Etibar edənlər peşman olmur…

Ölkəmizin bir çox beynəlxalq tədbirlərə, idman yarışlarına ev sahibliyi etməsi, dünyanın müxtəlif ölkələrindən gələn iş adamlarının, turistlərin sayının ildən-ilə artması Azərbaycana olan marağın, vətənimizdəki təhlükəsizlik mühitinin daha bir göstəricisidir.

Sıralarını gündən-günə peşəkar, çevik, savadlı mütəxəssislərlə gücləndirən polisimiz xalqın və dövlətin keşiyində ayıq-sayıq durub onu bütün təhlükələrdən qorumaq üçün qarşıya çıxan çətinliklərin öhdəsindən layiqincə gəlir. Polis və vətəndaş münasibətlərinin qurulması, cəmiyyətdə polisə inamın artması ondan xəbər verir ki, xalq-polis həmrəyliyi bərpa olunub. Bu isə o deməkdir ki, baş verən cinayətlərin açılması üçün polislə bərabər vətəndaş da səy göstərir. Bu həm də hüquqi maarifləndirmə işinin paytaxtda və yerlərdə düzgün istiqamətdə təşkilinin nəticisidir.

DİN Baş Mühafizə İdarəsinin paytaxtda və yerlərdəki qurumlarının əməkdaşlarının da fəaliyyəti ölkə ictimaiyyəti tərəfindən hər zaman xüsusi rəğbət hissi ilə təqdir olunur.

Əbəs yerə deyil ki, bu gün dövlət və şəxsi mülkiyyətin, asayişin etibarlı qorunmasından söhbət gedəndə ilk növbədə yada düşən mühafizə polisi olur. Öz vəzifə borcunu yerinə yetirən Azərbaycan Polisinin bu strukturu təkcə mühafizə etmir, həmçinin cinayətkarlıqla mübarizə aparır, ictimai asayişi qoruyur. Xüsusən də son zamanlar əhalinin evlərinin, mülklərinin mühafizə olunması üçün polisə üz tutmaları ondan xəbər verir ki, polis vətəndaşların inamını, etibarını qazanıb və ən ümdəsi özünü sevdirməyi bacarıb.

Əldə olunan uğurlar, yüksək göstəricilər onu deməyə əsas verir ki, mühafizə polisi qarşıya çıxan çətinliklərdən qorxmur və müxtəlif vasitələrlə ictimai qaydanı və ictimai asayişi pozanlara, cinayət törədənlərə, cinayətə meylli olanlara qarşı mübarizə metodlarının dövrün tələblərinə uyğun olaraq daha da gücləndirilməsi, müasir texniki vasitələrdən istifadə bacarığının artırılması, döyüş və peşə hazırlığında yeni-yeni nailiyyətlərin əldə olunması onların əsas hədəfidir.

Xüsusi mühafizə, siqnalizasiya vasitələrinin obyektlərin mühafizəsində istifadə olunması həmkarlarımızın işini xeyli asanlaşdırsa da, yenə də peşəkar əməkdaşlara, “ürəkli” oğullara ehtiyac var...

Əlbəttə, oğurluğa cəhd hallarının qarşısı alınması və ya hər hansı bir qorunan obyektdən, mənzildən oğurluq etməkdə şübhəli bilinənlərin tutulması İdarənin əməkdaşlarının peşəkarlığından, nizam-intizamdan xəbər verir. Həm də etibar olunanı qorumaq məsuliyyətini hər bir əməkdaşın bölüşməsi şəxsi heyət arasında mənəvi-psixoloji durumun yüksək səviyyədə olmasının, kollektivçilik ənənələrinin sağlamlığının bariz nümunəsidir.

Elə Mühafizədən söhbət düşmüşkən, Bakının ən böyük rayonlarından biri olan Sabunçuda mühüm dövlət obyektlərini, mənzilləri, strateji məkanları qoruyan, asayişin təminində fəal iştirak edən, cinayətkarıqla mübarizə aparan Sabunçu Rayon Mühafizə İdarəsi haqqında, daha doğrusu, İdarənin əməkdaşları tərəfindən bu yaxınlarda qarşısı alınan bir neçə cinayət faktı barədə söhbət açmaq istəyirəm.

