən təsir göstərir. Dağlıq ərazilərdə relyefin parçalanması və enerji kəmiyyətlərinin yüksək olması ilə əlaqədar olaraq sular istər səthi, istərsə də yeraltı axımlar əmələ gətirərək sabit ehtiyatlar yaratmırlar. Bu cəhətdən müxtəlif mənşəli dağ göllərində və buzlaqlarda mövcud olan su ehtiyatları istisna təşkil edir.
Kür-Araz depressiyasının sinkliniorum strukturlarına müvafiq gələn akkumliativ düzənliklərin su ehtiyatları isə artezian suları ilə əlaqədardır. Bunlar zəif və ya son dərəcə zəif axımlı böyük su ehtiyatlarını yaradırlar. Beləliklə Azərbaycanın su ehtiyatları dağlıq ərazilərdə buzlaqlar, göllər, bulaqlar və çaylar, düzənlik ərazilərdə isə yeraltı sular, çaylar və göllərlə əlaqədardır.
Azərbaycanın ən mühüm təbii ehtiyatlarını təşkil edən faydalı qazıntılar və relyef eyni mənşəli olduğundan onların arasında qanunauyğun əlaqə mövcuddur. Bu əlaqə həmin qazıntıların müəyyən relyef formaları ilə bağlılığında və onların ərazi üzrə paylanmasında özünü göstərir.
Bu baxımdan bəzi tikinti materialları (çınqıl, qum,gil) yataqları, əsasən, düzənlik ərazilər üçün səciyyəvidir. Səpinti yataqları dağlıq ərazilərdə akkumulyasiyanın üstünlük təşkil etdiyi dağdaxili çökəkliklərdə, dağətəyi düzənliklərdə və eləcə də terras və düzəlmə səthlərində, neft-qaz yataqları isə depression düzənliklərdə, metal və qeyri-metal faydalı qazıntılar çox halda dağlıq ərazilərdə aşkar edilir.
Təbii sərvətlərlə zəngin olan respublikamızda mineral ehtiyatların aşkar edilməsində və öyrənilməsində geomorfologiya elminin müvafiq üsullarından, o cümlədən struktur-geomorfoloji, morfostruktur, morfosenetik, morfometrik, paleogeomorfoloji və s. geniş istifadə olunur.
Relyef haqqında elmi fikirlərin və geomorfoloji tədqiqat üsullarının xalq təsərrüfatında tətbiqi onun başqa sahələri ilə yanaşı neft-qaz, filiz və səpinti yataqlarının proqnozu axtarışı və kəşfiyyatında mühüm əhəmiyyət kəsb edir. Bu baxımdan öndağ və dağdaxili çökəkliklərdə mövcud olan basdırılmış neftli-qazlı strukturların aşkar edilməsində struktur-geomorfoloji üsulların tətbiqi müsbət nəticələr vermişdir.
Azərbaycan ərazisinin Kür çökəkliyi daxilində basdırılmış strukturlar müxtəlif illərdə daha dəqiq öyrənilmişdir. Struktur-geomorfoloji tədqiqatlar zamanı müxtəlif topoqrafik, aerofotomateriallardan, kompleks struktur-geomorfoloji, stratiqrafik-korrelyasiya, geoloji və geofiziki tədqiqatların, nəticələrindən və eləcə də buruq materiallarından geniş istifadə edilmişdir.
Stratiqrafik-korrelyasiya üsulunun köməyi ilə respublika ərazisinin Göyçay, Quba sahələrində, Şərqi-Babazənən qalxmasının cənub-qərb qanadında, Padar antiklinalında, Ağcəbədi strukturunda və digər sahələrdə yayılmış dördüncü dövr çöküntüləri qatında antiklinalların mövcud olduğu aşkar edilmişdir ki, bu da səthin deformasiya kəmiyyətinin dərinlikdəki qalxmanın amplitudu ilə müqayisə etməyə imkan vermişdir. Struktur-geomorfoloji tədqiqatların nəticələrinin geofiziki və qazma məlumatları ilə müqayisəsi göstərmişdi ki, Kür-Araz çökəkliyində basdırılmış strukturların çoxu irsi xarakterə malik olub yeni tektonik mərhələdə canlanmağa məruz qalmışdır. Bu strukturlar həmin mərhələdə nə qədər zəif inkişaf etsələr də, onlar Kür-Araz çökəkliyi relyefinin quruluşunda və inkişafında öz əksini tapmışdır. Çökəkliyin ox hissəsində basdırılmış qalxmaların əksəriyyəti Pliosen-Dördüncü dövr çöküntülərindən ibarət olub, Üst Pliosendə və Pleystosendə formalaşmışlar. Daha qədim qalxmalar Paleogenin Miosen çöküntülərində inkişaf edib, Kiçik Qafqazqabağı, Talışyanı düzənliklərdə, basdırılmış Talış-Vəndam tektonik çıxıntısı sahəsində yerləşmişlər. Burada özül nisbətən az dərinlikdədir, çökmə süxur qatının qalınlığı isə tədricən azalır.
