Qayğı da var, nəzarət də

 Sumqayıtı mən bax, belə görürəm: gələcəkdə Cənubi Qafqazın ən böyük sənaye mərkəzlərindən biri, dünya miqyasında ən böyük sənaye mərkəzlərindən biri olmalıdır, eyni zamanda, ekoloji cəhətdən tam təmiz, insanlar üçün rahat, gözəl, abad bir şəhər olmalıdır. Sumqayıtın təbiətini, dənizə çıxışını nəzərə alaraq, şəhər geniş miqyasda sənaye, turizm, mədəniyyət, istirahət mərkəzi olmalıdır. Bax, mən Sumqayıtı belə görürəm. Bu məqsədlərə çatmaq üçün hesab edirəm ki, kifayət qədər işlər görülmüşdür və sumqayıtlılar bütün bu işlərdə fəal iştirak etmişlər.

İlham Əliyev,

Azərbaycan Respublikasının Prezidenti.

         Bu gün dünyanın hər bir nöqtəsindıə bayrağımızın ucaldılması, Azərbaycan həqiqətlərinin ən nüfuzlu təşkilatlar tərəfindən etiraf olunması onu deməyə  əsas verir ki, xalqın inamına söykənən siyasi iradə və qətiyyətin əsas hədəfi təkcə regionun deyil, dünyanın ən qüdrətli dövlətlərindən birinə çevriləcək Azərbaycan qurmaqdır. Sabitlik adası kimi dünyadan boy verən ölkəmizin əldə etdiyi uğurların təməlində, dövlət başçımızın da dəfələrlə qeyd etdiyi kimi, sabitlik və ictimai asayişin etibarlı mühafizəsi durur. Bu isə onu deməyə əsas verir bu inkişafda digər hüquq-mühafizə orqanları kimi Azərbaycan Polisinin  də rolu danılmazdır.

         Baş Mühafizə İdarəsinin fəaliyyətini təkcə DİN rəhbərliyi deyil, vətəndaşlar da yüksək qiymətləndirirlər. Çünki keçən illər ərzində xidmətin təşkili, aparılması, ona nəzarət və şəxsi heyətin bu istiqamətdəki fəaliyyəti təkmilləşib işlək bir mexanizm halını alıb. DİN rəhbərliyi də daim bu qurumun təkmilləşməsinə, şəxsi heyətin sosial problemlərinin, qayğılarının həllinə çalışır. BMİ-nin paytaxtda və yerlərdə olan idarə, şöbə və bölmələrində peşə və fiziki hazırlığa ciddi nəzarətin və tələbkarlığın  yüksək səviyyədə olması cinayətkarlıqla mübarizədə, asayişin qorunmasında, xüsusilə də dövlət, sosial və strateji obyeyktlərin, vətəndaş mənzilləri mühafizəsində əsaslı dönüş yaradıb.

         Mühafizə etmək, etibar olunanı qorumaq çox böyük məsuliyyətdir və bunun öhdəsindən Sumqayıt Şəhər Mühafizə İdarəsinin əməkdaşları layiqincə gəlməyə çalışırlar. Ümumiyyətlə, hər hansı bir xidmət haqqında yazı hazırlayarkən ilk növbədə onun əldə etdiyi göstəricilərlə tanış olur, müşahidələr aparır, qeydlər edirik. ŞMİ-nin rəisi, polis polkovniki Akif Alışanovla söhbətimizə də müşahidə etdiklərimdən və apardığım qeydlərdən körpü saldım.

Gündən-günə inkişaf edib gözəlləşən və böyüyən  bir şəhərdə xidmət aparmağın, mühafizə etməyin çətin olub-olmamsı barədə soruşanda o, bunları dedi:

-         Bizdə xidmətin müasir standartlara uyğunlaşdırılması prosesi davam etdirilir, normativ-hüquqi bazanın inkişafı ilə yanaşı, maddi-texniki təminatın yaxşılaşdırılması,  nizam-intizamın, əməkdaşların sosial müdafiəsinin gücləndirilməsi məqsədilə zəruri tədbirlər həyata keçirilir. Bu isə xidmət zamanı qarşıya çıxan hər hansı problemin yerindəcə həllinə kömək edir.  Göstərilən diqqət və qayğının nəticəsidir ki, əməkdaşlarımızın fiziki və professional hazırlıqları, xidmətin təşkili, aparılması və onun təkmilləşdirilməsi, nizam-intizama riayət olunması, əməkdaşların intellekt səviyyəsinin yüksəldilməsi, qorunan obyekt və mənzillərin etibarlı mühafizəsi, cinayətkarlığa qarşı mübarizə istiqamətində görülən işlər konkret faktlarla öz nəticələrini verir. Əhali bu sahədə də mühafizə polisinə etibar edir, güvənir…

Günün istənilən saatında onlar xidmət başındadırlar və vəzifələri təkcə mühafizə etmək deyil, asayişi qorumaq, cinayətkarlıqla mübarizə aparmaqdır.

