Sabitlik adlı sərvətimiz…

12:38 / 15.10.2016

Hafiz Təmirov

Yeraltı-yerüstü sərvətləri kimi əmin-amanlığı, sabitliyi də hər bir ölkənin sərvətidir. Bu gün “bahar”ların təhlükəli olduğu dünyada böyük sərvətlərə malik ölkələrdə bəzi supergüclərin “köməkliyi” ilə “demokratiya”nın necə bərqərar olduğunun şahidiyik. Gücün diqtəsi ilə insan hüquq və azadlıqlarının bombardman edilməsi ədalətin təpəl prinsiplərində insanlığa yox şüarını günümüzün mənəzərəsinə çevirib.

Ədaləti ədalətsizliklə bərpa etmək istəyənlərin güclənən mövqeyi təəsüflər olsun ki, bəşəriyyətə hələ bundan sonra hansı bəlaları yaşadacaqlarından xəbər verir. Bəlli proseslərdən sonra bir çox dövlətlərin münaqişəli ərazilər üstündə müharibəyə başlayacaqları da qaçılmazdır. Və belə getsə, deyəsən, iyirminci əsrin əvvəllərindən bu günə kimi hələ də həllini tapmayan bəzi münaqişələrin üstündən sükutla keçiləcək.

Dünya birliyi ifadəsi artıq öz dəyərini itirib. Çünki qloballaşmanın pik həddində olan dünyada parçalanmaqdan, bölünməkdən başqa heç nə gözə dəymir. İnsanların din, dil, irq ayrı-seçkiliyinin bir adı var-müharibə. Müharibə həm də ən böyük gəlir mənəbəyidir, bunu tarix, zaman sübut edib. XXI əsrin müharibəsi dünənin qurşun müharibəsi anlamından çox uzaqdır və uçan, qanadlı uzaqvuran raketlərin erası çoxdan başlayıb. Dünyanın xilası söz, fikir müstəvisində deyil, polqonlarda döyüşə hazırlanan əsgərlərdən daha çox asılıdır. Sözün bitdiyi yer artıq elə yer kürəsidir. Çünki indi söz də, əməl də bir şeyə xidmət edir-dinləri, dilləri və dövlətləri bölməyə.

Dünyanı idarə etmək istəyənlərin məqsədi sabitliyi yer üzündən silməkdir. Bu gün çox çətin və sınaqlarla dolu bir zamanda dövlətimizin sükanını fırtınalar içində qoruyub-saxlaya biliriksə bu, bizim qazancımızdır. Həm daxildən, həm də xaricdən edilən təzyiqlərin nədənini anlamaq elə də çətin deyil. Azərbaycan onların diqtə etdiyi mövqedən çox-çox uzaqdadır. Onların uzaqmənzilli fikirlərinin hədəfindən də özümüzü yayındırmağı bacarırıq. Elə cənab Prezidentin Nazirlər Kabinetinin doqquz ayın sosial-iqtisadi yekunlarına həsr olunmuş iclasında dediyi fikirlər bizim dövlət olaraq hansı gözləgörünən və görünməz güclərlə mübarizəmizi bir daha sərgiləmiş oldu.

Bəli, əldə etdiyimiz bütün iqtisadi, siyasi və diplomatik uğurlarımızn bünövrəsində həm də sabitlik durur, inkişafı şərtləndirən əsas amillərdən biri məhz odur. Sabitlik isə göz qabağındadır. Ölkəmizdə terrorizm də daxil olmaqla cinayətkarlığa qarşı mübarizə, əhalinin hüquq-mühafizə orqanlarına etimadı, asayiş keşikçilərinin vətəndaşları bütün təhlükələrdən qoruması sabitlik adasının təhlükəsizliyindən xəbər verir. Bütün bunlar isə heç də asan başa gəlmir. Azərbaycanın hüquq-mühafizə, o cümlədən daxili işlər orqanları cinayətkarlığa, pozuculuğa, fitnəkarlığa qarşı gecə-gündüz qətiyyətlə mübarizə aparır. Eyni zamanda, profilaktiki tədbirlər səngimir, polis-vətəndaş münasibətləri daha işgüzar, səmərəli xarakterdə formalaşır. Bunu sübut və təsdiq etməyə də ehtiyac yoxdur. Necə deyərlər, görünən dağa nə bələdçi?

Sabitlik adlı sərvətimiz…

Hafiz Təmirov

Müəllifin digər yazıları

Xəbərlər

Ədəbiyyat

© 2012 | Bütün hüquqları qorunur.

Əlaqə