Struktur-geomorfoloji tədqiqatın nəticələrinin qazma quyuları və geofiziki tədqiqatların materialları ilə tutuşdurulması və müqayisəsi nəticəsində Kür-Araz çökəkliyinin struktur-geomorfoloji xəritəsi tərtib edilmiş və burada 50-dən çox lokal qalxmalar ayrılmışdır .
Respublikanın dağlıq ərazilərində aparılan struktur –geomorfoloji tədqiqatların təhlilindən aydın olur ki, bir sıra faydalı qazıntı yataqlarının formalaşması orogen etapdan əvvəlki ilkin alp geosinklinal inkişaf mərhələsi ilə əlaqədar olub, irsi inkişaf etmiş müasir morfostrukturların əsasını təşkil edən geoloji strukturlara və onları mürəkkəbləşdirən dərinlik tektonik pozulma xətlərinə müvafiq gəlir. Müasir iri morfostruktur vahidlər yeni tektonik mərhələyə qədər müxtəlif mənşəli qalxma və enmə zonaları üzrə qırışıq əmələgəlmə fazalarının və dərinlik tektonik pozulmalar üzrə baş verən maqmatik və postamaqmatik proseslərin növbələşməsi və onlarla əlaqədar faydalı qazıntı yataqlarının formalaşması ilə səciyyələnir.
Kiçik Qafqaz meqaantiklinoriumunun Lök-Qarabağ zonası daxilində inkişaf etmiş faydalı qazıntı yataqlarının formalaşmasında Kimmeri və Alp metallogenik mərhələlərinin qırışıqlığa qədər və qırışıq mərhələləri ilə yanaşı, filiz daşıyan maqmatik kütlələr də əhəmiyyətli rol oynamışdır. Göstərilən inkişaf mərhələlərinin hər birində Lök-Qarabağ tektonik-maqmatik zonası daxilində inkişaf etmiş müsbət morfostrukturların uzun geoloji dövr ərzində qalxmağa və yuyulmağa məruz qalması ilə əlaqədar olaraq, onlarda alp metallogenik mərhələsinin yataqları demək olar ki saxlanılmamışdır.
Bu zonada Daşkəsən sinklinoriumu istisna olmaqla, əksər sinklinor morfostrukturlar ancaq alp metallogenik mərhələsinin filizləşməsi ilə səciyyələnir. Çünki bu morfostrukturlarda denudasion kəsimin kəmiyyəti az olduğundan onlardakı yataqlar eroziya nəticəsində hələlik açılmamışdır. Burada Alp metallogenik mərhələsi filizlərinə: qızıl, polimetallar, civə və s. mineral birləşmələri aid olub, Qazax sinklinoriumunun cənub-şərq hissəsində yerləşir. Sinklinor çökəklik daxilindəki horst-antiklinal, antiklinal silsilə və tirələrdə qızıl və polimetal filiz təzahürləri, monoklinal silsilə və tirələrdə, struktur-denudasion mənşəli çökəklikləri əmələ gətirən sinklinal strukturlarda isə civə və polimetallara rast gəlinir. Müsbət morfostrukturlarda aşağı temperaturlu filiz birləşmələrinin olmaması, yeni tektonik mərhələdə onların intensiv qalxması nəticəsində yataqların yuyulması ilə əlaqələndirilir.