Öyrənirik ki, Şəhər Mühafizə İdarəsi tərəfindən dövlət və özəl mülkiyyətə məxsus 382 obyekt, o cümlədən 199 mənzil Kompyuterləşmiş Mərkəzi Mühafizə Məntəqəsi vasitəsilə qorunur. Bu ilin 9 ayı ərzində 101 obyekt, o cümlədən 78 mənzil mühafizəyə qəbul olunmuş və 100-ü müasir tipli siqnalizasiya sistemi ilə təchiz olunaraq KMMM-ə qoşulmuşdur. Mühafizə olunan obyektdən 8 oğurluq hadisəsinin qarşısı alınmış, axtarışda olan 46 şəxs tutulmuş, cinayət hadisələri törədən 2, ictimai qaydanı pozan 30 nəfər yaxalanaraq Şəhər Polis İdarəsinin bölmələrinə təhvil verilmişdir.

         Nizam-intizamı, şəxsi keyfiyyətləri və nümunəvi xidməti ilə seçilən 102 əməkdaş xidmətdə fərqləndiyinə görə mükafatlandırılmış,  ikisi zabit olmaqla 18 nəfərə xüsusi rütbələr verilmişdir. Ötən dövr ərzində 917 vətəndaş İdarəyə müraciət etmişdir. Xidmətə qəbul olunan gənc əməkdaşlarla işin təşkilində də mühüm irəliləyişlər var. Hamilərin fəaliyyəti ürəkaçandır, təqaüddə olan əməkdaşlar da öz peşə təcrübələrini bölüşür, onlara dəstək olurlar. Mütəmadi olaraq, veteranlarla görüşlər keçirilir ki, bu da öz növbəsində gənc əməkdaşların işə münasibətində mühüm rol oynayır...

 Yeri gəlmişkən, bu il aprelin 28-də Azərbaycan Həmkarlar İttifaqı Konfederasiyasında Ümumdünya Əməyin Mühafizəsi günü ilə əlaqədar “Sağlam və təhlükəsiz əmək şəraitinin yaradılması üzrə ilin ən yaxşı müəssisəsi” respublika müsabiqəsinin yekunlarına və Beynəlxalq Əmək Təşkilatının təşəbbüsü ilə "İş yerlərində kimyəvi maddələrdən istifadə zamanı əməyin mühafizəsi üzrə təhlükəsizlik tələbləri"nə həsr edilən tədbirdə mükafatlananlar sırasında Sumqayıt Şəhər Mühafizə İdarəsi də vardı.

Mühafizə sistemi özünü maliyyələşdirən qurum olduğu üçün onlar çalışırlar ki, daha çox obyekt mühafizəyə cəlb edilsin, özəl mühafizə qurumları ilə rəqabətdə öz öncül mövqeyini də qorusun. Çünki bu fakt əməkdaşların maddi rifah halının yüksəlməsində mühüm əhəmiyyət daşıyır.

 Sumqayıt Şəhər Mühafizə İdarəsinin əməkdaşları yaxşı bilirlər ki, onlar respublikamızın üçüncü böyük şəhərində xidmət aparırlar. Strateji obyektlərin, dövlət və hakimiyyət orqanlarının, mühüm ali təhsil ocaqlarının, kommersiya banklarının, mədəniyyət məbədlərinin, böyük ticarət mərkəzlərinin yerləşməsi xüsusi sayıqlıq tələb edir. Bu səhər və axşam toplanışlarında şəxsi heyətin nəzərinə çatdırılır, şəxsi heyət üzərinə düşən vəzifələrin məsuliyyətini dərk edir.

         Bütün bunlar isə ondan xəbər verir ki, qarşıya qoyulmuş vəzifələrin uğurla yerinə yetirilməsinə can atan paqondaşlarımıza qayğı ilə birlikdə xidmətlərinə qiymət də var, nəzarət də.