Dekabrın 1-də xüsusi siqnalizasiya vasitəsilə qorunan Zabrat qəsəbəsindəki 38 nömrəli Aptekdən həyacan siqnalı daxil olub. Hadisə yerinə bir dəqiqədən az müddətdə çatan 5 nömrəli avtomarşrutla xidmət aparan polis serjantarı Amil İbadov və Eynar Bəkirov aptekin qapısını sındıraraq ora daxil olmuş Sabirabad rayonunda qeydiyyatda olan və Çiləgir qəsəbəsində kirayədə qalan Nemət Abdullayevi elə iş başındaca yaxalamış, onu 15-ci PB-ə təhvil vermişlər.

Növbəti bir oğurluğa cəhdin qarşısı da vaxtında alınmış, qorunan obyekt sahibinə heç bir ziyan dəyməmişdir. Belə ki, dekabrın 5-də Zabrat-1 qəsəbəsindəki Aptekdən daxil olan həyəcan siqnalı ilə yenə də adları çəkilən əməkdaşlar həmin əraziyə getmiş, aptekin giriş qapısını sındıraraq oğurluğa cəhd edən Tovuz rayon sakini, hazırda Məhəmmədi qəsəbəsində yaşayan Vahid Məmmədtağıyevi hadisə yerində yaxalamışlar.

RMİ-nin rəis müavini, polis polkovnik-leytenantı Sahib Cəfərli ilə son on bir ayın göstəricilərinə də nəzər saldıq. O, əməkdaşların, xüsusən də polis serjantları Amil İbadovun, Eynar Bəkirovun və sıralarına qoşulan gənc əməkdaşların xidmətdə özünü doğrulduğundan söhbət açdı və mühafizə olunan obyektlərdə oğurluq və digər halların qarşısının alınmasında onların əməyini xüsusi qiymətləndirdi. Rəis müavini onu da qeyd etdi ki, adları çəkilən hər iki əməkdaş BMİ rəhbərliyi tərəfindən mükafatlandırılmışdır.

O da vurğulandı ki, İdarə rəisi, polis polkovniki Əşrəf Allahyarov peşə və xidməti hazırlıq dərslərində şəxsən əməkdaşlarla profilaktiki söhbətlər aparır, onlara xidmətlərində daha da ayıq-sayıq olmağı tövsiyə edir.

Yeri gəlmişkən qeyd edək ki, rayon ərazisində hazırda əməkdaşlar 5 avtomarşrut üzrə xidmət aparırlar. Belə ki, nisbətən uzaq olan ərazilərdə-Zabrat, Zabrat-2, Kürdəxanı, Balaxanı və Pirşağının bir hissəsində xidmətin təşkili üçün beşinci avtomarşrutun açılmasının vacibliyi ilə bağlı qərar qəbul edən idarə rəhbərliyi BMİ-yə müraciət etmiş və bu təklif müsbət qarşılanmışdır.

Rayon Mühafizə İdarəsinin əməkdaşları bu gün ərazidə maarifləndirmə tədbirləri aparır, məktəblərdə, əmək kollektivlərində görüşlər keçirir, mühafizə işinin faydası ilə bağlı əhaliyə məlumat verirlər. Mənzillərin, obyektlərin mühafizəyə götürülməsində 14-cü, 15-ci və 42-ci Polis Bölmələrinin köməyini diqqətimizə çatdıran S.Cəfərli bildirdi ki, ötən bir ay müddətində 12, il ərzində isə 40-dan çox mənzil və digər obyektlər məhz həmin bölmələrin əməkdaşlarının sayəsində Rayon Mühafizə İdarəsi tərəfindən mühafizəyə cəlb olunmuşdur.