Kiçik Qafqazın Ağcakənd sinklinor çökəkliyində Üst Təbaşirin gilli-qumlu süxurlarında təşəkkül tapmış dəmir-manqan yataqları xüsusi əhəmiyyət kəsb edir. Həmin dövr üçün çökəkliyin paleogeomorfoloji şəraitinin təhlili, yuyulma və çöküntü toplanma sahəsinin ayrılması Üst Təbaşir dənizinin transqressiya fazasına uyğun olaraq qədim sahil xətlərinin vəziyyətinin araşdırılması dəmir-manqan filizlərinin yuyulduğu və toplandığı sahələri aydınlaşdırmağa imkan yaradır.
Morfostruktur təhlil əsasında Kiçik Qafqazın şimal-qərb hissəsində Xram və Şəmkir çayları arasında ilk dəfə olaraq ayırdığımız və daha perspektivli hesab olunan faydalı qazıntıların axtarışında mərkəzi, həlqəvari, günbəzvari və başqa tip morfostrukturlar intensiv filizləşməyə məruz qalmış və tektonik cəhətdən fəal blokvari qaymalara müvafiq gəlir. Kiçik Qafqazın Göyçə-Əkəri tektonik-maqmatik zonasında inkişaf etmiş faydalı qazıntılar Alp metallogenik mərhələsinin hiperbazitləri (ultraəsasi süxurlar) ilə əlaqədar olan xrom, xrom-nikel, kükürdlü mis kolçedanı, civə, qızıl geniş təşəkkül tapmışdır.
Qeyd etmək lazımdır ki, zonada müxtəlif dərəcəli tektonik strukturların birləşməsindən əmələ gəlmiş heterogen morfostrukturlarda formalaşmış faydalı qazıntı yataqlarının bu və ya digər dərəcədə perspektivliyi strukturların stratiqrafik-litoloji tərkibindən, maqmatik proseslərdən və onların tektonik inkişafı şəraitindən asılıdır.
Struktur-geomorfoloji tədqiqatlar nəticəsində aydın olmuşdur ki, respublika ərazisindəki iri morfostruktur vahidlərdə mövcud olan müxtəlif tərkibli və dərinlikli faydalı qazıntı yataqlarının perspektivliyinin müəyyən edilməsində morfostrukturların morfologiyası ilə yanaşı, denudasion kəsimin də böyük əhəmiyyəti vardır.
Azərbaycan ərazisinin Naxçıvan Muxtar Respublikası, Kiçik Qafqazın cənub-şərq hissəsi və Talış üçün denudasion kəsimin kəmiyyəti müəyyən edilmişdir. Onu qeyd etmək lazımdır ki, morfostrukturlar müxtəlif vaxtlarda denudasiya prosesləri nəticəsində yuyulub, onlarla genetik əlaqədə olan və müxtəlif tip faydalı qazıntı yataqları əmələ gətirən mineral birləşmələri yuyulub, nəql etdirilərək səpinti tipli faydalı qazıntı yataq və təzahürləri əmələ gətirmişlər.
Talış və Naxçıvan Muxtar Respublikası ərazilərində aparılmış tədqiqatlar nəticəsində müəyyən edilmişdir ki, denudasion kəsimin ən böyük kəmiyyəti avgit-maqnetit, molibden, mis, polimetal filiz yataq və təzahürləri ilə zəngin olan perspektiv sahələrə uyğun gəlir. Daxilində filiz daşıyan, lakin hələ açılmamış intruziv kütlələr güman edilən horst-antiklinor, sinklinor və antiklinor silsilə və tirələrdə də denudasion kəsimin qiymətinin böyük olduğu müəyyən edilmişdir.
Denudasion kəsimin kəmiyyətinin hesablanması nəticəsində müxtəlif paleogeomorfoloji şəraitdə baş vermiş denudasiya proseslərinin intensivliyini, nəql istiqamətini, çöküntü toplanma sahələrini müəyyən edib, müxtəlif səpinti tipli faydalı qazıntı yataq və təzahürlərinin axtarışını istiqamətləndirmək mümkündür.
