Lavrov Bakıya niyə gəldi? - Müttəfiq axtarışında olan Rusiya

Bu gün Rusiya xarici işlər naziri Sergey Lavrovun Azərbaycana səfəri başlayıb.

Səfər çərçivəsində iki ölkə arasında ikitərəfli və çoxtərəfli münasibətlər, əməkdaşlıq perspektivləri, regionda gedən proseslər, eyni zamanda, Ermənistan-Azərbaycan, Dağlıq Qarabağ münaqişəsi müzakirə ediləcək.

Lavrovun səfəri zamanı azərbaycanlı həmkarı Elmar Məmmədyarov və digər rəsmi şəxslərlə görüşəcəyi gözlənilir.

S. Lavrovun Azərbaycana səfəri ilə bağlı ATV.az-a danışan millət vəkili Zahid Oruc bildirib ki, Lavrovun şəxsində bu ranqda şəxsin ölkəmizə səfəri böyük əhəmiyyətə malikdir.

“Nəzərə almaq lazımdır ki, Rusiya gündəmi həddindən artıq mürəkkəb bir şəraitdədir. Bu dönəmdə Lavrovun Azərbaycana səfəri, Rusiyanın strateji maraqları sırasındadır”.

Məsələnin  kontekstini nəzərə çatdıran politoloq, Rusiya xarici işlər nazirinin bu dönəmdə Azərbaycana səfərinin mahiyyətini belə görür:

Gürcüstan ABŞ-ın 53-cü ştatı

“Bir tərəfdən, Qərbin Cənubi Qafqaz uğrundakı savaşı fərqli məna kəsb eləməyə başlayır. Artıq bu barədə mediada geniş məlumatlar  da verildi ki, Gürcüstan üzərində NATO-nun uzun illər həyata keçirdiyi hərbi tədbirlər təhlükəsizlik işləri (tank-topların yerləşdirilməsi, müxtəlif silahların verilməsi, insanların göndərilməsi) ən sonda NATO baş katibinin gəlişi ilə nəticələndi. Təbii ki, bu yekun eyil. ABŞ daha irəli gedərək yəqin ki, Gürcüstanı bütövlükdə özünün 53-cü ştatına çevirəcək. Rusiya bu şəraitdə seyirçi mövqedə qala bilməzdi”.

Azərbaycan həlledici mövqedə

Politoloq bildirir ki, S. Lavrovun Azərbaycana səfərinin bir səbəbi onun iqdisadi, siyasi mövqeyidir.

“İkinci tərəfdən belə dönəmdə Azərbaycanın NATO-Rusiya qarşıdurmasındakı mövqeyi kifayət qədər həlledici əhəmiyyət daşımağa başlayacaq. Ermənistan Rusiya yönümlü ölkə olsa da, onların Avropa məkanı ilə xüsusi əlaqələri  yoxdur. Gürcüstan da çox mənfi resuslara və imkanlara malikdir. Ərazisinin də 22 faizi işğal altındadır.  Belə olan təqdirdə Lavrovun səfəri sırf bu regional prosseslərə və beynəlxalq məsələlərə Azərbaycanın mövqeyini öyrənmək üçündür”.

Azərbaycanın regionda iqdisadi-siyasi cəhətdən möhkəmlənməsi Rusiyanı qıcıqlandırır.

“İkincisi, Rusiya çox yaxşı dərk eləyir ki, İrəvandan Moskvaya hər gün məruzə olunan “Qarabağdakı itkilər” məsələsi həyəcanlı şəkil almaqdadır. Yəni, Azərbaycan öz gücünü həm də, Rusiyadan silah almaqla kifayət qədər artırıb. Bütün sərhəd bölgələrində və təmas xəttində Azərbaycanın imkanlarının genişlənməsi Erməni tərəfin itkilərinin qat-qat artması ilə müşayiət olunur. Bu ağrı nəticələr doğurur. Rusiya Ermənistanı müəyyən mənada qoruduğuna və onun təhlükəsizliyinə, hətta hüquqi tərəflərlə cavabdehlik daşıdığına görə, Sarkisyan aparatının və yaxud, Müdafiə Nazirliyinin Kremilə ötürdüyü informasiyalara oradakı analitiklər seyirçi qarşılaya bilməz. Bu səbəbdən güman ki, Lavrov Qarabağ məsələsinin həlli ətrafında Azərbaycanın mövqeni almaqla bir daha ortaq yollar arayışında olacaq”.- deyə politoloq bildirib.

Rusiya Dağlıq Qarabağ məsələsində maraq göstərir. Niyə?

“Rusiyada dərk edirlər ki, Azərbaycanın iqdisadi və hərbi cəhətdən güclənməsi fonunda, ən azı 7 rayonun qaytarılması ilə bu bölgədə müharibə təhlükəsini önləyə bilər. Beləliklə şəraitə özü nəzarət edər və Qafqaza Qərb yiyələnə bilməz. Çünki bu regiona Avropa dairələrini gətirən, məhs münaqişələrdir. Münaqişələrin həlli yolunda addım atılmasa, Rusiyanın özü üçün də vəziyyət çətin olacaq. Bunun üçün də Lavrova Azərbaycanın mövqeyi kifayə qədər əhəmiyyətlidir.  Ona görə ki, Qərb, Ukraynayla paralel, Rusiya əleyhinə növbəti cəbhəni məhs Qafqazda açır”.-deyə politoloq bildirib.

Natavan ÇAVUŞ