Rəis müavini həmçinin dedi ki, idarə tərəfindən dövlət və özəl mülkiyyətə məxsus 640 obyekt, o cümlədən 354 mənzil mühafizə olunur. Obyektlərdən 20-i polis, 19-u mülki mühafizə, 6-sı qarışıq xidmət, 595, o cümlədən 354 mənzil KMMM-lə qorunur. Polisə olan inamın, etimadın göstəricisidir ki, 116 obyektlə mühafizəyə dair digər xidmət növünə görə müqavilə imzalanıb.

Ərazi polis orqanları ilə qarşılıqlı əlaqələrin yaradılması rayon ərazisində cinayətkarlığa qarşı mübarizənin gücləndirilməsinə təkan verib. Belə ki, siqnalizasiya vasitələri ilə qorunan 36 obyektdə, o cümlədən 5 mənzildə oğurluğa cəhdin qarşısı alınaraq 6, baş vermiş digər 6 cinayət hadisəsinin qarşısı alınarkən 9, narkotik faktı ilə bağlı 2, qanunsuz silah saxlayan 1 nəfər tutulmuş, həmçinin axtarışda olan 2, ictimai qaydanı pozan 18, yaşayış evlərinin, inzibati binaların divarlarına reklam xarakterli məlumatlar yazmaqla şəhərin estetik gözəlliyinə zərər vuran 2 nəfər saxlanılaraq aidiyyatı üzrə təhvil verilmişdir.

Görülən işlər, uğurlu tədbirlər onu deməyə əsas verir ki, artıq BMİ-də, onun paytaxtdakı və yerlərdəki idarə və şöbələrində xidmətin təşkili, aparılması, ona nəzarət və şəxsi heyətin bu istiqamətdəki fəaliyyəti təkmilləşib işlək bir mexanizm halını alıb. DİN rəhbərliyi də daim bu qurumun texniki təchizatına, şəxsi heyətin sosial problemlərinin, qayğılarının həllinə çalışır.

Qeyd etmək yerinə düşər ki, etibar qazanmaq, etimadı doğrultmaq həm də məsuliyyət hissini artırır. Bu, təkcə bir fərdə, bir şəxsə aid edilmir.

Mühafizə polisi yarandığı gündən bu günə kimi ona etibar edənlərin inamını doğruldub, etibarını qazanıb. Mühafizə etmək, eyni zamanda, cinayətkarlıqla mübarizə aparmaq onları insanlara sevdirib. Gündən-günə özəl mühafizə

xidmətlərinin sayı çoxalsa da, iş adamlarının, böyük biznes sahiblərinin polisə üz tutması uzun illər qorunub-saxlamılan ənənənin davamıdır.

Sabunçu Rayon Mühafizə İdarəsinin əməkdaşları da bu ənənənəi davam etdirir, qazandıqları uğurların sayı gündən-günə çoxalsa da başlarını aşağı salıb “Hələ görüləsi işimiz çoxdur”,- deyirlər. Əldə etdikləri uğurların bir adı var: gördükləri işə, təklif etdikləri xidmətə məsuliyyətli yanaşma. Dəfələrlə müşahidə etmişəm: Rayon Mühafizə İdarəsinin rəisi, polis polkovniki Əşrəf Allahyarov gənc əməkdaşlara əldə edilən uğurlarla kifayətlənməməyi, yaradılan şəraitdən xidmətdə uğur qazanmaq üçün istifadə etməyi tövsiyə edib.

Bu yazıda fikrimiz heç də polisin fəaliyyətini reklam etmək deyil, ancaq hər hansı bir işi, fəaliyyəti publikanın, cəmiyyətin diqqətinə çatdırmaq üçün təbliğata ehtiyac var. Və sevindirici haldır ki, mühafizə polisinin, işi, fəaliyyəti ilə bağlı təkcə paytaxtımızda deyil, yerlərdə də yüksək səviyyədə təbliğat, maarifləndirmə işi aparılır.

Gəlin, bizə təhlükədən daha yaxın olanları, malımızı, mülkümüzü, əmlakımızı qoruyanları sevək və qanunu pozmamaqla vətəndaşlıq borcumuzu yerinə yetirib onlara yardımçı olaq.