Bu cəhətdən müxtəlif vaxtlarda çöküntü toplanma sahələri olan Kiçik Qafqazda Başkənd-Dəstəfur, Həsənriz, Dovşanlı qraben-sinklinor Qarqarçay sinklinor çökəklikləri, Talışda Biləsər qraben-sinklinal, Yardımlı sinklinor, Qosmalyan və Dıman vulkanik-tektonik, Naxçıvan MR-də Nurs-Türkeş, Paradaş sinklinor və Naxçıvan törəmə çökəkliklərinə perspektiv morfostrukturlar kimi baxmaq olar. Əgər böyük denudasion kəsimi olan perspektivli morfostrukturların üzəri cavan və kövrək çöküntülərlə örtülüdürsə, onda həmin səth çöküntülərinin və lava altında basdırılmış relyefin dəqiq öyrənilməsinin və xəritələşdirilməsinin böyük əhəmiyyəti vardır. Bu tədqiqatlar ekzogen proseslərin inkişaf xüsusiyyətlərini, filizli intruziv kütlələrin yuyulma sahəsini təyin etməklə yanaşı, səpinti yataqların əmələ gəlməsi üçün əlverişli şəraitin olduğu rayonları aşkar etməyə imkan verir. Bu üsuldan istifadə etməklə Kiçik Qafqazın bir çox çay hövzələrində (Tərtər, Zəyəm, Tovuz çayları və s.) tədqiqat işlərini istiqamətləndirmək və qənaətbəxş nəticələr əldə etmək olar.
Səpinti tip faydalı qazıntılar adətən kontinental çöküntülərlə onların altında qalan qədim relyeflə sıx surətdə bağlıdır. Ona görə də onların axtarışında relyefin inkişaf mərhələlərində həmin səpintilərin əmələ gəldiyi əlverişli şəraiti dəqiqləşdirmək, faydalı qazıntılarla zəngin olan köklü ana süxurların yuyulması ilə akkumulyativ qatın əmələ gəldiyi yerlərin və çay şəbəkəsinin istiqamətini öyrənmək böyük əhəmiyyət kəsb edir.
Kiçik Qafqazda inkişaf etmiş akkumulyativ, erozion-akkumulyativ terrasların, silsilələrin yamaclarının, düzəlmə səthlərinin, sinklinal platoların və çökəkliklərin səthi yumşaq çöküntülərlə örtülmüşdür. Aparılmış tədqiqatlar nəticəsində müəyyən edilmişdir ki, bu çöküntülərin mineraloji tərkibində maqnetit, rutil, sirkon, kinovar, xalkopirit, pirop və digər mineralların miqdarı və konsentrasiyası kondisiyaya yaxınlaşır. Məhz ona görə də müxtəlif vaxtlarda dəqiq öyrənilmiş bu tip relyef formaları böyük maraq doğurur.
Struktur-geomorfoloji tədqiqatlar nəticəsində Respublika ərazisinin bir çox sahələrində, o cümlədən Kiçik Qafqazda əksər çayların dərəsinin, bəzən də yarğan şəbəkəsinin dərin tektonik pozulma və qırılmalar üzrə inkişafı müəyyən edilmişdir.
Kiçik Qafqazdakı dərinlik tektonik pozulma və qırılmaların əksəriyyətinin filiz daşıyıcı kanallar olduğu müəyyən edilmişdir.Bu baxımdan tektonik pozulma və qırılmalar üzrə inkişaf etmiş çay-dərə sistemləri axtarış işləri üçün əsas obyektlərdən biri ola bilər. Bundan başqa çay dərələri səpintilərin toplanması üçün ən əlverişli sahədir. Çünki filiz daşıyan kütlələrin yuyulması, aşınma məhsullarının daşınması və səpintilərin çökdürülməsi bilavasitə çaylar vasitəsilə yerinə yetirilir. Bu nöqteyi-nəzərdən perspektivli maqmatik kütlələr inkişaf etmiş əksər çay dərələri kompleks tədqiqat obyekti ola bilər.
Azərbaycan Respublikası ərazisində məşhur çökmə filiz formasiyası sinklinor strukturlarda toplanaraq onu dolduran stratiqrafik bölgülərlə paragenez əmələ gətirir. Ona görə də Böyük və Kiçik Qafqazda sedimentasion filiz yataqlarını öyrənərkən mineral əmələgəlmə və litogenez epoxalarının korelyasiyasının, paleostruktur, paleovulkanoloji rekonstruksiyasının, denudasiya və akkumulyasiya zonalarının, filiz toplanan zona və strukturlarının yuyulub-açılma vaxtının, transqressiya və reqressiya fazalarının sərhədlərinin müəyyən edilməsinin böyük rolu vardır.
Böyük Qafqazın cənub yamacındakı Filizçay mis-polimetal yataqları zonasında qravitasiya prosesləri ilə əlaqədar olaraq yaranmış sürüşmə-uçqun relyef formalarının əmələgəlmə xüsusiyyətləri və onların dinamikasının geomorfoloji tədqiqatlar vasitəsilə öyrənilməsinin də böyük əhəmiyyəti vardır. Bu formaların dəqiq təhlili nəticəsində, iri qaymalardakı filizli damarlara əsasən Böyük Qafqazın cənub yamacında mövcud olan filizli zonaların uzanma istiqamətini izləmək mümkündür.
Beləliklə, morfostruktur təhlil paleogeomorfoloji üsulların müxtəlif geoloji tədqiqatlarla kompleks istifadə olunması nisbətən zəif və yaxud da, aparılmış geoloji axtarış üsulları müsbət nəticə verməyən struktur-metallogenik zonalarda axtarış və kəşfiyyat işlərini daha əlverişli istiqamətdə aparılmasına imkan verə bilər.
Xəlilov Hüseyn Ağamalı oğlu
27 oktyabr 1942,Füzuli rayonunun Hüngütlü kəndi
AMEA akademik H.Ə.Əliyev adına Coğrafiya İnstitutu “Geomorfologiya və təbii risk “ şöbəsi, baş elmi işçi
Coğrafiya elmləri doktoru
1969-cu ildən geomorfologiyanın ən perspektivli sahələrindən olan morfostruktur təhlil və paleogeomorfologiya, onların tətbiqi, xüsusilə də faydalı qazıntı yataqlarının geomorfoloji axtarışı məsələləri və eləcə də geomorfologiyanın metodoloji və problem məsələlərinin həlli istiqamətində müstəqil elmi tədqiqat işləri aparır və bu sahədə mühüm nəticələr əldə etmişdir. Onun geomorfoloji tədqiqatların nəzəri əsasının “Materiyanın geomorfoloji hərəkət forması”, obyektinin “geomorfosfera”, öyrənilmə prinsipinin “korrelyativlik”, relyefin əmələgəlmə və təkamülü mexanizminin “geodriftogenal”, paleorelyefin bərpasının “məzmun-forma” əlaqəsi qanunauyğunluğu, düzəlmə səthi və denudasion kəsimin “abrazion-dissent”, intruziv və ekstruziv kütlələrin dinamikliyinin “intralabillik” konsepsiyaları, morfostruktur və morfoskulpturların yeni planetar səviyyədə genetik və taksonomik təsnifatları əsas nailiyyətlərindəndir.
3-ü monoqrafiya ( 2-si kollektiv), 4-ü kitab (kollektiv), olmaqla 140 elmi işin müəllifidir.
"YER VƏ İNSAN" jurnalı № / 04/ MAY- İYUN
Strategiya.az
Paşinyan Kremldə: iki məsələdə xəyal qırıqlığı və ziddiyyətlər
Gələcək zəfərlərdən xəbər verən sarsılmaz Azərbaycan-Türkiyə birliyi
HEYDƏR ƏLİYEV - YENİ MİLLİ İNTİBAHIN VƏ MÜSTƏQİL DÖVLƏTÇİLİYİN ƏSASINI QOYMUŞ TARİXİ LİDER
Müasir dövrün qlobal problemi iş şəraitində mobbinq ve mübarizə yolları
Azərbaycan Respublikasında Dövlət Qulluğunun Təkmilləşdirilməsi İstiqamətləri
HEYDƏR ƏLİYEV - MÜASİR AZƏRBAYCAN TARİXİNİ YARADAN LİDER
Xarici valyutaların manata qarşı bugünkü məzənnəsi
Ceyhun Bayramov ölkəmizin Avropanın enerji təhlükəsizliyində mühüm rol oynadığını bildirib
İmtahanın nəticələri ilə əlaqədar müraciətlərə baxılması üçün Apellyasiya Şurasına ərizə qəbuluna başlanılıb
Xarici işlər naziri Ceyhun Bayramov NATO-nun Baş katibi Yens Stoltenberq ilə görüşüb
Avropa İttifaqı münaqişədən sonrakı dövrdə mühüm rol oynayır - Ceyhun Bayramov
"Qarabağ" İsveçrə çempionuna qalib gəldi
Tehranda Rusiya və Türkiyə prezidentlərinin görüşü olub
Ceyhun Bayramov Gürcüstanın Baş naziri ilə bölgədə sülh prosesini müzakirə edib
Mikayıl Cabbarov: Sənaye zonalarında istehsal 53 faiz, ixrac isə 2 dəfə artıb
Ağalı kəndinə köçürülən ailələrin tibbi müayinələrinə başlanılıb
Prezident İlham Əliyev: Bizim Xəzər dənizi kimi çox nəhəng bir enerji mənbəyimiz var
Qubada içərisində 125 min manat olan seyf oğurlanıb
İrəvan Dövlət Azərbaycan Dram Teatrının 140 illiyi qeyd edilləcək - SƏRƏNCAM
Azərbaycan tarixinin şanlı səhifələrindən biri - 14 iyul 1969-cu il
Şuşada Vaqif Poeziya Günləri başlayıb
Təhsil Nazirliyi: 204 məktəbdə elektron jurnal və gündəlik sistemi tətbiq edilib
Təhsil Nazirliyi məlumat yaydı
FHN: Zəngilan rayonunda ağaclıq ərazidə baş verən yanğının tam söndürülməsi istiqamətində tədbirlər görülür
Azərbaycan neftinin qiyməti 114 dolları ötüb
Azərbaycan Ordusunun əsgəri həlak olub
Baş Prokurorluq rəis müavininin intiharı ilə bağlı məlumat yaydı
Respublika üzrə pensiyaların iyulun 15-də tam ödənilərək yekunlaşdırılması nəzərdə tutulub
Qızıl təpə abidəsində arxeoloji tədqiqatlar davam edir
Azərbaycan neftinin bir bareli 113,91 dollara satılır
Bakı-Tbilisi-Ceyhan neft boru kəmərinin tam istismara verilməsindən 16 il ötür
Partlayış zamanı “Baktelecom”un rabitə infrastrukturuna ziyan dəyməyib
Dünyada "Premium Euro-95" benzinin bahalaşması gözlənilir - Azərbaycana necə təsir edəcək?
Azərbaycan nefti ucuzlaşıb
Böyük Britaniyanın yeni baş nazirinin adı sentyabrın əvvəlində açıqlanacaq
Tovuz döyüşlərindən iki il ötür
Bakının mərkəzində partlayış baş verib
Cüdoçularımız Xorvatiyada Qran-Pri turnirində iştirak edəcəklər
Ərdoğan yaxın zamanda Venesuelaya səfər edəcək - Maduro
Türkiyə və Ukrayna prezidentləri arasında telefon danışığı olub
Xaçmazdakı meşə yanğınının söndürülməsinə iki helikopter və amfibiya tipli təyyarə cəlb olunub
Ərdoğan və Paşinyan arasında telefon danışığı olub
Saatlı stansiyası yaxınlığında qəzaya uğrayan qatar Gürcüstana məxsusdur - ADY
FHN Xaçmazdakı meşə yanğınları ilə bağlı məlumat yayıb
Vahid əlaqələndirmə mərkəzlərində 41 min şəxsə xidmətlər göstərilib
Kino Agentliyi Mədəniyyət Nazirliyinin tabeliyində olan qurumların siyahısına əlavə edilib
Gələn ilin sonunda Şuşa ilk sakinlərini qəbul edəcək - Aydın Kərimov
Azərbaycan Ordusunun hərbçisi həlak olub
DİN: Ötən gün ölkə ərazisində qeydə alınan cinayətlərdən 52-nin açılması təmin olunub
Xocavənd rayonu ərazisində yeni hərbi hissənin açılışı olub
Birinci vitse-prezident Mehriban Əliyeva Qurban bayramı münasibətilə xalqımızı təbrik edib
Abeyə atəş açan şəxs əməlinin səbəbini açıqlayıb
Zakir Həsənov Qurban bayramı münasibətilə Azərbaycan Ordusunun şəxsi heyətini təbrik edib
XİN Azərbaycanın diplomatik xidmət orqanlarının əməkdaşlarını peşə bayramı münasibətilə təbrik edib
Bu gün Azərbaycanda Qurban bayramı qeyd edilir
Bərdədə avtomobil yolunun tikintisi ilə bağlı 3,1 milyon manat ayrıldı - SƏRƏNCAM